ភ្ជាប់​ទៅ​គេហទំព័រ​ទាក់ទង

លោក ត្រាំ៖ ច្បាប់​គ្រប់គ្រង​កាំភ្លើង​តឹងរ៉ឹង​ជាង​នេះ​ប្រហែល​ជា​មិន​អាច​បញ្ឈប់​ការ​សម្លាប់​រង្គាល​នៅ​រដ្ឋ តិចសាស ទេ


លោក​ប្រធានាធិបតី ដូណាល់ ត្រាំ ថ្លែង​សុន្ទរកថា​នៅ​សន្និសីទ​កាសែត​មួយ​នៅ​វិមាន​ពណ៌​ខៀវ​នៅ​ក្នុង​ក្រុង​សេអ៊ូល ប្រទេស​កូរ៉េ​ខាង​ត្បូង កាលពី​ថ្ងៃទី៧ ខែវិច្ឆិកា ឆ្នាំ២០១៧។

លោក​ប្រធានាធិបតី​អាមេរិក ដូណាល់ ត្រាំ បាន​មាន​ប្រសាសន៍​ថា ច្បាប់​ប្រើប្រាស់​កាំភ្លើង​ដែល​តឹងរ៉ឹង​ជាង​នេះ​នៅក្នុង​សហរដ្ឋអាមេរិក នឹង​មិន​អាច​ទប់ស្កាត់​ខ្មាន់​កាំភ្លើង​ម្នាក់​មិន​ឲ្យ​សម្លាប់​មនុស្ស​២៦​នាក់​នៅ​ក្នុង​ហេតុការណ៍​សម្លាប់​រង្គាល​នៅ​ឯ​ព្រះវិហារ​សាសនា​គ្រិស្ត​មួយ​ក្នុង​រដ្ឋ តិចសាស បាន​ឡើយ ហើយ​មិន​ត្រឹមតែ​ប៉ុណ្ណោះ ប្រហែល​ជា​អាច​រារាំង​ដល់​អ្នក​នៅ​ជិត​កន្លែង​កើតហេតុ​មិន​ឲ្យ​ប្រឈម​មុខ​តតាំង​ជាមួយ​នឹង​ជន​ដៃដល់​នោះ​ទៅ​វិញ។

ដោយ​កំពុង​ស្ថិត​នៅ​ក្នុង​ប្រទេស​កូរ៉េខាងត្បូង​ក្នុង​ទស្សនកិច្ច​ទៅ​កាន់​ប្រទេស​នៅ​តំបន់​អាស៊ី​ចំនួន​៥ លោក ត្រាំ បាន​ថ្លែង​កាល​ពី​ថ្ងៃ​អង្គារ​ថា ប្រសិន​បើ​មាន​ការ​ដាក់​កំហិត​ទៅ​លើ​អ្នក​ទិញ​កាំភ្លើង​នៅ​ក្នុង​សហរដ្ឋអាមេរិក ប្រហែល​ជា​មិន​អាច​មាន​មនុស្ស​ក្លាហាន​ម្នាក់ ដែល​មាន​កាំភ្លើងខ្លី​ឬ​កាំភ្លើង​វែង​នៅ​ក្នុង​ឃ្លុប​រថយន្តtruck របស់​គេ ហើយ​ចេញ​ទៅ​បាញ់​ វាយ​ដំ​ និង​សម្លាប់​ជន​ដៃដល់​នោះ​ទេ។

នៅ​ពេល​សួរ​ថា លោក​នឹង​ពិចារណា​ទៅ​លើ​គោលនយោបាយ​គ្រប់គ្រង​ការ​ប្រើប្រាស់​កាំភ្លើង​ក្រោយ​ពី​មាន​ការ​សម្លាប់​រង្គាល​ដ៏​ធំ​ទីពីរ​នៅ​ក្នុង​សហរដ្ឋអាមេរិក ក្នុង​រយៈពេល​៥​សប្តាហ៍​ដែរ​ឬ​ទេ លោក ត្រាំ បាន​និយាយ​ថា «ចូរ​អ្នក​មើល​ទៅ​ទីក្រុង​មួយ ដែល​មាន​ច្បាប់​ប្រើប្រាស់​កាំភ្លើង​តឹងរ៉ឹង​បំផុត​នៅ​ក្នុង​ប្រទេស​របស់យើង គឺ​ទីក្រុង Chicago ប៉ុន្តែ​ទីក្រុង Chicago នេះ មាន​រឿង​អាក្រក់ៗ​ជាច្រើន គឺ​អាក្រក់​ខ្លាំង​មែនទែន។ សូម​ចងចាំ​ថា បើ​បុរស​ជួយ​សង្គ្រោះ​ម្នាក់​នោះ​មិន​មាន​កាំភ្លើង​ខ្លី​ឬ​កាំភ្លើង​វែង​ទេ​នោះ ស្ថានភាព​នឹង​អាក្រក់​ជាង​នេះ​យ៉ាង​ខ្លាំង​នៅ​ក្នុង​រដ្ឋ តិចសាស៕

XS
SM
MD
LG