យុទ្ធនាការបោះឆ្នោតរបស់ប្រធានាធិបតីសហរដ្ឋអាមេរិកលោក ដូណាល់ ត្រាំ (Donald Trump) កាលពីថ្ងៃអាទិត្យម្សិលមិញ បានទម្លាក់ចោលផ្នែកដ៏សំខាន់មួយនៃពាក្យបណ្តឹងរបស់ខ្លួន ដែលបានព្យាយាមរារាំងរដ្ឋ Pennsylvania មិនឲ្យប្រកាសលទ្ធផលផ្លូវការនៅក្នុងរដ្ឋនោះ ទាក់ទិននឹងការបោះឆ្នោតប្រធានាធិបតី។
ការធ្វើដូច្នេះបានធ្វើឲ្យពាក្យបណ្ដឹងនោះ ផ្ដោតលើតែសន្លឹកឆ្នោតក្នុងចំនួនបន្តិចបន្តួចតែប៉ុណ្ណោះ។ នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មាន Reuters។
នៅក្នុងពាក្យបណ្តឹងដែលដាក់នៅក្នុងតុលាការសហព័ន្ធនោះ យុទ្ធនាការបោះឆ្នោតរបស់លោក ត្រាំ បានទម្លាក់ចោលការអះអាងដែលថា មន្ត្រីរៀបចំការបោះឆ្នោតបានរារាំងដោយខុសច្បាប់ មិនឲ្យអ្នកសង្កេតការណ៍មើលការរាប់សន្លឹកឆ្នោតដែលផ្ញើតាមប្រៃសណីយ៍នៅក្នុងទីក្រុង Philadelphia និងទីក្រុង Pittsburg។
ឥឡូវនេះ ពាក្យបណ្តឹងនោះបានផ្តោតលើតែការអះអាងដែលថា ស្រុកនានាដែលមានទំនោររកគណបក្សប្រជាធិបតេយ្យបានអនុញ្ញាតដោយខុសច្បាប់ឲ្យអ្នកបោះឆ្នោតកែការភាន់ច្រឡំនៅក្នុងសន្លឹកឆ្នោតផ្ញើតាមប្រៃសណីយ៍របស់ខ្លួន ដោយរំលោភច្បាប់រដ្ឋ។
មន្ត្រីនានានិយាយថា ពាក្យបណ្ដឹងនោះប៉ះពាល់លើសន្លឹកឆ្នោតបន្តិចបន្តួចតែប៉ុណ្ណោះនៅក្នុងរដ្ឋ Pennsylvania ដែលលោក ចូ បៃដិន (Joe Biden) ត្រូវបានគេព្យាករណ៍ថាឈ្នះសំឡេងឆ្នោតជាង ៦ ម៉ឺនសំឡេង។
មន្ត្រីរដ្ឋ Pennsylvania បានស្នើចៅក្រមឲ្យទាត់ចោលពាក្យបណ្តឹងនោះ ដោយនិយាយថា អ្នកសង្កេតការណ៍បោះឆ្នោតត្រូវបានអនុញ្ញាតឲ្យពិនិត្យមើលដំណើរការនៃការរាប់សន្លឹកឆ្នោតដែលផ្ញើតាមប្រៃសណីយ៍ ហើយថា ស្រុកទាំងអស់នៅក្នុងរដ្ឋត្រូវបានអនុញ្ញាតឲ្យជូនដំណឹងដល់អ្នកបោះឆ្នោត ប្រសិនបើសន្លឹកឆ្នោតផ្ញើតាមប្រៃសណីយ៍របស់ពួកគេមិនគ្រប់លក្ខណៈ ទោះបីជាវាមិនមែនជាការតម្រូវ ដែលត្រូវតែឲ្យពួកគេធ្វើដូច្នេះក៏ដោយ៕
