ប្រធានាធិបតីជាប់ឆ្នោតលោក Donald Trump បានអញ្ជើញប្រធានាធិបតីចិនលោក Xi Jinping និងមេដឹកនាំប្រទេសដទៃទៀតឱ្យចូលរួមក្នុងពិធីស្បថចូលកាន់តំណែងរបស់លោកនៅថ្ងៃទី២០ មករា ប៉ុន្តែមិនទាន់ច្បាស់នៅឡើយថាមេដឹកនាំរូបណាខ្លះនឹងចូលរួមក្នុងពិធីដែលនឹងធ្វើឡើងនៅវិមានសភាអាមេរិកនេះនៅឡើយទេ។
អ្នកនាំពាក្យក្រុមរៀបចំការចូលកាន់តំណែងរបស់លោក Trump គឺអ្នកស្រី Karoline Leavitt បានប្រាប់បណ្តាញទូរទស្សន៍ Fox News ថា «មិនទាន់ច្បាស់» ថាតើលោក Xi នឹងចូលរួមតាមការអញ្ជើញរបស់លោក Trump ដែលបានអញ្ជើញលោកកាលពីដើមខែវិច្ឆិកា មិនយូរប៉ុន្មានបន្ទាប់ពីលោក Trump បានឈ្នះអ្នកស្រីអនុប្រធានាធិបតី Kamala Harris ដើម្បីកាន់តំណែងក្នុងសេតវិមាននៅ៤ឆ្នាំខាងមុខទៀត។
អ្នកស្រីមិនបានប្រាប់ឈ្មោះមេដឹកនាំពិភពលោកដទៃទៀតដែលត្រូវបានអញ្ជើញនោះ ទេ។ ជាទូទៅអគ្គរដ្ឋទូតបរទេសនានាដែលកាន់តំណែងនៅរដ្ឋធានីវ៉ាស៊ីនតោននិងមន្ត្រីការទូតដទៃទៀតបានធ្វើជាសាក្សីនៃការផ្ទេរអំណាចប្រធានាធិបតីសហរដ្ឋអាមេរិកប្រកបដោយសន្តិវិធី ប៉ុន្តែមិនមែនប្រមុខរដ្ឋនោះទេ។ កំណត់ត្រារបស់ក្រសួងការបទេសតាំងពីឆ្នាំ១៨៧៤បង្ហាញថា មិនដែលមានមេដឹកនាំបរទេសធ្លាប់ចូលរួមពិធីស្បថចូលកាន់តំណែងរបស់ប្រធានាធិបតីសហរដ្ឋអាមេរិកនោះទេ។
ប៉ុន្តែអ្នកស្រី Leavitt បានថ្លែងថាការអញ្ជើញមេដឹកនាំនានាមកចូលរួមក្នុងពិធីធ្វើឡើងនៅពេលថ្ងៃត្រង់នៅខាងក្រៅនៅ៦សប្តាហ៍ទៀតគឺជា«ឧទាហរណ៍មួយបង្ហាញថាលោកប្រធានាធិបតី Trump បង្កើតការសន្ទនាជាមួយមេដឹកនាំដទៃទៀតមិនមែនតែជាមួយសម្ព័ន្ធមិត្តប៉ុណ្ណោះទេ ប៉ុន្តែសូម្បីតែសត្រូវនិងគូប្រជែងរបស់យើងផងដែរ។ លោក Trump សុខចិត្តនិយាយជាមួយគ្រប់គ្នា ហើយលោកនឹងតែងតែដាក់ប្រយោជន៍អាមេរិកមុនគេ»៕
