នៅក្នុងការការពារដ៏ខ្លាំងមួយដល់គោលនយោបាយ«គិតប្រទេសអាមេរិកទីមួយ» លោកប្រធានាធិបតីសហរដ្ឋអាមេរិក ដូណាល់ ត្រាំ បានប្រាប់វេទិកាពាណិជ្ជកម្មនិងនយោបាយសាកលលោកថា ពិភពលោកនឹងទទួលបានប្រយោជន៍ពីសេដ្ឋកិច្ចសហរដ្ឋអាមេរិកហើយលោកប្រធានាធិបតីបានអញ្ជើញប្រទេសផ្សេងៗទៀតឲ្យចូលរួមជាមួយលោក។
លោកប្រធានាធិបតីសហរដ្ឋអាមេរិក ដូណាល់ ត្រាំបាននិយាយនៅក្នុងសុន្ទរកថាចំនួន១៥នាទីទៅកាន់ការបិទសម័យប្រជុំរបស់វេទិកាសេដ្ឋកិច្ចសាកលលោកក្នុងក្រុងដាវ៉ូសប្រទេសស្វ៊ីសថា «នៅពេលដែលសហរដ្ឋអាមេរិករីកលូតលាស់ ពិភពលោកក៏រីកលូតលាស់ដែរ»។
លោកប្រធានាធិបតីត្រាំមានប្រសាសន៍ទៀតថា៖ «ការរីកលូតលាស់របស់ប្រទេសអាមេរិកបានបង្កើតការងាររាប់មិនអស់នៅជុំវិញពិភពលោកហើយយុទ្ធនាការសម្រាប់ការច្នៃប្រឌិតនិងការបញ្ចូលរបៀបថ្មីនៅក្នុងសហរដ្ឋអាមេរិកបាននាំឲ្យរកឃើញដ៏សំខាន់ដែលបានជួយមនុស្សនៅគ្រប់ទីកន្លែងឲ្យរស់នៅកាន់តែមានវិបុលភាពនិងសុខភាពកាន់តែខ្លាំងឡើង»។
លោកបាននិយាយថា៖ «ប្រទេសអាមេរិកបើកចំហសម្រាប់ការធ្វើពាណិជ្ជកម្មហើយយើងចង់ប្រកួតប្រជែងម្តងទៀត»។
ដោយមិននិយាយចំពោះប្រទេសចិន លោកប្រធានាធិបតីបាននិយាយតម្រង់ពីសកម្មភាពរបស់រដ្ឋាភិបាលក្រុងប៉េកាំង ដោយបានព្រមានថា រដ្ឋាភិបាលរបស់លោកមិនអាចធ្វើមិនដឹងឮដល់ការលួចកម្មសិទ្ធិបញ្ញារបស់សហរដ្ឋអាមេរិកហើយនឹងការជ្រៀតជ្រែកសេដ្ឋកិច្ចដែលមានការផ្តល់ប្រាក់ពីរដ្ឋនោះទេ។
លោកប្រធានាធិបតីក៏បានធ្វើការអង្វរករដល់មេដឹកនាំដែលស្ថិតនៅក្នុងជំនួបនោះឲ្យធ្វើការជាមួយសហរដ្ឋអាមេរិកកាន់តែខ្លាំងឡើងលើគោលដៅសន្តិសុខរួម រួមមានការផ្តួលក្រុមរដ្ឋឥស្លាម ដាក់ការគៀបសង្កត់យ៉ាងខ្លាំងដើម្បីធ្វើឲ្យឧបទ្វីបកូរ៉េគ្មានអាវុធនុយក្លេអ៊ែរហើយនឹងប្រយុទ្ធប្រឆាំងអំពើភេរវកម្មក្នុងទម្រង់គ្រប់បែបទាំងអស់៕
