ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

លោក ដូណាល់ ត្រាំ លើក​សរសើរ​កំណើន​សេដ្ឋកិច្ច​អាមេរិក


លោក​ប្រធានាធិបតី​ ដូណាល់ ត្រាំ ថ្លែង​ទៅ​កាន់​អ្នក​កាសែត​នៅ​ពេល​ត្រឡប់​មក​ដល់​សេតវិមាន​វិញ​កាលពិ​ថ្ងៃទី២៦ ខែមករា ឆ្នាំ២០១៨​ បន្ទាប់​ពី​ចូលរួម​ក្នុង​វេទិកា​សេដ្ឋកិច្ច​ពិភពលោក នៅ​ក្នុង​ក្រុង Davos ប្រទេស​ស្វ៊ីស។

លោក​ប្រធានាធិបតី​អាមេរិក ដូណាល់ ត្រាំ កាល​ពី​ថ្ងៃ​អាទិត្យ បាន​លើកសរសើរ​អំពី​ការ​បន្ត​កើនឡើង​សេដ្ឋកិច្ច​អាមេរិក ដោយ​និយាយ​ថា សេដ្ឋកិច្ច​អាមេរិក​បាន​ប្រសើរឡើងជាង​ពេល​ណាៗ​ទាំងអស់​ក្នុង​រយៈពេល​ជាច្រើន​ទសវត្សរ៍​មក​នេះ។ ​

លោក ត្រាំ បាន​និយាយ​នៅ​ក្នុង​បណ្តាញ​សង្គម Twitter ថា «ជំនួញ​កំពុង​តែ​ត្រឡប់​មក​អាមេរិក​វិញ ដែល​មិន​ធ្លាប់​មាន​ពី​មុន​មក​នោះ​ទេ»។ នេះ​ទំនង​ជា​នឹង​ក្លាយ​ជា​ប្រធានបទ​នៃ​ការ​ធ្វើ​សុន្ទរកថា​អំពី​បញ្ហា​ប្រទេសជាតិ​របស់​លោក​នៅ​ថ្ងៃ​អង្គារ​នេះ។ លោក​បាន​បន្ថែម​ថា «ភាព​គ្មាន​ការងារ​ធ្វើ​គឺ​ធ្លាក់​ចុះ។ យើង​កំពុង​តែ​ដើរ​តាម​ផ្លូវ​ត្រូវ»។

លោក​បាន​ថ្លែង​ថា «ជា​ឧទាហរណ៍ ក្រុមហ៊ុន Chrysler កំពុង​តែ​ចាកចេញ​ពី​ប្រទេស​ម៉ិកស៊ិក ហើយ​ត្រឡប់​មក​កាន់​អាមេរិក​វិញ» ដែល​នេះ​ជា​ការ​និយាយ​បំផ្លើស​ទៅ​លើ​ផែនការ​ពង្រីក​ជំនួញ​របស់ក្រុមហ៊ុន Chrysler។ ក្រុមហ៊ុន Fiat Chrysler ដែល​ជា​ក្រុមហ៊ុន​ផលិត​រថយន្ត​ធំ​បំផុត​ទី​៨​នៅ​លើ​ពិភពលោក​និយាយ​ថា ខ្លួន​កំពុង​តែ​វិនិយោគ​ប្រាក់​ចំនួន​១ពាន់​លាន​ដុល្លារ ដើម្បី​ផលិត​រថយន្ត​ pickup នៅ​ក្នុង​រដ្ឋ Michigan សហរដ្ឋអាមេរិក ដោយ​បាន​ផ្លាស់ប្ដូរ​ការ​ផលិត​ពី​ប្រទេស​ម៉ិកស៊ិក​មក ប៉ុន្តែ​ក្រុមហ៊ុន​នេះ​មិន​បាន​កាត់​បន្ថយ​ការងារ​ផលិត​រថយន្ត​នៅ​ក្នុង​ប្រទេស​ម៉ិកស៊ិក​នោះ​ទេ។

អត្រា​គ្មាន​ការងារ​ធ្វើ​នៅ​អាមេរិក​បាន​នៅ​ស្ថេរ​ក្នុង​អត្រា ៤,១% ក្នុង​រយៈពេល​បី​ខែ​ចុងក្រោយ​នេះ ដែល​នេះ​ជា​តួលេខ​ទាប​បំផុត​ក្នុង​រយៈពេល​១៧​ឆ្នាំ។ សេដ្ឋកិច្ច​អាមេរិក​ដែល​ជា​សេដ្ឋកិច្ច​ធំ​បំផុត​នៅ​ក្នុង​ពិភពលោក កើនឡើង​២,៣%កាល​ពី​ឆ្នាំ​មុន​ ដែល​ជា​ឆ្នាំ​ទី​មួយ​ក្នុង​តំណែង​ជា​ប្រធានាធិបតី​របស់​លោក ត្រាំ។ អត្រា​នេះ​កើនឡើង​ពី​ឆ្នាំ​២០១៦ ដែល​មាន​អត្រា​ត្រឹម​តែ​១,៥​%​ប៉ុណ្ណោះ៕

XS
SM
MD
LG