ប្រធានាធិបតីសហរដ្ឋអាមេរិកលោក Donald Trump បាននិយាយថា លោកនឹងចាប់ផ្ដើមឡើងវិញនូវការជូនដំណឹងរបស់សេតវិមានអំពីជំងឺកូវីដ១៩ ស្របពេលដែលករណីឆ្លងជំងឺនេះ កំពុងកើនឡើងនៅទូទាំងប្រទេស។
ការសម្រេចរបស់លោក Trump នៅក្នុងការចាប់ផ្ដើមនូវការជូនដំណឹងប្រចាំថ្ងៃនេះឡើងវិញ បានធ្វើឡើង នៅចំពេលដែលអត្រាគាំទ្រលោកបានធ្លាក់ចុះ នៅក្នុងការស្ទង់មតិកន្លងមក ហើយទីប្រឹក្សារបស់លោកបានលើកទឹកចិត្តលោកឲ្យជូនដំណឹងដល់សាធារណជនបន្ថែមទៀត អំពីវិធានការរបស់រដ្ឋបាលរបស់លោកចំពោះវិបត្តិជំងឺកូវីដ១៩ នេះ។
លោក Trump បានបញ្ជាក់ប្រាប់អ្នកកាសែតនៅការិយាល័យរបស់លោកក្នុងសេតវិមានកាលពីថ្ងៃច័ន្ទថា៖ «ខ្ញុំគិតថា វាជាវិធីល្អបំផុតនៅក្នុងការជូនដំណឹងដល់សាធារណជន»។
លោកបានបន្ថែមថា ការជូនដំណឹងនេះទំនងជានឹងចាប់ផ្ដើមពីថ្ងៃអង្គារនេះតទៅ ហើយលោកសង្ឃឹមថា នឹងលើកឡើងអំពីដំណើរវិវឌ្ឍប្រសើរទៅមុខផ្នែកវេជ្ជសាស្ត្រនៅក្នុងការប្រយុទ្ធប្រឆាំងនឹងជំងឺកូវីដ១៩ ដែលក្នុងនោះមានទាំងវ៉ាក់សាំង និងវិធីព្យាបាលផងដែរ។
អ្នកនាំពាក្យសេតវិមានអ្នកស្រី Kayleigh McEnany បានបញ្ជាក់ថា ការជូនដំណឹងនេះនឹង «ផ្ដល់ការធានាដល់ពលរដ្ឋអាមេរិកាំងថា យើងស្ថិតក្នុងដំណាក់កាលដែលអាចផ្ដល់ការព្យាបាល [ជំងឺកូវីដ១៩] បានប្រសើរជាងមុន ដោយសារតែវិធីព្យាបាលដែលបានបង្កើតឡើងនៅក្រោមការដឹកនាំរបស់លោកប្រធានាធិបតី»៕
