លោកប្រធានាធិបតីសហរដ្ឋអាមេរិក Donald Trump នឹងថ្លែងសុន្ទរកថាទៅកាន់មេដឹកនាំមកពីបណ្ដាប្រទេសអារ៉ាប់ និងប្រទេសកាន់សាសនាឥស្លាមនានា នៅឯកិច្ចប្រជុំថ្នាក់តំបន់មួយ ផ្ដោតលើការប្រយុទ្ធប្រឆាំងនឹងអំពើជ្រុលនិយមផ្សេងៗ នៅថ្ងៃអាទិត្យនេះ។
នៅមុនការថ្លែងសុន្ទរកថារបស់លោកចូលមកដល់ លោក Trump បានមានជំនួបទ្វេភាគីជាច្រើនជាមួយនឹងមេដឹកនាំមកពីបណ្ដាប្រទេសអារ៉ាប់នានា នៅថ្ងៃទីពីរនៃដំណើរទស្សនកិច្ចរយៈពេលពីរថ្ងៃរបស់លោកទៅកាន់ប្រទេសអារ៉ាប៊ីសាអូឌីត។
នៅក្នុងជំនួបរបស់លោកជាមួយនឹងស្ដេច Hamad Isa Al Khalilfa នៃប្រទេសបារ៉ែន លោក Trump បាននិយាយថា សហរដ្ឋអាមេរិក និងប្រទេសបារ៉ែន ទោះបីជាមានទំនាក់ទំនងប្រសើរជាមួយគ្នាក៏ដោយ ក៏នៅមានឧបសគ្គបន្តិចបន្តួចផងដែរ ប៉ុន្តែឧបសគ្គនេះនឹងមិនកើតមានឡើងនៅក្នុងរដ្ឋបាលរបស់លោកនោះទេ។ លោក Trump មិនបានលើកឡើងពីឧបសគ្គបន្តិចបន្តួចនោះទេ ប៉ុន្តែលោកចង់និយាយសំដៅទៅដល់ទំនាក់ទំនងរវាងសហរដ្ឋអាមេរិក និងប្រទេសបារ៉ែន នៅក្នុងអាណត្តិរបស់លោកអតីតប្រធានាធិបតី Barack Obama។
លោក Trump បានយល់ព្រមតាមការអញ្ជើញឲ្យលោកទៅធ្វើទស្សនកិច្ចនៅក្នុងប្រទេសអេហ្ស៊ីប នៅក្នុងជំនួបរបស់លោកជាមួយនឹងលោកប្រធានាធិបតីអេហ្ស៊ីប Abdel Fattah el-Sissi។
នៅក្នុងសេចក្ដីព្រាងនៃសុន្ទរកថារបស់លោក ដែលនឹងថ្លែងនៅថ្ងៃអាទិត្យនេះ ដែលទីភ្នាក់ងារព័ត៌មាន AP ទទួលបាន លោក Trump នឹងជំរុញឲ្យមេដឹកនាំនៃបណ្ដាប្រទេសកាន់សាសនាឥស្លាមនានាឲ្យកម្ចាត់ពួកភេរវករចេញពីប្រទេសរបស់ពួកគេ៕
