ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

សហរដ្ឋ​អាមេរិក និង​តួកគី​ឯកភាព​គ្នា​សម្របសម្រួល​ការ​ដក​កងទ័ព​អាមេរិក​ចេញ​ពី​ប្រទេស​ស៊ីរី


លោក​ប្រធានាធិបតី​តួកគី Recep Tayyip Erdogan ថ្លែង​នៅ​ក្នុង​សន្និសីទ​កាសែត​មួយ​នៅ​វិមាន​ប្រធានាធិបតី ក្នុង​ក្រុង​អង់ការ៉ា កាលពី​ថ្ងៃទី២០ ខែធ្នូ ឆ្នាំ២០១៨។

ប្រធានាធិបតី​អាមេរិក​លោក Donald Trump បាន​និយាយ​ថា ប្រទេស​តួកគី​នឹង​កម្ចាត់​ពួក​សកម្ម​ប្រយុទ្ធ​រដ្ឋ​ឥស្លាម​ដែល​សេសសល់​នៅ​ក្នុង​ប្រទេស​ស៊ីរី​ចេញ បន្ទាប់ពី​សហរដ្ឋ​អាមេរិក​ដក​កង​ទ័ព​របស់​ខ្លួន​ចេញ។

នៅ​ក្នុង​សារ​នៅ​លើ Twitter កាល​ពី​ថ្ងៃ​អាទិត្យ​ម្សិលមិញ លោក Trump បាន​និយាយ​ដូច្នេះ​ថា ប្រធានាធិបតី​តួកគី​លោក Recep Tayyip Erdogan «បាន​ប្រាប់​ខ្ញុំ​យ៉ាង​ម៉ឺងម៉ាត់​ថា លោក​នឹង​កម្ចាត់​ពួក​សកម្ម​ប្រយុទ្ធ ISIS ដែល​សេសសល់​នៅ​ក្នុង​ប្រទេស​ស៊ីរី។ លោក​គឺ​ជា​មនុស្ស​ម្នាក់​ដែល​អាច​ធ្វើ​រឿង​នេះ​បាន ហើយ​ចំណុច​មួយ​ទៀត គឺ​ប្រទេស​តួកគី​ជា​ប្រទេស​ជិត​ខាង​ស៊ីរី‍»។

លោក Trump បាន​បន្ថែម​ថា៖ «ទាហាន​របស់​យើង​នឹង​ត្រឡប់​មក​កាន់​មាតុភូមិ​វិញ‍»។

ការិយាល័យ​របស់​លោក Erdogan បាន​បញ្ជាក់​នៅ​ក្នុង​សេចក្ដី​ប្រកាស​មួយ​ថា លោក Erdogan និង​លោក Trump បាន​ឯកភាព​គ្នា «ធានា​ឲ្យ​មាន​នូវ​ការ​សម្របសម្រួល​រវាង​យោធា មន្ត្រី​ការទូត និង​មន្ត្រី​ផ្សេងៗ​ទៀត​នៃ​ប្រទេស​របស់​លោក​ទាំង​ពីរ ដើម្បី​ជៀសវាង​មិន​ឲ្យ​ធ្លាក់​ចូល​ក្នុង​ស្ថានការណ៍​មួយ​ដែល​រដ្ឋាភិបាល​គ្មាន​អំណាច​ពិត​ប្រាកដ ដែល​ករណី​នេះ​អាច​កើត​ឡើង បន្ទាប់ពី​មាន​ការ​រំលោភ​បំពាន​ណា​មួយ​លើ​ដំណាក់កាល​ដក​ទ័ព និង​ដំណាក់កាល​អន្តរកាល​នៅ​ក្នុង​ប្រទេស​ស៊ីរី‍»។

កាល​ពី​សប្ដាហ៍​មុន លោក Erdogan បាន​និយាយ​ថា ប្រទេស​តួកគី​ផ្អាក​ប្រតិបត្តិការ​ប្រឆាំង​នឹង​កង​កម្លាំង Kurd នៅ​ក្នុង​ប្រទេស​ស៊ីរី បន្ទាប់ពី​លោក Trump បាន​សម្រេច​ដក​កង​ទ័ព​អាមេរិកាំង​ចេញ។

កន្លង​មក លោក Trump បាន​ប្រកាស​ថា ពួក​ជ្រុល​និយម​ក្រុម​រដ្ឋ​ឥស្លាម​បាន​ទទួល​បរាជ័យ​ហើយ និង​បាន​និយាយ​ថា វា​ដល់​ពេល​ដែល​ប្រទេស​ជា​សមាជិក​ដទៃ​ទៀត​នៃ​សម្ព័ន្ធ​ភាព​ប្រឆាំង​ក្រុម​ភេរវជន​រដ្ឋ​ឥស្លាម ចាត់​វិធានការ​បោស​សម្អាត​ពួក​ភេរវជន ដែល​នៅ​សេសសល់៕

XS
SM
MD
LG