កាលពីថ្ងៃសៅរ៍ ព្រះចៅ Salman bin Abdulaziz នៃប្រទេសអារ៉ាប៊ីសាអូឌីតនិងលោកប្រធានាធិបតីស.រ.អា. ដូណាល់ ត្រាំ បានចុះហត្ថលេខាលើកិច្ចព្រមព្រៀងមួយមានទឹកប្រាក់ជិត១១០ពាន់លានដុលា្លរដើម្បីបង្កើនសមត្ថភាពយោធានៃប្រទេសអារ៉ាប៊ីសាអូឌីត។
កិច្ចព្រមព្រៀងគ្នាខាងកិច្ចការពារប្រទេសនេះដែលចូលជាធរមានជាបន្ទាន់ជាកិច្ចព្រមព្រៀងមួយក្នុងបណ្តាកិច្ចព្រមព្រៀងមួយចំនួនដែលប្រទេសទាំងពីរបានចុះហត្ថលេខាដើម្បីពង្រឹងភាពដៃគូខាងយោធានិងខាងសេដ្ឋកិច្ច ដោយមានរួមបញ្ចូលទាំងកិច្ចព្រមព្រៀងទីពីរខាងកិច្ចការពារប្រទេសដែលមានជម្រើសមានទឹកប្រាក់រហូតដល់៣៥០ពាន់លានដុល្លារក្នុងរយៈពេល១០ឆ្នាំខាងមុខ។
នៅពេលជួបជាមួយព្រះអង្គម្ចាស់រាជទាយាទ Muhammad bin Nayef នៅឯសណ្ឋាគារមួយក្នុងក្រុងរីយ៉ាដ លោក ត្រាំ បាននិយាយថា៖ «ថ្ងៃនេះជាថ្ងៃល្អប្រសើរណាស់, ការងារ, ការងារ, ការងារ» ដោយលោកបានថ្លែងយោងដល់ឱកាសបង្កើតការងារដែលកិច្ចព្រមព្រៀងទាំងនេះផ្តល់ឱ្យ។
សេតវិមានបាននិយាយនៅក្នុងសេចក្តីថ្លែងការណ៍មួយកាលពីពេលមុននេះថាកិច្ចព្រមព្រៀងខាងការការពារប្រទេសនឹងបង្កើតឱកាសថ្មីៗសម្រាប់ក្រុមហ៊ុនស.រ.អា.នៅក្នុងភូមិភាគមជ្ឈិមបូព៌ានិងគាំទ្រការងារថ្មីៗរាប់ម៉ឺននៅក្នុងឧស្សាហកម្មខាងការពារប្រទេសរបស់ស.រ.អា.។
សេចក្តីថ្លែងការណ៍របស់សេតវិមានក៏បាននិយាយដែរថា កិច្ចព្រមព្រៀងទាំងនេះនឹងជួយប្រទេសទាំងពីរឱ្យដោះស្រាយបញ្ហានៃការគំរាមកំហែងដល់ពួកគេប្រកបដោយប្រសិទ្ធិភាពជាងមុនផងដែរ៕
