ភ្ជាប់​ទៅ​គេហទំព័រ​ទាក់ទង

លោក Trump ថា រុស្ស៊ី​ច្បាស់​ជា​កំពុង​សើច​ចំអក​ចំពោះ​ការ​ស៊ើបអង្កេត​របស់​អាមេរិក​ទៅ​លើ​ការ​ជ្រៀតជ្រែក​របស់​រុស្ស៊ី​នៅ​ក្នុង​ការ​បោះឆ្នោត


លោក​ប្រធានាធិបតី Donald Trump ថ្លែង​ទៅ​កាន់​ទាហាន​អាមេរិក​នៅ​ក្នុង​ស្ថានីយ​​អាកាស Sigonella របស់​កងទ័ព​ជើង​ទឹក ក្នុង​ប្រទេស​អ៊ីតាលី។

លោក​ប្រធានាធិបតី​អាមេរិក Donald Trump ថ្លែង​ថា ក្រុម​មន្ត្រី​រុស្ស៊ី «ច្បាស់​ជា​កំពុង​សើច​ចំអក» ឲ្យ​សហរដ្ឋអាមេរិក ចំពោះ​ការ​បង្កើន​ការ​ស៊ើបអង្កេត​របស់​អាមេរិក​ទៅ​លើ​ការ​ជ្រៀតជ្រែក​របស់​រុស្ស៊ី នៅ​ក្នុង​ការ​បោះឆ្នោត​កាល​ពី​ឆ្នាំ​មុន ដែល​លោក​បាន​អះអាង​ថា​គឺ​ជា «លេស‍​ដ៏​អន់​មួយ‍» ដែល​សមាជិក​គណបក្ស​ប្រជាធិបតេយ្យ​ដែល​ប្រឆាំង​នឹង​រូបលោក ប្រើប្រាស់​ដើម្បី​ពន្យល់​អំពី​ការ​ចាញ់​នៅ​ក្នុង​ការ​ប្រជែង​យក​តំណែង​នៅ​សេតវិមាន។ ​

នៅ​ក្នុង​ប្រអប់​បញ្ចេញ​មតិ​មួយ​លើ​បណ្តាញ​សង្គម Twitter កាល​ពី​ថ្ងៃ​អង្គារ លោក Trump បាន​និយាយ​ថា ការ​ស៊ើបអង្កេត​ករណី​ពាក់ព័ន្ធ​នឹង​ជំនួយការ​យុទ្ធនាការ​បោះឆ្នោត​របស់​លោក Trump និង​ភ្នាក់ងារ​របស់​រុស្ស៊ី ដែល​មាន​គោលបំណង​ជួយ​លោក​ឲ្យ​ឈ្នះ​នៅ​ក្នុង​ការបោះឆ្នោត គឺ​ជា​ព័ត៌មាន​ក្លែងក្លាយ។ ​

លោកស្រី Hillary Clinton ដែល​ជា​អតីត​រដ្ឋមន្ត្រី​ក្រសួង​ការបរទេស​អាមេរិក បាន​បន្ទោស​មួយ​ផ្នែក​ទៅ​លើ​ការ​ជ្រៀតជ្រែក​របស់​រុស្ស៊ី​នៅ​ក្នុង​ការ​បោះឆ្នោត ដែល​ធ្វើ​ឲ្យ​លោកស្រី​ចាញ់​លោក Trump នៅ​ក្នុង​ការ​បោះឆ្នោត​ប្រជែង​យក​តំណែង​ប្រធានាធិបតី។ ប៉ុន្តែ​លោក Trump មិន​គាំទ្រ​លើ​ការ​ស៊ើបអង្កេត​នេះ​ទេ បើ​ទោះ​បី​ជា​ក្រសួង​យុត្តិធម៌​របស់​លោក​បាន​តែងតាំង​រដ្ឋអាជ្ញា​ពិសេស​ម្នាក់​ដើម្បី​ពិនិត្យ​មើល​ទៅ​លើ​ការ​ស៊ើបអង្កេត​នេះ ដើម្បី​ពិនិត្យ​មើល​ថា​តើ​ជំនួយការ​យុទ្ធនាការ​បោះឆ្នោត​របស់​លោក​បាន​ឃុបឃិត​ដោយ​ខុស​ច្បាប់​ជាមួយ​នឹង​រុស្ស៊ី​ឬ​យ៉ាង​ណា ហើយ​គណៈកម្មាធិការ​សភា​មួយ​ចំនួន​បាន​ចាប់​ផ្តើម​រកឃើញ​ការ​ពិត​មួយ​ចំនួន​ទៀត​ផង៕​

XS
SM
MD
LG