ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

លោក ត្រាំ កោត​សរសើរ​ការ​ដង្ហែ​ក្បួន​របស់​កូរ៉េ​ខាងជើង​ ដែល​មិន​បង្ហាញ​អាវុធ​នុយក្លេអ៊ែរ


ទាហាន​កូរ៉េ​ខាង​ជើង​ដើរ​ក្បួន​នៅ​ក្នុង​ការ​ដង្ហែ​ក្បួន​មួយ​ក្នុង​ខួប​លើក​ទី៧០​នៃ​ការ​បង្កើត​ប្រទេស​កូរ៉េ​ខាង​ជើង នៅ​ក្នុង​ក្រុង​ព្យុងយ៉ាង ប្រទេស​កូរ៉េ​ខាង​ជើង កាលពី​ថ្ងៃទី៩ ខែកញ្ញា ឆ្នាំ២០១៨។

ប្រធានាធិបតី​អាមេរិក លោក ដូណាល់ ត្រាំ បាន​និយាយ​កាល​ពី​ថ្ងៃ​អាទិត្យ​ថា «វា​គឺ​ជា​សេចក្តីថ្លែងការណ៍​ដ៏​ធំ​និង​មាន​លក្ខណៈ​វិជ្ជមាន​មួយ​» ដែល​កូរ៉េខាងជើង​បាន​រៀបចំ​ពិធី​ដង្ហែ​ក្បួន​យោធា​ចុងក្រោយ​បង្អស់​របស់​ខ្លួន ដោយ​គ្មាន​ការ​បង្ហាញ​អាវុធ​នុយក្លេអ៊ែរ ដូច​ដែល​ធ្លាប់​ធ្វើ​កន្លង​មក។

មេដឹកនាំ​អាមេរិក ដែល​ព្យាយាម​បង្ខំ​ឲ្យ​មេដឹកនាំ​កូរ៉េខាងជើង លោក គីម ជុងអ៊ុន លុបចោល​កម្មវិធី​នុយក្លេអ៊ែរ​របស់​ខ្លួន បាន​សរសេរ​លើ​បណ្តាញ​សង្គម Twitter ថា «អរគុណ​ដល់​លោក​ប្រធាន គីម‍» បន្ទាប់ពី​រដ្ឋាភិបាល​ក្រុង ព្យុងយ៉ាង បាន​រៀបចំ​ពិធី​ដង្ហែ​ក្បួន​ខួប​ទី​៧០​នៃ​ការ​បង្កើត​ប្រទេស​កូរ៉េខាងជើង ដោយ​មិន​មាន​ការ​បង្ហាញ​កាំជ្រួច​មីស៊ីល​បាញ់​ឆ្លង​ទ្វីប ដែល​កូរ៉េខាងជើង​ធ្លាប់​និយាយ​ថា មាន​សមត្ថភាព​អាច​បាញ់​ដល់​សហរដ្ឋអាមេរិក​បាន។ ​

លោក​ ត្រាំ បាន​និយាយ​សំដៅ​ទៅ​លើ​ការ​ចរចា​លើ​ការ​លុប​បំបាត់​នុយក្លេអ៊ែរ​ពី​ឧបទ្វីប​កូរ៉េ​ថា «យើង​នឹង​បង្ហាញ​ឲ្យ​អ្នក​ទាំងអស់​គ្នា​ឃើញ​ថា អ្នក​ទាំងអស់​គ្នា​យល់​ខុស‍‍! គ្មាន​អ្វី​ដែល​ល្អ​ជាង​កិច្ច​សន្ទនា​ដ៏​ល្អ​រវាង​មនុស្ស​ពីរ​នាក់ ដែល​ចូលចិត្ត​គ្នា​ទៅវិញ​ទៅ​មក​នោះ​ទេ‍! គឺ​ល្អ​ជាង​មុន​ពេល​ដែល​ខ្ញុំ​ឡើង​កាន់​តំណែង​ទៅ​ទៀត‍»។

លោក ត្រាំ បាន​លើក​ឡើង​ម្តង​ហើយ​ម្តង​ទៀត​កោត​សរសើរ​ដល់​កូរ៉េខាងជើង​ចំពោះ​ការ​ដង្ហែ​ក្បួន​លើក​នេះ ដោយ​និយាយ​ថា «ប្រធានបទ​គឺ​សន្តិភាព​និង​ការ​អភិវឌ្ឍ​សេដ្ឋកិច្ច‍»។ មេដឹកនាំ​អាមេរិក​រូប​នេះ​ត្រូវ​បាន​គេ​ស្រង់​សម្តី​ពី​ទូរទស្សន៍ Fox News ថា «អ្នក​ជំនាញ​ជឿ​ថា កូរ៉េខាងជើង​ដក​ចេញ​នូវ​កម្មវិធី​ផលិត​កាំជ្រួច​មីស៊ីល​របស់​ខ្លួន ដើម្បី​បង្ហាញ​លោក​ប្រធានាធិបតី​ ត្រាំ អំពី​ការ​ប្តេជ្ញា​ក្នុង​ការ​លុប​បំបាត់​នុយក្លេអ៊ែរ‍»៕

XS
SM
MD
LG