ភ្ជាប់​ទៅ​គេហទំព័រ​ទាក់ទង

បេក្ខជន​ដែល​លោក Trump ជ្រើសរើសជា​មេបញ្ជា​ការ​កង​ទ័ព​បាន​ដក​បេក្ខភាព​របស់​ខ្លួន​ចេញ


អ្នក​ជំនួញ​ Vincent Viola ដើរ​ចូល​ក្នុង​អគារ Trump Tower ក្នុង​ទីក្រុង​ញូវយ៉ក​កាល​ពី​ថ្ងៃទី​១៦ ធ្នូ​ ២០១៦។

បេក្ខជន​ដែល​លោក​ប្រធានាធិបតី​សហរដ្ឋ​អាមេរិក Donald Trump ជ្រើស​រើស​ឲ្យ​ធ្វើ​ជា​មេ​បញ្ជា​ការ​កង​ទ័ព​របស់​អាមេរិក​នោះ​បាន​ដក​បេក្ខភាព​របស់​ខ្លួន​ ដោយ​លើក​ឡើងថា​លោក​មិន​អាច​បម្រើ​ការ​នៅ​ក្រសួង​ការពារ​ប្រទេស​ដោយ​សារ​តែ​លោក​បារម្ភ​ពី​ពាណិជ្ជកម្ម​របស់​លោក។

កាសែត​ The Military Times បាន​រាយការណ៍​មក​ថា​លោក Vincent Viola បាន​ចេញ​សេចក្តី​ថ្លែង​ការណ៍​មួយ​ថា លោក​ពិត​ជា​មាន​កិត្តិយស​ណាស់​ដែល​ត្រូវ​បាន​ជ្រើសរើស​ឲ្យ​កាន់​តំណែង​នេះ ប៉ុន្តែ​ថា​លោក​នឹងមិន​អាច​ឆ្លង​កាត់​ការ​អនុម័ត​ដោយ​ជោគជ័យ​នោះ​ទេ។

លោក​រដ្ឋ​មន្ត្រី​ក្រសួង​ការពារ​ប្រទេស​ Jim Mattis បាន​ថ្លែង​ថា លោក​ខក​ចិត្ត​ ប៉ុន្តែ​លោក​យល់​និង​គោរព​ការ​សម្រេច​ចិត្ត​របស់​លោក Viola។ សេចក្តី​ថ្លែង​ការណ៍​មួយ​របស់​ក្រសួង​ការពារ​ប្រទេស​បាន​លើក​ឡើង​ថា៖ «លោក​រដ្ឋ​មន្ត្រី​នឹង​ណែនាំ​បេក្ខជន​មួយ​រូប​ទៀត​ដល់​លោក​ប្រធានាធិបតី​នៅ​ក្នុង​ពេល​ឆាប់ៗ​ខាង​មុខ​នេះ‍»។

លោក Viola គឺ​ជា​អតីត​យុទ្ធជន​មួយ​រូប​ហើយ​ក៏​ជា​ស្ថាបនិក​នៃ​ក្រុមហ៊ុន​ពាណិជ្ជកម្ម​ដែល​រីកលូត​លាស់​យ៉ាង​ឆាប់​រហ័ស​មួយ​ផង​ដែរ។ លោក​គឺ​ជា​អតីត​ប្រធាន​ក្រុមហ៊ុន New York Mercantile Exchange ហើយ​បច្ចុប្បន្ន​លោក​គឺ​ជា​ម្ចាស់​ក្រុមហ៊ុន​អេឡិច​ត្រូនិក​នាំ​មុខ​មួយ។ កាលពី​ឆ្នាំ​២០១៣ លោក​ជាមួយ​នឹង​នាយក​ប្រតិបតិ្ត​នៃ​ក្រុមហ៊ុន Virtu លោក Douglas Cifu បាន​ទិញ​ក្រុម​កីឡា​ Ice Hockey ដែល​មាន​ឈ្មោះ​ថា Florida Panthers៕

XS
SM
MD
LG