ស្របពេលសមាជិកសភាស្នើឲ្យមានការស៊ើបអង្កេត ប្រធានាធិបតីសហរដ្ឋអាមេរិកលោក Donald Trump បាននិយាយកាលពីយប់ថ្ងៃអាទិត្យថា មិនមាននរណាម្នាក់ប្រាប់លោកអំពីសេចក្ដីរាយការណ៍ដែលថា ក្រុមស៊ើបការណ៍សម្ងាត់របស់យោធារុស្ស៊ីបានផ្ដល់រង្វាន់ដល់ពួកសកម្មប្រយុទ្ធតាលីបង់នៅក្នុងប្រទេសអាហ្វហ្គានីស្ថានឲ្យសម្លាប់ទាហានអាមេរិកាំងនោះទេ ដោយសារមន្ត្រីស៊ើបការណ៍សម្ងាត់សហរដ្ឋអាមេរិកមិនចាត់ទុកសេចក្ដីរាយការណ៍ទាំងនោះថាអាចទុកចិត្តបាន។
លោក Trump បាននិយាយថា៖ «ក្រុមស៊ើបការណ៍សម្ងាត់ទើបតែបានរាយការណ៍ប្រាប់ខ្ញុំថា ពួកគេមិនគិតថា ព័ត៌មាននេះអាចជឿទុកចិត្តបាននោះទេ ដូច្នេះហើយបានជាពួកគេមិនរាយការណ៍អំពីរឿងនេះប្រាប់ខ្ញុំ ឬក៏ប្រាប់លោកអនុប្រធានាធិបតី»។
សមាជិកព្រឹទ្ធសភាខាងគណបក្សសាធារណរដ្ឋលោក Lindsey Graham បាននិយាយថា លោករំពឹងថា រដ្ឋបាលរបស់លោក Trump នឹង «ផ្ដោតការយកចិត្តទុកដាក់ហ្មត់ចត់លើព័ត៌មានទាំងនេះ»។
លោក Graham បានសរសេរនៅលើ Twitter កាលពីយប់ថ្ងៃអាទិត្យថា៖ «សភានឹងស្វែងរកមូលហេតុនៃសេចក្ដីរាយការណ៍របស់ប្រព័ន្ធផ្សព្វផ្សាយនានាកាលពីពេលថ្មីៗនេះ ដែលថា ក្រុមយោធារុស្ស៊ីនៅក្នុងប្រទេសអាហ្វហ្គានីស្ថានបានស្នើផ្ដល់ប្រាក់ដល់ពួកតាលីបង់ឲ្យសម្លាប់ទាហានអាមេរិកាំង ក្នុងគោលបំណងរុញច្រានសហរដ្ឋអាមេរិកឲ្យចេញពីតំបន់»។
សមាជិកព្រឹទ្ធសភាខាងគណបក្សប្រជាធិបតេយ្យអ្នកស្រី Kirsten Gillibrand បានទាមទារឲ្យសភាស៊ើបអង្កេតលើទំហំនៃកម្មវិធីផ្ដល់រង្វាន់របស់រុស្ស៊ីនេះ ដែលក្នុងនោះរួមមានទាំងអ្នកដែលទទួលបានរង្វាន់នេះ ទឹកប្រាក់ដែលពាក់ព័ន្ធ និងកំណត់រកថាតើមានទាហានអាមេរិកាំងណាម្នាក់ត្រូវបានសម្លាប់ដោយសាររឿងនេះឬទេ។ អ្នកស្រីក៏ចង់ដឹងផងដែរថាតើលោក Trump និងមន្ត្រីរដ្ឋបាលផ្សេងទៀតរបស់លោក បានដឹងអំពីរឿងនេះនៅពេលណា ក៏ដូចជាថាតើមានសមាជិកសភាណាម្នាក់បានដឹងអំពីរឿងនេះឬក៏អត់៕
