នៅពេលព្រឹទ្ធសភាពិចារណាបណ្តឹងដកលោកប្រធានាធិបតីចេញពីតំណែង ក្រុមមេធាវីការការពារលោកប្រធានាធិបតីអាមេរិកលោកដូណាល់ត្រាំកាលពីថ្ងៃអង្គារបានប្រាប់សមាជិកព្រឹទ្ធសភា១០០នាក់ថា លោកប្រធានាធិបតីមិនបានធ្វើអ្វីខុសទេ ក្នុងការទាក់ទងជាមួយប្រទេសអ៊ុយក្រែន។
ដំណើរការចោទប្រកាន់ប្រធានាធិបតីដំណាក់កាលទី១ នៅព្រឹទ្ធសភាបានបញ្ចប់នៅពេលមានការប្រឆាំងគ្នាទាក់ទងនឹងការទទួលយកភស្តុតាងថ្មីនិងសាក្សីថ្មី រួមទាំងលោក John Bolton អតីតទីប្រឹក្សាសន្តិសុខជាតិក្នុងដំណាក់កាលបន្ទាប់។
លោកប្រធានាធិបតីTrump បានប្រមូលផ្តុំអ្នកគាំទ្រលោកនៅរដ្ឋ New Jersey គឺតែប៉ុន្មាន ម៉ោងប៉ុណ្ណោះ បន្ទាប់ពីក្រុមមេធាវីរបស់លោកបានបញ្ចប់ការការពារលោកនៅវិមានរដ្ឋសភា។ មេធាវីរបស់ប្រធានាធិបតីបានប្រើពេលតែពាក់កណ្តាលប៉ុណ្ណោះនៃពេលរបស់ពួកគេ ដោយបានប្រាប់សមាជិកព្រឹទ្ធសភាថា កិច្ចប្រឹងប្រែងរបស់គណបក្សប្រជាធិបតេយ្យក្នុងការចោទប្រកាន់លោកប្រធានាធិបតីគឺជារឿងគ្រោះថ្នាក់។
ប៉ុន្តែការកាត់សេចក្តីនេះនៅវែងឆ្ងាយណាស់ ព្រោះមានសម្ពាធកាន់តែកើនឡើងជំរុញឱ្យកោះហៅលោក John Bolton មកផ្តល់សក្ខីកម្ម។ គណបក្សប្រជាធិបតេយ្យត្រូវការការគាំទ្ររបស់សមាជិកព្រឹទ្ធសភាគណបក្សសាធារណរដ្ឋ៤នាក់ដើម្បីបានសំឡេងភាគច្រើន៥០%បូក១ដែលជាសំឡេងចាំបាច់ក្នុងការជំរុញការកោះហៅសាក្ស៊ីមកផ្តល់សក្ខីកម្ម។ ទោះជាយ៉ាងណាមិនមែនសមាជិកគណបក្សសាធារណរដ្ឋទាំងអស់ជឿទុកចិត្តលើអ្វីដែលលោក Bolton នឹងនិយាយនោះទេ៕
