លោកប្រធានាធិបតីសហរដ្ឋអាមេរិក Donald Trump បានតែងតាំងលោក Brad Parscale ដែលជាអ្នកយុទ្ធសាស្ត្រឌីជីថលខាងគណបក្សសាធារណរដ្ឋឲ្យធ្វើជាប្រធានយុទ្ធនាការសម្រាប់ការបោះឆ្នោតប្រធានាធិបតីក្នុងឆ្នាំ២០២០។
នៅក្នុងការប្រកាសជាផ្លូវការនោះ លោក Trump បានសរសើលោក Pascale ថាជាមនុស្សមានសមត្ថភាពអស្ចារ្យ និងត្រូវបានជ្រើសរើសផ្អែកលើប្រវត្តិជោគជ័យការងាររបស់លោក»។ កាលពីឆ្នាំមុនលោក Parscale ដែលមានវ័យ៤២ឆ្នាំរូបនេះ បានជួយបង្កើតក្រុមនៅខាងក្រៅគាំទ្រលោក Trump ដែលមានឈ្មោះថា America First Action។
ខណៈដែលលោក Trump ស្នើឲ្យត្រួតពិនិត្យលើបញ្ហាធំ និងតូចនៅលើប្រព័ន្ធ Twitter លោក Parscal បានប្រើប្រាស់បណ្តាញសង្គម Facebook សម្រាប់ធ្វើការផ្សព្វផ្សាយយុទ្ធនាការបោះឆ្នោតដល់ពួកអ្នកបោះឆ្នោតដែលរស់នៅតាមតំបន់ជនបទ នៅអំឡុងពេលជ័យជំនះនៃយុទ្ធនាការបោះឆ្នោតរបស់លោក Trumpកាលពីឆ្នាំ២០១៦។
កូនប្រសាររបស់លោក Trump លោក Jared Kushner ដែលជាទីប្រឹក្សាជាន់ខ្ពស់នៅក្នុងសេតវិមាន បានថ្លែងថាលោក Parscale គឺជាមនុស្សសំខាន់ដែលបានពាំនាំនូវការរៀបចំយុទ្ធនាការបោះឆ្នោតតាមបែបបច្ចេកវិទ្យា និងវិធីសាស្ត្រទាញយកទិន្នន័យ សម្រាប់យុទ្ធនាការឃោសនារកសំឡេងឆ្នោតកាលពីឆ្នាំ២០១៦។
លោក Trump បានប្រកាសតាំងពីដំបូងនៅពេលលោកឡើងកាន់តំណែងជាប្រធានាធិបតីកាលពី១៣ខែមុន ថាលោកនឹងឈរឈ្មោះបោះឆ្នោតធ្វើជាប្រធានាធិបតីម្តងទៀតនៅអាណត្តិក្រោយ៕
