នាយកទីភ្នាក់ងារ FBI លោក Christopher Wray ថ្លែងកាលពីថ្ងៃពុធថា លោកគ្រោងនឹងលាលែងពីតំណែងនៅចុងអាណត្តិលោកប្រធានាធិបតី Joe Biden នៅខែមករាខាងមុខ។ សេចក្តីប្រកាសនេះធ្វើឡើងមួយសប្តាហ៍កន្លះបន្ទាប់ពីលោកប្រធានាធិបតីជាប់ឆ្នោត Donald Trump បានប្រកាសពីចេតនារបស់លោកក្នុងការតែងតាំងលោក Kash Patel ដែលជាអ្នកស្មោះស្ម័គ្រជាមួយលោកឱ្យកាន់មុខតំណែងនេះ។
នៅឯកិច្ចប្រជុំមួយ លោក Wray បានថ្លែងថា លោកនឹងចុះចេញពីតំណែង«បន្ទាប់ពីលោកបានពិចារណាយ៉ាងប្រយ័ត្នប្រយែងអស់រយៈពេលជាច្រើនសប្តាហ៍»។
ចេតនាលាលែងពីតំណែងរបស់លោក Wray មិនមែនជារឿងគួរឱ្យភ្ញាក់ផ្អើលនោះទេ ដោយសារលោក Trump បានជ្រើសរើសលោក Patel ឱ្យកាន់តួនាទីនេះក្នុងរដ្ឋបាលថ្មីរបស់លោក។
លោក Wray ត្រូវបានតែងតាំងក្នុងឆ្នាំ២០១៧ដោយលោក Trump ហើយបានចាប់ ផ្តើមកាន់តួនាទីដែលមានអាណត្តិ១០ឆ្នាំនេះ ដែលជារយៈមួយដើម្បីការពារទីភ្នាក់ងារនេះពីឥទ្ធិពលនយោបាយនៃការផ្លាស់ប្តូររដ្ឋបាល បន្ទាប់ពីលោក Trump បានបណ្តេញលោក James Comeyចេញពីតំណែងដែលពេលនោះជានាយកទីភ្នាក់ងារ FBI នេះ។
លោក Trump បានបង្ហាញការខឹងសម្បាររបស់លោកជាច្រើនលើក រួមទាំងក្រោយពេលលោកធ្វើសក្ខីកម្មដល់សភាកាលពីខែកញ្ញា។ ប៉ុន្តែលោកនាយកដែលមានសម្តីទន់ភ្លន់នេះកម្រចេញមកប្រឈមដាក់សេតវិមានជាសាធារណៈណាស់៕
