ប្រធានាធិបតីជាប់ឆ្នោតសហរដ្ឋអាមេរិក លោក ដូណាល់ ត្រាំ បានគំរាមប្រែក្រឡាស់ទំនាក់ទំនងដ៏កក់ក្តៅរបស់ប្រធានាធិបតីសហរដ្ឋអាមេរិក បារ៉ាក់ អូបាម៉ា ជាមួយប្រទេសគុយបា ដែលជាទាក់ទងជាប្រវត្តិសាស្រ្តឡើងវិញក្រោយមានការប្រេះស្រាំអស់ជាយូរ។
លោក ត្រាំ បាននិយាយនៅក្នុងសារ Twitter របស់លោកកាលពីថ្ងៃចន្ទថា «ប្រសិនបើ គុយបា គ្មានឆន្ទៈធ្វើឲ្យមានភាពប្រសើរឡើងសម្រាប់ប្រជាពលរដ្ឋគុយបាទេនោះ ប្រ ជាពលរដ្ឋគុយបា អាមេរិកាំង ហើយនិយាយរួមគឺសហរដ្ឋអាមេរិក ខ្ញុំនឹងបញ្ចប់ការ ទាក់ទងនេះ»។
សារ Twitter នោះស្របទៅតាមអ្វីដែលលោកត្រាំបាននិយាយអស់រយៈពេលជាយូរមកហើយអំពីកិច្ចព្រមព្រៀងរវាងសហរដ្ឋអាមេរិក និងគុយបា ដែលលោកចាត់ទុកថាមានភាពលំអៀងទៅរករដ្ឋាភិបាលឡាហាវ៉ាន។ បញ្ហាទំនាកទំនងនេះត្រូវបានទទួលការយកមកពិចារណាឡើងដាក់វិញ បន្ទាប់ពីការស្លាប់របស់លោក Fidel Castro មេដឹកនាំដ៏យូរអង្វែងរបស់គុយបាកាលពីសប្តាហ៍មុន។
នាយខុទ្ធការល័យរបស់លោក ត្រាំ បាននិយាយកាលពីថ្ងៃអាទិត្យថា ប្រធានាធិបតីជាប់ឆ្នោតប្រាកដជាមានឆន្ទៈប្រែក្រឡាស់ទំនាក់ទំនងរបស់លោកប្រធានាធិបតីអូបាម៉ា ជាមួយគុយបា។ ថ្លែងទៅកាន់កម្មវិធី Fox News Sunday របស់បណ្តាញទូរទស្សន៍ FOX លោក Reince Priebus បាននិយាយថា អនាគតនៃទំនាក់ទំនងរវាងសហរដ្ឋអាមេរិកនិងគុយបា អាស្រ័យថាតើរដ្ឋាភិបាលក្រុងឡាហាវ៉ានធ្វើចលនាក្នុងទិសដៅត្រឹមត្រូវលើបញ្ហាសិទ្ធិមនុស្សដែរឬទេ។
លោក Priebus បាននិយាយថា «ការជិះជាន់សង្កត់សង្កិន ការបើកចំហទីផ្សារ សេរីភាពសាសនា អ្នកទោសនយោបាយ បញ្ហាទាំងអស់នេះ ចាំបាច់ធ្វើការផ្លាស់ប្តូរដើម្បីឲ្យមានការបើកចំហហើយនិងទំនាក់ទំនងដោយសេរី»៕
