លោកប្រធានាធិបតីអាមេរិក ដូណាល់ ត្រាំ បាននិយាយកាលពីថ្ងៃសៅរ៍នៅឯសន្និសីទកំពូល G-7 ប្រចាំឆ្នាំនៅប្រទេសកាណាដាថា ត្រូវតែមានពាណិជ្ជកម្ម «ស្មើភាពគ្នានិងទៅវិញទៅមក» រវាងសហរដ្ឋអាមេរិកនិងបណ្តាប្រទេសដទៃទៀត។
លោក ត្រាំ បាននិយាយប្រាប់អ្នកយកព័ត៌មានដូច្នេះមុនពេលលោកចាកចេញទៅចូលរួមកិច្ចប្រជុំកំពូលនៅប្រទេសសិង្ហបុរីដែលលោកនឹងជួបជាមួយលោក គីម ជុងអ៊ុន មេដឹកនាំកូរ៉េខាងជើង នៅសប្តាហ៍ក្រោយ។ លោក ត្រាំ បាននិយាយថា «ការធ្វើពាណិជ្ជកម្មអយុត្តិធម៌ជាមួយបរទេស» ជាច្រើនកន្លងមកកំពុងត្រូវបាន «កែតម្រូវយឺត ប៉ុន្តែច្បាស់លាស់» ។
លោកបានស្តីបន្ទោសមេដឹកនាំអាមេរិកកាលពីអតីតកាលចំពោះការធ្វើជំនួញពាណិជ្ជកម្មក្នុងពិភពដែលលោកថា អាមេរិកចាញ់ប្រៀបនាពេលបច្ចុប្បន្ន ហើយលោកបានអបអរសាទរដល់មេដឹកនាំពិភពលោកដទៃទៀតដែលអាច«ធ្វើកិច្ចព្រមព្រៀងពាណិជ្ជកម្មទាំងនេះល្អសម្រាប់ប្រទេសគេនិងអាក្រក់ខ្លាំងសម្រាប់សហរដ្ឋអាមេរិក»។
លោក ត្រាំ បានប្រកាសថា៖ «ពាណិជ្ជកម្មបែបនេះដល់ថ្ងៃបញ្ចប់ហើយ» ហើយបាននិយាយថា កិច្ចចរចានៅចុងសប្តាហ៍នេះជាមួយពួកមេដឹកនាំ G-7 បានធ្វើឲ្យលោកមានជំនឿថា មេដឹកនាំ G-7 «ប្តេជ្ញាចិត្តធ្វើពាណិជ្ជកម្មយុត្តិធម៌ជាងមុនសម្រាប់សហរដ្ឋអាមេរិក»។ កិច្ចប្រជុំកំពូលG-7 រយៈពេលពីរថ្ងៃនៅទីក្រុង Quebec បានបញ្ចប់កាលពីថ្ងៃសៅរ៍៕
