ខ្មាន់កាំភ្លើងដែលបានសម្លាប់មនុស្ស២៦នាក់នៅក្នុងព្រះវិហារសាសនាគ្រិស្តមួយក្នុងរដ្ឋ តិចសាស ទំនងជាធ្វើការបាញ់ប្រហារដោយសារតែមានជម្លោះក្នុងគ្រួសារជាមួយនឹងសាច់ថ្លៃរបស់ខ្លួន ហើយក៏បានផ្ញើសារគំរាមកំហែងដល់ម្តាយក្មេករបស់ខ្លួន មុនពេលបើកការបាញ់ប្រហារនោះផងដែរ។ នេះបើយោងតាមការបញ្ជាក់របស់អាជ្ញាធរកាលពីថ្ងៃចន្ទ។
លោក Freeman Martin មន្ត្រីសុវត្ថិភាពសាធារណៈក្នុងរដ្ឋ តិចសាស បានមានប្រសាសន៍ថា «វាគឺជាអំពើឧក្រិដ្ឋកម្មដ៏មិនសមហេតុផលមួយ ប៉ុន្តែយើងអាចប្រាប់ដល់អ្នកបានថា មានបញ្ហាផ្ទៃក្នុងនៅក្នុងគ្រួសាររបស់ជនដៃដល់»។ លោក Martin បានថ្លែងដូច្នេះ ខណៈដែលអ្នកស៊ើបអង្កេតបានស្វែងរកមូលហេតុដែលជន Devin Kelley វ័យ២៦ឆ្នាំ បានបើកការបាញ់ប្រហារទៅលើអ្នកកាន់សាសនាគ្រិស្តនៅព្រះវិហារគ្រិស្តនិកាយ Baptist មួយ ក្នុងអំឡុងពេលនៃការប្រតិបត្តិសាសនាកាលពីព្រឹកថ្ងៃអាទិត្យ ក្នុងក្រុង Sutherland Springs រដ្ឋ តិចសាស។
លោក Martin បានថ្លែងថា សាច់ថ្លៃរបស់ជន Kelley ក៏ទៅចូលរួមពិធីបែបសាសនានៅព្រះវិហារ First Baptist ជាញឹកញាប់ដែរ ប៉ុន្តែអ្នកស៊ើបអង្កេតនិយាយថា ពួកគេមិនបានទៅព្រះវិហារនោះទេ កាលពីថ្ងៃអាទិត្យ។
លោក Martin និយាយថា «ការបាញ់ប្រហារនោះមិនពាក់ព័ន្ធនឹងការពង្វក់នោះទេ ហើយក៏មិនមែនជាជំនឿសាសនាដែរ។ មានរឿងនៅក្នុងគ្រួសាររបស់គេនិងសាច់ថ្លៃរបស់គេ»៕
