ប្រធានាធិបតីសហរដ្ឋអាមេរិក លោក ដូណាល់ ត្រាំ បាននិយាយកាលពីថ្ងៃសៅរ៍ថា សកម្មភាពរបស់លោក Michel Flynn អតីតទីប្រឹក្សាសន្តិសុខជាតិក្នុងអំឡុងអនុ្តរកាលកាន់កាប់សេតវិមានរបស់លោក ត្រាំ ជាការត្រឹមត្រូវតាមច្បាប់។
លោកប្រធានាធិបតី ត្រាំ បានផ្ញើសារតាមប្រព័ន្ធ Twitter ក្នុងពិធីរៃអង្គៀសប្រាក់របស់គណបក្សសាធារណរដ្ឋនៅក្នុងទីក្រុងញូវយ៉កថា៖ «ខ្ញុំបានបណ្តេញឧត្តមសេនីយ៍ Flynn ពីព្រោះតែលោក Flynn បានភូតកុហកលោកអនុប្រធានាធិបតីនិងការិយាល័យស៊ើបអង្កេតសហព័ន្ធ FBI។ លោកបានសារភាពទទួលទោសកំហុសចំពោះការភូតកុហកទាំងអស់នេះ។ វាជាការខ្មាសអៀនពីព្រោះតែសកម្មភាពរបស់លោកក្នុងអំឡុងនៃអន្តរកាលជាការស្របច្បាប់។ មិនមានអ្វីដែលត្រូវលាក់នោះទេ»។
លោក Flynn បានសារភាពទទួលទោសកាលពីថ្ងៃសុក្រចំពោះការនិយាយកុហកភ្នាក់ងារសហព័ន្ធ ហើយលោកបានយល់ព្រមធ្វើកិច្ចសហប្រតិបត្តិការជាមួយពួកអ្នកស៊ើបអង្កេតដើម្បីពិនិត្យមើលការចោទប្រកាន់ពីការជ្រៀតជ្រែករបស់រុស្ស៊ីនៅក្នុងការបោះឆ្នោតប្រធានាធិបតីសហរដ្ឋអាមេរិកនៅឆ្នាំ២០១៦ ហើយនិងការឃុបឃិតរវាងរដ្ឋាភិបាលក្រុងមូស្គូនិងយុទ្ធនាការឃោសនាបោះឆ្នោតរបស់លោកត្រាំ។
កាលពីព្រឹកថ្ងៃសៅរ៍ ក្នុងកំណត់សម្គាល់លើកទីមួយរបស់លោកចាប់តាំងពីលោក Flynn បានចូលសារភាពទទួលទោសកំហុសនោះមក លោក ត្រាំ បាននិយាយថា មិនមានការឃុបឃិតជាសោះឡើយរវាងយុទ្ធនាការឃោសនាបោះឆ្នោតប្រធានាធិបតីរបស់លោកនិងប្រទេសរុស្ស៊ី។
លោក ត្រាំ បានប្រាប់ពួកអ្នកយកព័ត៌មាននៅពេលដែលលោកចាកចេញសេតវិមានទៅកាន់ទីក្រុងញូវយ៉កថា៖ «អ្វីដែលបានបង្ហាញមិនមានការឃុបឃិតទេ មិនមានការឃុបឃិតទេ»៕
