គេរំពឹងថា ប្រធានាធិបតីស.រ.អា. Donald Trump នឹងជួបជាមួយលោកស្រីអធិការបតីអាល្លឺម៉ង់ Angela Merkel នៅមុនសន្និសីទកំពូលរបស់មេដឹកនាំនៃពួកប្រទេសមានសេដ្ឋកិច្ចធំបំផុតក្នុងពិភពលោកនៅពេលបន្ទាប់មកទៀតក្នុងសប្តាហ៍នេះក្នុងក្រុង Hamburg ប្រទេសអាល្លឺម៉ង់។
លោក Steffen Seibert អ្នកនាំពាក្យរបស់លោកស្រី Merkel បាននិយាយថាមេដឹកនាំទាំងពីរនាក់នេះនឹងជួបគ្នានៅមុនសន្និសីទកំពូលនៃក្រុមប្រទេស G-20 ចាប់ផ្តើមប្រជុំទំនងជានៅល្ងាចថ្ងៃព្រហស្បតិ៍។
លោក Trump បាននិយាយតាម Twitter ថា លោកនឹងនិយាយទូរស័ព្ទនៅព្រឹកថ្ងៃច័ន្ទជាមួយលោកស្រី Merkel ហើយនឹងមានការនិយាយទូរស័ព្ទដាច់ដោយឡែកជាមួយសម្ព័ន្ធមិត្តពីរនាក់ទៀតគឺលោកប្រធានាធិបតីបារាំង Emmanuel Macron និងលោកនាយករដ្ឋមន្ត្រីអ៊ីតាលី Paolo Gentiloni។
នៅពេលបន្ទាប់មកសេតវិមានបានចេញផ្សាយអត្ថបទនៃការសន្ទនាគ្នាជាមួយលោកស្រី Merkel និងលោក Gentiloni។ លោកស្រី Merkel និង Trump បានពិភាក្សាគ្នាអំពីបញ្ហាអាកាសធាតុ ការផ្តើមគំនិតផ្តល់ប្រាក់កាសដល់សហគ្រិនស្ត្រីភាសាអង់គ្លេសហៅថា Women's Entrepreneurship Financing Initiative និងបញ្ហាពាណិជ្ជកម្មដោយមានរួមបញ្ចូលទាំងការផលិតដែកថែបច្រើនហួសកម្រិតក្នុងពិភពលោកផងដែរ នេះបើតាមសេចក្តីថ្លែងការណ៍នេះ។ សេចក្តីថ្លែងការណ៍នេះបន្ថែមថា Trump នឹងជួយលោកស្រី Merkel ធ្វើឱ្យសន្និសីទកំពូល G-20 ទទួលបានជោគជ័យ។
សេតវិមានបាននិយាយថានៅក្នុងការសន្ទនារបស់ Trump ជាមួយលោកនាយករដ្ឋមន្ត្រីអ៊ីតាលី Gentiloni គាត់បានសម្តែងការអរគុណដល់កិច្ចខិតខំប្រឹងប្រែងរបស់មន្ត្រីអ៊ីតាលីក្នុងការធ្វើជាម្ចាស់ផ្ទះរៀបចំការប្រជុំក្រុមប្រទេស G-7 ដោយជោគជ័យកាលពីខែឧសភា។ លោក Trump ក៏បានអរគុណលោក Gentiloni ដល់កិច្ចខិតខំប្រឹងប្រែងរបស់ប្រទេសអ៊ីតាលីក្នុងការដោះស្រាយវិបត្តិជនចំណាកស្រុកលីប៊ីផងដែរ៕
