ប្រធានាធិបតីសហរដ្ឋអាមេរិក លោក Donald Trump បានគំរាមកំហែងកាលពីថ្ងៃអង្គារម្សិលមិញមិនចុះហត្ថលេខាលើសេចក្តីព្រាងច្បាប់ដ៏ធំមួយនៅដំណាច់ឆ្នាំដែលត្រូវបានអនុម័តដោយសមាជិកសភាអាមេរិកដែលរួមមានកញ្ចប់ជំនួយគ្រាវិបត្តិកូវីដ១៩ដែលមានទឹកប្រាក់៩០០ពាន់លានដុល្លារនិងថវិការដ្ឋាភិបាលប្រចាំឆ្នាំដែលមានទឹកប្រាក់១,៤លានលានដុល្លារ។
លោកប្រធានាធិបតី Trump បាននិយាយនៅក្នុងវីដេអូផ្សាយតាម Twitter កាលពីយប់ថ្ងៃអង្គារថា សេចក្តីព្រាងច្បាប់នេះ មិនបានផ្តល់ជំនួយគ្រប់គ្រាន់ដល់ប្រជាពលរដ្ឋអាមេរិកាំងទេ។ សេចក្តីព្រាងច្បាប់នេះ ផ្តល់ប្រាក់៦០០ដុល្លារដល់ប្រជាពលរដ្ឋអាមេរិកាំងភាគច្រើន។
លោកប្រធានាធិបតីបានមានប្រសាសន៍ទៀតថា លោកកំពុងសុំឲ្យសភា «បង្កើនចំនួនប្រាក់ទាបគួរឲ្យអស់សំណើចនេះពីចំនួន៦រយដុល្លារទៅ២ពាន់ដុល្លារឬ៤ពាន់ដុល្លារសម្រាប់ប្តីប្រពន្ធមួយគូ។ លោកប្រធានាធិបតីថ្លែងថា ខ្ញុំកំពុងសុំឲ្យសភាលុបចោលខ្លឹមសារដែលមិនចាំបាច់ចេញពីសេចក្តីព្រាងច្បាប់ហើយបញ្ជូនឲ្យខ្ញុំនូវសេចក្តីព្រាងច្បាប់ដ៏សមរម្យមួយ»។
ទាំងសភាតំណាងរាស្ត្រនិងព្រឹទ្ធសភាបានអនុម័តសេចក្តីព្រាងច្បាប់ថវិកានេះដោយមានការគាំទ្រយ៉ាងខ្លាំងកាលពីយប់ថ្ងៃច័ន្ទ ដោយសមាជិកសភាមានពេលវេលាតែបន្តិចបន្តួចដើម្បីពិនិត្យមើលសេចក្តីព្រាងច្បាប់ជាង ៥.០០០ទំព័រ។ ពេលនោះ ពួកគេប្រឈមពេលកំណត់ពាក់កណ្តាលយប់ដើម្បីផ្តល់ថវិកាដល់រដ្ឋាភិបាលឲ្យបន្តនៅបើកទ្វារ៕
