ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

លោក Trump៖ ​លោក Kavanaugh ជា «សុភាព​បុរស​ដ៏​ឆ្នើម ដែលមាន​កេរ្តិ៍​ឈ្មោះ​ល្អ​ប្រសើរ»


លោក Brett Kavanaugh ផ្តល់​សក្ខីកម្ម​នៅ​ក្នុង​សវនាការ​មួយ​របស់​គណៈកម្មាធិការ​យុត្តិធម៌​របស់​ព្រឹទ្ធសភា​នៅ​វិមាន​សភា Capitol Hill ក្នុង​រដ្ឋធានី​វ៉ាស៊ីនតោន កាលពី​ថ្ងៃទី៤ ខែកញ្ញា ឆ្នាំ២០១៨។

លោក​ប្រធានាធិបតី​ស.រ.អា. Donald Trump នៅ​តែ​បន្តគាំទ្រ​លោក​ Brett Kavanaugh ដែលលោក​បាន​តែងតាំង​ឱ្យ​កាន់តំណែង​ជា​ចៅក្រម​តុលាការ​កំពូលស.រ.អា.​ដោយ​លោក​បាន​ពណ៌នាលោក Kavanaugh នៅ​ក្នុង​ការ​ប្រមូល​ផ្តុំ​មួយ​នៅ​ក្រុង​ Las Vegas កាល​ពី​ថ្ងៃ​ព្រហស្បតិ៍​ថា​ជា «សុភាព​បុរស​ដ៏​ឆ្នើម​ម្នាក់​ដែល​មាន​កេរ្តិ៍​ឈ្មោះ​ល្អ​ប្រសើរ»។

លោក​ប្រធានាធិបតី​បាន​និយាយ​អំពីលោក​ Kavanaugh ថា​ «លោក​ជា​មនុស្ស​ល្អ​ម្នាក់»។ លោក​ Kavanaugh ប្រឈម​នឹង​ការ​ចោទប្រកាន់​ថា​លោក​បាន​រំលោភ​បំពាន​ផ្លូវ​ភេទ​លើ​ស្ត្រី​ម្នាក់​កាល​ពី​៣៦ឆ្នាំ​មុន​នេះ។​

ពួក​មេធាវី​របស់​ស្ត្រី​ដែល​បាន​ចោទ​ប្រកាន់លោក​ថា​បាន​រំលោភ​បំពាន​ផ្លូវ​ភេទ​លើ​អ្នកស្រី​និយាយ​ថា​អ្នកស្រី​ចង់​ឆ្លើយ​ជា​កសិណសាក្សី​នៅ​ចំពោះ​មុខ​គណៈកម្មាធិការ​មួយ​របស់​ព្រឹទ្ធសភា​នៅ​សប្តាហ៍​ក្រោយ ក៏ប៉ុន្តែ​ប្រសិន​បើ​មាន​ការ​ធានារ៉ាប់រង​ដល់​សុវត្ថិភាព​អ្នកស្រី។​

អ្នកស្រី​មេធាវី Debra Katz បាន​និយាយ​ថា​កូន​ក្តី​អ្នកស្រី​គឺ​អ្នកស្រី Christine Blasey Ford បាន​ទទូល​ការ​គំរាម​កំហែង​ដល់​ជីវិត​ ហើយ​ថា​អ្នកស្រី​ និង​គ្រួសារ​អ្នកស្រី​បាន​ត្រូវ​បង្ខំ​ឱ្យ​ចេញ​ពី​ផ្ទះ​ពួក​គេ​នៅ​ក្នុង​រដ្ឋ​ California។

ក៏​ប៉ុន្តែ​បើ​តាម​របាយការណ៍​នៃ​បណ្តាញ​ផ្សាយ​ព័ត៌មាន​ស.រ.អា. ​អ្នកស្រី​ Katz បាន​និយាយ​នៅ​ក្នុង​អ៊ីម៉ែល​មួយ​ទៅ​កាន់​គណៈកម្មាធិការ​តុលាការ​នៃ​ព្រឹទ្ធសភា​ស.រ.អា.​ថា​អ្នកស្រី​ Ford នៅ​តែ​ចង់ឆ្លើយ​ជា​កសិណ​សាក្សី​ «ប្រសិន​បើ​យើង​អាច​យល់ស្រប​គ្នាអំពី​លក្ខខណ្ឌ​ដែល​មាន​ភាព​យុត្តិធម៌ និង​ដែល​ធានារ៉ាប់រង​អំពី​សុវត្ថិភាព​អ្នកស្រី​ផង​ដែរ»។

លោក Chuck Grassley ប្រធាន​គណៈកម្មាធិការ​នេះ​ដែល​ជា​អ្នក​សាធារណរដ្ឋ​បាន​កំណត់​ថា​នឹង​បើក​ធ្វើ​សវនាការ​នេះនៅ​ថ្ងៃ​ចន្ទ​ក្រោយ​សម្រាប់​ឱ្យ​អ្នកស្រី​ Ford និង​លោក Kavanaugh ចេញ​បង្ហាញ​ខ្លួន​ជា​សាធារណៈ​ដើម្បី​និយាយ​រឿង​ពួក​គេ៕

XS
SM
MD
LG