កិច្ចប្រឹងប្រែងរបស់សភាសហរដ្ឋអាមេរិកនៅក្នុងការអនុម័តសំណើច្បាប់កំណែទម្រង់ប៉ូលិស បានជាប់គាំង ទោះបីជាមានការទាមទារលើសលុបពីគណបក្សទាំងពីរឲ្យមានការកែទម្រង់ប៉ូលិសក៏ដោយ។ សំណើច្បាប់នេះត្រូវបានធ្វើឡើង នៅក្រោយការស្លាប់របស់លោក George Floyd និងពលរដ្ឋអាមេរិកាំងស្បែកខ្មៅផ្សេងទៀត ពេលស្ថិតក្រោមសមត្ថកិច្ចរបស់ប៉ូលិស។
ដោយមានការគាំទ្រពីសមាជិកខាងគណបក្សសាធារណរដ្ឋ ៣ រូប រដ្ឋសភាដែលដឹកនាំដោយគណបក្សប្រជាធិបតេយ្យបានអនុម័តសំណើច្បាប់កំណែទម្រង់ប៉ូលិសដ៏ប្រទាំងប្រទើសមួយកាលពីថ្ងៃព្រហស្បតិ៍។
ប៉ុន្តែ សំណើច្បាប់នេះមិនទទួលបានការគាំទ្រនៅក្នុងព្រឹទ្ធសភាដែលគ្រប់គ្រងដោយគណបក្សសាធារណរដ្ឋនោះទេ ដោយមេដឹកនាំគណបក្សសាធារណរដ្ឋនៃព្រឹទ្ធសភាលោក Mitch McConnell បានច្រានចោលការទាមទាររបស់គណបក្សប្រជាធិបតេយ្យ ដែលចង់ឲ្យពង្រឹងសំណើច្បាប់ស្រដៀងគ្នានេះដែររបស់ព្រឹទ្ធសភា មុនពេលដែលវាត្រូវបានដាក់ជាផ្លូវការឲ្យមានការជជែកដេញដោលគ្នា។
កិច្ចប្រឹងប្រែងដែលជាប់គាំងនេះបង្ហាញឲ្យឃើញនូវការខ្វែងគំនិតគ្នាដ៏ខ្លាំងក្លារវាងគណបក្សទាំងពីរ ដែលធ្វើឲ្យសមាជិកសភាមិនអាចធ្វើតាមការទាមទាររបស់ពលរដ្ឋអាមេរិកាំង ដែលចង់ឲ្យមានកំណែទម្រង់ប៉ូលិស និងការផ្លាស់ប្ដូរផ្សេងៗទៀតដូចជារឿងអន្តោប្រវេសន៍ និងរឿងគ្រប់គ្រងកាំភ្លើងជាដើម។
សាធារណជនអាមេរិកាំងគាំទ្រលើសលុបឲ្យមានកំណែទម្រង់ប៉ូលិស នៅក្រោយការស្លាប់របស់លោក Floyd។ លោក Floyd បានស្លាប់ បន្ទាប់ពីប៉ូលិសស្បែកសម្នាក់ប្រើជង្គង់សង្កត់ពីលើកលោកអស់ជាង ៨ នាទី។
ការស្ទង់មតិរបស់មជ្ឈមណ្ឌល NORC សម្រាប់ការស្រាវជ្រាវកិច្ចការសាធារណៈនៃកាសែត Associated Press បានរកឃើញថា ពលរដ្ឋអាមេរិកាំង ២៩% ជឿថា ការរុះរើទាំងស្រុងនៃប្រព័ន្ធយុត្តិធម៌ព្រហ្មទណ្ឌជាតិគឺចាំបាច់។
ការស្ទង់មតិនេះបង្ហាញថា ៤០% នៃអ្នកឆ្លើយសំណួរគិតថា ប្រព័ន្ធយុត្តិធម៌ព្រហ្មទណ្ឌជាតិត្រូវតែមានការផ្លាស់ប្ដូរខ្លាំងក្លា ចំណែកឯ ២៥% បញ្ជាក់ថា ប្រព័ន្ធនេះត្រូវការការកែប្រែបន្តិចបន្តួចប៉ុណ្ណោះ៕
