អតីតប្រធានាធិបតីសហរដ្ឋអាមេរិកលោក Donald Trump និយាយថា លោកនឹងចូលសារភាពជាមួយអាជ្ញាធរក្នុងរដ្ឋ Georgia នៅថ្ងៃព្រហស្បតិ៍ខាងមុខនេះ ដើម្បីប្រឈមពីបទចោទក្នុងសំណុំរឿងដែលចោទប្រកាន់លោកថា បានព្យាយាមដោយខុសច្បាប់ក្នុងការផ្លាស់ប្តូរលទ្ធផលបោះឆ្នោតដែលលោកចាញ់ក្នុងឆ្នាំ២០២០។
លោក Trump បានសរសេរសារបង្ហោះលើបណ្តាញសង្គមរបស់លោកកាលពីយប់ថ្ងៃចន្ទថា «តើអ្នកជឿទេ? ខ្ញុំនឹងទៅទីក្រុង Atlanta រដ្ឋ Georgia នៅថ្ងៃព្រហស្បតិ៍នេះដើម្បីឱ្យគេចាប់ខ្លួន»។ ការបង្ហោះសារដូចនេះរបស់លោក Trump កើតឡើងតែប៉ុន្មានម៉ោងប៉ុណ្ណោះ ក្រោយពីឯកសារតុលាការនិយាយថា ប្រាក់ធានានៅក្រៅឃុំរបស់លោកត្រូវបានកំណត់ចំនួន២សែនដុល្លារអាមេរិក។
ការិយាល័យស្នងការប៉ូលិសស្រុក Fulton ក្នុងទីក្រុង Atlanta រដ្ឋ Georgia បាននិយាយនៅក្នុងសេចក្តីប្រកាសព័ត៌មានមួយ កាលពីរសៀលថ្ងៃចន្ទថា នៅពេលដែលលោក Trump ចូលសារភាពនោះ នឹងមានការបិទផ្លូវនៅជុំវិញតំបន់ពន្ធនាគារដ៏សំខាន់របស់ស្រុកនេះ។
យោងតាមឯកសារតុលាការ លោកត្រូវត្រូវបានហាមប្រាម មិនឱ្យបំភិតបំភ័យសហចុងចោទ សាក្សី ឬជនរងគ្រោះនៅក្នុងសំណុំរឿងនេះឡើយ ដែលក្នុងនោះក៏រួមមានការប្រើប្រាស់នៅបណ្តាញសង្គមផងដែរ។ នេះបើយោងទៅលើកិច្ចព្រមព្រៀងដាក់ប្រាក់ធានាមួយ ដែលត្រូវបានចុះហត្ថលេខាដោយរដ្ឋអាជ្ញាស្រុក Fulton លោកស្រី Fani Willis និងដោយក្រុមមេធាវីលោក Trump និងចៅក្រម។
លោក Trump បានប្រើប្រាស់បណ្តាញសង្គមឥតឈប់ឈរ ដើម្បីធ្វើការវាយប្រហារទៅលើបុគ្គលមួយចំនួនដែលពាក់ព័ន្ធនឹងបណ្តឹងព្រហ្មទណ្ឌប្រឆាំងរូបលោក ស្របពេលដែលលោកកំពុងធ្វើយុទ្ធនាការដើម្បីវិលមកកាន់អំណាចជាប្រធានាធិបតីអាមេរិកសារជាថ្មីម្តងទៀតក្នុងឆ្នាំ២០២៤ខាងមុខនេះ។
លោក Trump បានរិះគន់ប្រឆាំងរដ្ឋអាជ្ញាស្រុក Fulton លោកស្រី Willis តាំងពីមុនលោកត្រូវបានកោះហៅឱ្យចូលខ្លួនម្ល៉េះ និងនៅក្នុងសារបង្ហោះរបស់លោកលើបណ្តាញសង្គមកាលពីព្រឹកថ្ងៃចន្ទ លោកបានរិះគន់អភិបាលរដ្ឋ Georgia លោក Brian Kemp នៃគណបក្សសាធារណរដ្ឋ ដែលបានបដិសេធកិច្ចប្រឹងប្រែងរបស់លោក ដើម្បីផ្លាស់ប្តូរលទ្ធផលបោះឆ្នោតនោះ៕
