ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

លោក Trump ថាគណបក្សប្រជាធិបតេយ្យនឹងមិនខ្វល់ពីប្រទេសអ៊ីស្រាអែល ប្រសិនបើឈ្នះការបោះឆ្នោតនៅឆ្នាំក្រោយ


ប្រធានាធិបតីសហរដ្ឋអាមេរិក Donald Trump ថ្លែងនៅក្នុងកិច្ចប្រជុំសម្ព័ន្ធសាសនាយូដា គណបក្ស សាធារណរដ្ឋកាលពីថ្ងៃ០៦ មេសា ឆ្នាំ ២០១៩។

ប្រធានាធិបតីអាមេរិកលោក Donald Trump បានព្រមាន កាលពីថ្ងៃសៅរ៍ម្សិលមិញថា ប្រសិនបើគណបក្សប្រជាធិបតេយ្យឈ្នះការបោះឆ្នោតនៅឆ្នាំ ២០២០ នោះពួកគេនឹងមិនយកចិត្តទុកដាក់ចំពោះប្រទេសអ៊ីស្រាអែលនោះទេ។

លោកថ្លែងដូច្នេះ នៅពេលដែលលោកលើកឡើងពីសកម្មភាពរបស់លោក ដែលគាំទ្រប្រទេសអ៊ីស្រាអែល ដើម្បីទាក់ទាញអ្នកបោះឆ្នោតដែលជាជនជាតិជ្វីហ្វឲ្យបោះឆ្នោតឲ្យលោកធ្វើជាប្រធានាធិបតីម្ដងទៀតនៅឆ្នាំក្រោយ។

ដោយថ្លែងនៅឯកិច្ចប្រជុំប្រចាំឆ្នាំនៃអង្គការសម្ព័ន្ធភាពជនជាតិជ្វីហ្វសាធារណរដ្ឋ លោក Trump បានសរសើរអំពីវិធានការរបស់លោកនៅក្នុងការប្ដូរទីតាំងស្ថានទូតអាមេរិកនៅប្រទេសអ៊ីស្រាអែលពីទីក្រុង Tel Aviv ទៅទីក្រុង Jerusalem និងសរសើរអំពីការទទួលស្គាល់កាលពីខែមុននូវអធិបតេយ្យភាពរបស់អ៊ីស្រាអែលលើតំបន់ជម្លោះ Golan Heights ដែលជាតំបន់វាលទំនាបយុទ្ធសាស្ត្រមួយ ដែលអ៊ីស្រាអែលបានដណ្ដើមយកពីប្រទេសស៊ីរីកាលពីឆ្នាំ ១៩៦៧។

អង្គការនេះគាំទ្រដោយលោក Sheldon Adelson ដែលជាអ្នកឧបត្ថម្ភថវិកាដ៏ធំដល់គណបក្សសាធារណរដ្ឋ។ អង្គការនេះបានគាំទ្រយុទ្ធនាការឃោសនាបោះឆ្នោតរបស់លោក Trump កាលពីឆ្នាំ ២០១៦ និងត្រៀមចំណាយថវិការាប់លានដុល្លារទៀតជួយដល់យុទ្ធនាការឃោសនាបោះឆ្នោតរបស់លោក Trump នៅឆ្នាំ ២០២០ ខាងមុខនេះ។

លោក Trump និយាយដូច្នេះថា៖ «ខ្ញុំដឹងថា អង្គការសម្ព័ន្ធភាពជនជាតិជ្វីហ្វសាធារណរដ្ឋនឹងជួយគណបក្សរបស់ពួកយើងឲ្យទទួលបានជោគជ័យជាប្រវត្តិសាស្ត្រម្ដងទៀត។ យើងត្រូវការអ្នកគាំទ្រគណបក្សសាធារណរដ្ឋបន្ថែមទៀត។ ប្រឹងឡើង យើងអាចឈ្នះអ្វីៗទាំងអស់»។

អ្នកបោះឆ្នោតជាជនជាតិជ្វីហ្វនៅក្នុងសហរដ្ឋអាមេរិកជាយូរមកហើយបានគាំទ្រខ្លាំងក្លាលើគណបក្សប្រជាធិបតេយ្យ ហើយជារឿយៗមានទស្សនៈបែបសេរីនិយម ប៉ុន្តែគណបក្សសាធារណរដ្ឋសង្ឃឹមថានឹងទាក់ទាញបានការគាំទ្រច្រើនជាងមុននៅក្នុងការបោះឆ្នោតឆ្នាំក្រោយ៕

XS
SM
MD
LG