លោកប្រធានាធិបតីអាមេរិក ដូណាល់ ត្រាំ កាលពីថ្ងៃចន្ទបានដកតំណែងលោក Anthony Scaramucci ដែលជាប្រធានផ្នែកទំនាក់ទំនងរបស់លោក រយៈពេលមួយសប្តាហ៍បន្ទាប់ពីអ្នកជំនាញខាងហិរញ្ញវត្ថុនៅញូវយ៉ករូបនេះ បានចាប់ផ្តើមកាន់តំណែងសំខាន់មួយនេះនៅក្នុងសេតវិមាន។
លោក ត្រាំ បានបណ្តេញលោក Scaramucci អាយុ៥៣ឆ្នាំចេញពីតំណែង ដោយយោងតាមសំណើរបស់លោក John Kelly ដែលជានាយខុទ្ទកាល័យសេតវិមានថ្មី។ នេះបើយោងតាមការប្រាប់ឲ្យដឹងរបស់ក្រុមមន្ត្រីទៅកាន់ប្រព័ន្ធផ្សព្វផ្សាយអាមេរិក។
សេតវិមានបានប្រកាសជាផ្លូវការថា លោក Scaramucci ចាកចេញដើម្បីឲ្យលោក Kelly អាចបំពេញការងារប្រចាំថ្ងៃក្នុងនាមជាបុគ្គលិកសេតវិមាន។
លោក Scaramucci មិនសូវមានសាធារណជនស្គាល់នោះទេ មុនពេលដែលលោកកាន់តំណែងក្នុងជួរនយោបាយក្នុងរដ្ឋធានីវ៉ាស៊ីនតោន កាលពីពាក់កណ្តាលខែកក្កដាកន្លងទៅនេះ។
លោកScaramucci ត្រូវបានចុះផ្សាយលើកាសែតទំព័រមុខយ៉ាងឆាប់រហ័ស តាមរយៈសម្តីបែបបាតផ្សារនិងពាក់ព័ន្ធនឹងផ្លូវភេទទៅកាន់អ្នកឆ្លើយឆ្លងព័ត៌មានរបស់ទស្សនាវដ្តី The New Yorker ដែលទស្សនាវដ្តីនេះបានបោះពុម្ពផ្សាយកាលពីសប្តាហ៍មុន។
លោក Scaramucci ប្រឆាំងនឹងទីប្រឹក្សាសេតវិមានដ៏សំខាន់ពីរនាក់របស់លោក ត្រាំ គឺលោក Reince Priebus ដែលលោក ត្រាំ បានដកតំណែងជានាយខុទ្ទកាល័យកាលពីថ្ងៃសុក្រ និងបានតែងតាំងលោក Kelly ជំនួសវិញ ហើយម្នាក់ទៀតគឺលោក Stephen Bannon ដែលជាប្រធានយុទ្ធសាស្ត្ររបស់លោកប្រធានាធិបតី៕
