នៅក្នុងការសន្ទនាតាមទូរស័ព្ទមួយកាលពីថ្ងៃសៅរ៍ ប្រធានាធិបតីសហរដ្ឋអាមេរិកលោក Donald Trump បានជំរុញមន្ត្រីរៀបចំការបោះឆ្នោតនៅក្នុងរដ្ឋ Georgia ឲ្យស្វែងរកសន្លឹកឆ្នោតឲ្យបានគ្រប់គ្រាន់ឲ្យលោក ដើម្បីអាចប្រែក្រឡាស់លទ្ធផលបោះឆ្នោតនៅក្នុងរដ្ឋនោះបាន ដែលកន្លងមក លទ្ធផលដែលបានប្រកាសជាផ្លូវការបានបង្ហាញថា លោក Joe Biden ជាអ្នកឈ្នះ។
នៅក្នុងសារសំឡេងមួយដែលកាសែត Washington Post បានទទួលនិងបានផ្សព្វផ្សាយកាលពីរសៀលថ្ងៃអាទិត្យ លោកប្រធានាធិបតី Trump បានប្រាប់លេខាធិការរដ្ឋ Georgia លោក Brad Raffensperger ដែលជាមន្ត្រីកំពូលរៀបចំការបោះឆ្នោត ថា៖ «អ្វីដែលខ្ញុំចង់បានគឺស្វែងរកសំឡេងឆ្នោតចំនួន ១១.៧៨០ សំឡេង ដែលលើសពីអ្វីដែលយើងមានចំនួនមួយសំឡេង ពីព្រោះយើងបានឈ្នះឆ្នោតនៅក្នុងរដ្ឋនេះ»។
នៅក្នុងការសន្ទនាតាមទូរស័ព្ទរយៈពេលមួយម៉ោងនេះ លោក Trump ជួនកាលសរសើរលោក Raffensperger ហើយជួនកាលបានបញ្ជោរលោកនិងលោក Ryan Germany ដែលជាអគ្គមេធាវីនៃការិយាល័យរបស់លោក Raffensperger។
កន្លងមក លោក Trump បានជំទាស់ថា ការរាប់សន្លឹកឆ្នោតដាច់ដោយឡែកពីគ្នា ៣ លើកនៅក្នុងរដ្ឋ Georgia ដែលបានបង្ហាញថា លោក Biden បានឈ្នះ គឺមិនត្រឹមត្រូវ។
កាលពីថ្ងៃអាទិត្យ លោក Trump បានសរសេរនៅលើ Twitter ថា៖ «ខ្ញុំបាននិយាយទៅកាន់លេខាធិការរដ្ឋ Georgia លោក Brad Raffensperger អំពីស្រុក Fulton និងអំពីការបន្លំការបោះឆ្នោតនៅក្នុងរដ្ឋ Georgia។ លោកមិនមានឆន្ទៈ ឬក៏អាចឆ្លើយសំណួរមួយចំនួនដូចជាសំណួរអំពីគម្រោងលួចសន្លឹកឆ្នោត ការបំផ្លាញសន្លឹកឆ្នោត អ្នកបោះឆ្នោតក្រៅរដ្ឋ និងសំណួរផ្សេងៗទៀតនោះទេ»។
នៅប៉ុន្មានម៉ោងក្រោយមក បន្ទាប់ពីលោក Trump បង្ហោះសារនេះ លោក Raffensperger បានឆ្លើយតបថា៖ «លោកប្រធានាធិបតី Trump ជាទីគោរព! អ្វីដែលលោកកំពុងនិយាយគឺមិនពិតទេ។ ការពិតនឹងបង្ហាញឡើង»៕
