ប្រធានាធិបតីសហរដ្ឋអាមេរិកលោកដូណាល់ ត្រាំ បានក្លាយជាប្រធានាធិបតីសហរដ្ឋអាមេរិកកំពុងកាន់អំណាចលើកទី១ដែលទៅបំពេញទស្សនកិច្ចប្រទេសកូរ៉េខាងជើង ដោយឆ្លងព្រំដែនក្នុងជំនួបនៅតំបន់គ្មានយោធាជាមួយមេដឹកនាំកូរ៉េខាងជើង គីម ជុងអ៊ុន។
បន្ទាប់ពីការចាប់ដៃជាមួយគីម ជុងអ៊ុននៅភូមិព្រំដែនប៉ានមុនជំ (Panmunjom)ប្រធានាធិបតីត្រាំ បានឆ្លងខ្សែបន្ទាត់ព្រំដែនយោធាដែលបែងចែកកូរ៉េទាំង២។ បន្ទាប់មក គីម ជុងអ៊ុននិងប្រធានាធិបតីត្រាំ បានឆ្លងកាត់ព្រំដែនត្រឡប់ចូលក្នុងទឹកដីកូរ៉េខាងត្បូងវិញ។
គីម ជុងអ៊ុន បានប្រាប់ប្រធានាធិបតីត្រាំថា «រីករាយបានជួបលើកម្តងទៀត។ ខ្ញុំមិនដែលរំពឹងថា នឹងជួបលោកនៅទីកន្លែងនេះទេ»។
ប្រធានាធិបតីត្រាំ ដែលបានអញ្ជើញគីម ជុងអ៊ុនមកកាន់សហរដ្ឋអាមេរិកដើម្បីជួបគ្នានៅពេលណាមួយបាននិយាយថា «ការដើរឆ្លងកាត់បន្ទាត់ព្រំដែននេះជាកិត្តិយសដ៏ធំមួយ»។
លោកប្រធានាធិបតីអាមេរិកដូណាល់ ត្រាំ បាននិយាយកាលពីថ្ងៃសៅរ៍ថា ជំនួបនេះ នឹងមានរយៈពេល២នាទី។ ទៅជាយ៉ាងណាក៏ដោយ ការពិភាក្សាជាលក្ខណៈឯកជនរបស់លោកត្រាំជាមួយគីម ជុងអ៊ុន មានរយៈពេល៥០នាទី ដែលបានក្លាយទៅជាជំនួបកំពូលឥតគ្រោងទុកមួយ។
នៅពេលដែលប្រធានាធិបតីត្រាំ ចេញពីជំនួបនោះ លោកបានប្រកាសថា លោកនិងគីម ជុងអ៊ុន បានព្រមព្រៀងគ្នាបង្កើតក្រុមមួយដើម្បីចាប់ផ្តើមការពិភាក្សាថ្នាក់ការ ងារឡើងវិញ។
ប្រធានាធិបតីត្រាំ និយាយថា «ក្រុមការងារនោះ នឹងជួបគ្នានៅរយៈពេលបីបួនសប្តាហ៍បន្ទាប់ទៀត ហើយពួកគេ នឹងចាប់ផ្តើមដំណើរការពិភាក្សាយើង នឹងឃើញអ្វីដែលនឹងកើតមានឡើង។ សន្ទុះនៃការចរចាមិនមែនជាគោលបំណងទេ យើងចង់បានកិច្ចព្រមព្រៀងធំទូលាយនិងល្អមួយ»។
នេះជាជំនួបលើកទី៣រវាងគីម ជុងអ៊ុននិងប្រធានាធិបតីត្រាំ បន្ទាប់ពីជំនួបក្នុងប្រទេសសិង្ហបូរីកាលពីខែមិថុនាឆ្នាំទៅហើយនឹងក្នុងប្រទេសវៀតណាមកាលពីខែកុម្ភៈ។ ទោះជាយ៉ាងណាក៏ដោយ ជំនួបកំពូលនៅតំបន់គ្មានយោធា(DMZ) បានបង្កើននូវក្តីសង្ឃឹមពីការពិភាក្សាអាវុធនុយក្លែអ៊ែរឡើងវិញ គេមិនទាន់ដឹងច្បាស់នៅឡើយថាតើមានការជឿនលឿនប៉ុន្មានទេ៕
