រដ្ឋបាលរបស់ប្រធានាធិបតីសហរដ្ឋអាមេរិកដូណាល់ ត្រាំ បានចាត់វិធានការកាលពីថ្ងៃអង្គារដើម្បីបញ្ចប់កម្មវិធីដែលការពារជនអន្តោប្រវេសន៍ក្មេងៗដែលគ្មានក្រដាសស្នាមចំនួន៨សែននាក់កុំឲ្យបញ្ជូនទៅកាន់ប្រទេសរបស់ខ្លួនវិញ ក៏ប៉ុន្តែ បានផ្តល់រយៈពេល៦ខែឲ្យសភាចាត់វិធានការ ប្រសិនបើសភាចង់បន្តអនុញ្ញាតឲ្យពួកគេស្ថិតនៅក្នុងសហរដ្ឋអាមេរិកជាច្រើនឆ្នាំទៀតបន្ទាប់ពីឪពុកម្តាយរបស់ពួកគេបានយកពួកគេខុសច្បាប់ចូលក្នុងសហរដ្ឋអាមេរិកនោះ។
លោកប្រធានាធិបតីត្រាំបានយល់ព្រមការសម្រេចចិត្តនេះ ក៏ប៉ុន្តែបានឲ្យលោក Jeff Sessions រដ្ឋមន្ត្រីក្រសួងយុត្តិធម៌ប្រកាសការសម្រេចចិត្តអំពីការផ្លាស់ប្តូរគោលនយោបាយប្រកបដោយភាពចម្រូងចម្រាសនេះនៅមុខម៉ាស៊ីនថត។លោករដ្ឋមន្ត្រីយុត្តិធម៌ Sessions បានបញ្ចប់បទបញ្ជាប្រធានាធិបតីដែលមានអាយុ៥ឆ្នាំរបស់លោកប្រធានាធិបតីអូបាម៉ាដែលបានបង្កើតកម្មវិធីការមកដល់របស់កូនក្មេងដែលមានឪពុកម្តាយខុសច្បាប់ចូលក្នុងសហរដ្ឋអាមេរិកដែលគេស្គាល់ជាអក្សរកាត់ថា DACA។
ក្នុងសេចក្តីថ្លែងការណ៍ដែលបានចេញផ្សាយក្រោយមក លោកប្រធានាធិបតីត្រាំបាននិយាយថា «លោកមិនពេញចិត្តការធ្វើបាបកូនក្មេងដោយសារសកម្មភាពឪពុកម្តាយរបស់ពួកគេ ពួកគេភាគច្រើនជាមនុស្សពេញវ័យ។ ក៏ប៉ុន្តែ យើងត្រូវតែទទួលស្គាល់ដែរថា យើងជាប្រទេសជាតិមួយដែលផ្តល់ឱកាស ពីព្រោះតែយើងជាប្រទេសមួយដែលគោរពច្បាប់។ ដូចដែលខ្ញុំបាននិយាយកាលពីពេលមុន យើងនឹងដោះស្រាយបញ្ហាច្បាប់ DACA នេះទៅតាមមេត្តា ករុណា និងចិត្តប្រោសប្រណី ក៏ប៉ុន្តែតាមរយៈដំណើរការប្រជាធិបតេយ្យដោយការគោរពច្បាប់។
កម្មវិធីនេះអនុញ្ញាតឲ្យយុវជនក្មេងៗដែលបានចូលក្នុងសហរដ្ឋអាមេរិកនៅពេលដែលពួកគេមានអាយុ៦ឆ្នាំ ភាគច្រើននៃកូនក្មេងទាំងនោះមកពីប្រទេសម៉ិកស៊ិក និងប្រទេសនានានៅតំបន់អាមេរិកកណ្តាលធ្វើការ និងសិក្សានៅក្នុងសហរដ្ឋអាមេរិកហើយនិងបម្រើយោធា៕
