ទីភ្នាក់ងារព័ត៌មាន Reuters បានផ្សាយថា អ្នកគាំទ្រលោកប្រធានាធិបតី Donald Trump ដែលអ្នកខ្លះកាន់កាំភ្លើងផង បានប្រមូលផ្តុំគ្នាធ្វើបាតុកម្មនៅយប់ថ្ងៃព្រហស្បតិ៍ ប្រឆាំងនឹងអ្វីដែលលោក Trump ចោទដោយគ្មានមូលដ្ឋានថា ជាការបោះឆ្នោតមានការលួចបន្លំ នៅក្នុងរដ្ឋដែលមានការប្រកួតប្រជែងខ្លាំង និងដែលសន្លឹកឆ្នោតនៅរាប់នៅឡើយ។
ការតវ៉ានេះភាគច្រើនធ្វើឡើងដោយសន្តិវិធី បើទោះបីអ្នកគាំទ្រលោក Trump ម្តងម្កាលស្រែកដាក់គ្នាជាមួយក្រុមបាតុករប្រឆាំង។
នៅរដ្ឋ Arizona ដែលជារដ្ឋមួយក្នុងចំណោមរដ្ឋដែលមានការប្រកួតប្រជែងយ៉ាងប្រកិតរវាងលោក Trump និងគូប្រជែងខាងប្រជាធិបតេយ្យគឺលោក Joe Biden នោះ អ្នកគាំទ្រលោក Trump និងអ្នកគាំទ្រលោក Biden បានប្រវាយប្រតប់គ្នាមួយរយៈខ្លី នៅខាងក្រៅការិយាល័យបោះឆ្នោតស្រុក Maricopa ក្នុងទីក្រុង Phoenix។
ក្រុមស្តាំនិយមប្រដាប់អាវុធជាច្រើនបានប្រមូលផ្តុំគ្នានៅកន្លែងនោះ ខណៈបុគ្គលិកបោះឆ្នោតបានរាប់សន្លឹកឆ្នោតនៅខាងក្នុង ប៉ុន្តែការតវ៉ានៅតែមានសន្តិវិធី ទោះបីភាពតានតឹងកើនឡើងក៏ដោយ។
មន្រ្តីបោះឆ្នោតក្នុងតំបន់បានបន្តរាប់ និងរៀបចំសន្លឹកឆ្នោតនៅទូទាំងប្រទេសក្នុងករណីខ្លះទទួលសន្លឹកឆ្នោតបោះផ្ញើតាមប្រៃសណីយ៍ក្នុងចំនួនច្រើនមិនធ្លាប់មាន ដែលជាជម្រើសពេញនិយមក្នុងអំឡុងពេលមានជំងឺរាតត្បាតកូវីដ១៩។
នៅទីក្រុង Philadelphia រដ្ឋ Pennsylvania ប៉ូលិសបាននិយាយថា ពួកគេបានចាប់ខ្លួនបុរសម្នាក់ និងដកហូតអាវុធដែលជាផ្នែកមួយនៃការស៊ើបអង្កេតលើផែនការ ដែលត្រូវគេរាយការណ៍ថា ដើម្បីវាយប្រហារនៅមជ្ឈមណ្ឌលសន្និបាត Pennsylvania ដែលជាកន្លែងរាប់សន្លឹកឆ្នោត។
ប៉ុន្តែក្រៅពីនេះស្ថានភាពនៅ Philadelphia ដែលមិនសូវប្រឈមមុខគ្នាទេ គឺមានការប្រមូលផ្តុំដោយអធិកអធម សូម្បីនៅកន្លែងដែលបាតុករគាំទ្រលោក Trump និងបាតុករអ្នកគាំទ្រលោក Biden ត្រូវបានបំបែកដោយរនាំងចល័ត និងមានវត្តមានប៉ូលិសដ៏រឹងមាំ។
ដោយអនាគតតំណែងប្រធានាធិបតីអាមេរិកមិនទាន់ច្បាស់លាស់នោះ ការប្រឈមគ្នាថ្មីក៏មាននៅក្នុងទីក្រុងញូវយ៉ក និងវ៉ាស៊ីនតោន ព្រមទាំងនៅតាមបណ្តាទីក្រុងរបស់បណ្តារដ្ឋ ដែលមានម្តងគាំទ្រគណបក្សសាធារណរដ្ឋ និងម្តងគាំទ្រគណបក្សប្រជាធិបតេយ្យ ដូចជាក្រុង Milwaukee រដ្ឋ Wisconsin ក្រុង Las Vegas រដ្ឋ Nevada ក្រុង Detroit រដ្ឋ Michigan និងក្រុង Atlanta រដ្ឋGeorgia ជាដើម៕
