រដ្ឋាភិបាលសហរដ្ឋអាមេរិកបានច្រានចោលនូវគោលការណ៍ណែនាំដែលអនុញ្ញាតឲ្យសិស្សស្រលាញ់ភេទដូចគ្នាប្រើប្រាស់បន្ទប់ទឹក និងបន្ទប់ដាក់សម្ភារៈទៅតាមការកំណត់យេនឌ័ររបស់ពួកគេ ជាជាងទៅតាមភេទដែលចុះបញ្ជីនៅក្នុងសំបុត្រកំណើតរបស់ពួកគេ។
ក្រសួងយុត្តិធម៌ និងក្រសួងអប់រំ បានចេញនូវលិខិតរួមគ្នាមួយច្បាប់កាលពីថ្ងៃពុធម្សិលមិញទៅកាន់សាលារៀនានានៅទូទាំងសហរដ្ឋអាមេរិក ដោយបានបដិសេធសេចក្ដីបង្គាប់មួយ ដែលបានប្រកាសកាលពីឆ្នាំមុនរបស់រដ្ឋបាលលោកប្រធានាធិបតី Barack Obama។
លិខិតនោះបានបញ្ជាក់ថា វាអាស្រ័យលើរដ្ឋនានា និងក្រសួងអប់រំតាមរដ្ឋទាំងឡាយក្នុងការសម្រេចចិត្តលើរឿងទាំងអស់នេះ គឺមិនអាស្រ័យលើរដ្ឋាភិបាលសហព័ន្ធនោះទេ។
ក្រុមអ្នកតស៊ូមតិលើសិទ្ធិអ្នកស្រលាញ់ភេទដូចគ្នា បានធ្វើការតវ៉ានៅពីមុខសេតវិមានប្រធានាធិបតីអស់រយៈពេលជាច្រើនម៉ោង បន្ទាប់ពីសេចក្ដីសម្រេចចិត្តនេះត្រូវបានប្រកាស។
លោកស្រី Mara Keisling នាយកប្រតិបត្តិនៃមជ្ឈមណ្ឌលជាតិដើម្បីសមភាពអ្នកស្រលាញ់ភេទដូចគ្នាបាននិយាយថា៖ «កូនសិស្សនៅទូទាំងប្រទេសខ្លាចលោកប្រធានាធិបតី Donald Trump។ ពួកគេបារម្ភថា ពួកគេនឹងត្រូវកូនសិស្សដទៃទៀតសម្លុតមើលងាយពេលពួកគេទៅសាលារៀន។ ពេលខ្លះ គ្រូបង្រៀនក៏សម្លុតមើលងាយពួកគេដែរ។ ហើយឥឡូវនេះ ពួកគេបារម្ភថា ពួកគេអាចត្រូវរដ្ឋមន្រ្តីក្រសួងយុត្តិធម៌ និងប្រធានាធិបតីរបស់សហរដ្ឋអាមេរិកសម្លុតមើលងាយពួកគេ។ នេះគឺមិនអាចទទួលយកបាននោះទេ»។
សេចក្ដីបង្គាប់ដែលធ្វើឡើងក្នុងអាណត្តិលោកប្រធានាធិបតី Barack Obama នេះ គឺផ្អែកលើលើច្បាប់ដែលគេស្គាល់ថា Title Nine ដោយសេចក្ដីបង្គាប់នោះបានបញ្ជាក់ថា ការហាមឃាត់ប្រឆាំងនឹងការរើសអើងភេទនៅក្នុងវិស័យអប់រំគឺបូកបន្ថែមដល់ការកំណត់យេនឌ័រដោយការគិតរបស់បុគ្គលខ្លួនឯង៕
