ការសម្រេចចិត្តរបស់ប្រធានាធិបតីជាប់ឆ្នោតអាមេរិក លោក ដូណាល់ ត្រាំ ក្នុងការដកចេញកិច្ចព្រមព្រៀងដៃគូពាណិជ្ជកម្មឆ្លងមហាសមុទ្រប៉ាស៊ីហ្វិក ឬហៅកាត់ថា TPP បានបោះបង់ចោលនូវកិច្ចព្រមព្រៀងពាណិជ្ជកម្មយ៉ាងច្រើនសន្ធឹកសន្ធាប់ ដែលជាគោលការណ៍គ្រឹះរបស់លោកប្រធានាធិបតី បារ៉ាក់ អូបាម៉ា ក្នុងការចូលទៅពាក់ព័ន្ធជាមួយនឹងបណ្តាប្រទេសនៅអាស៊ីឡើងវិញ។
លោក ត្រាំ និយាយថា ជំនួសឲ្យកិច្ចព្រមព្រៀងមួយដែលគ្រប់ដណ្តប់ពាណិជ្ជកម្មសាកលលោក៤០ភាគរយ លោកមានផែនការនឹងចរចាទៅលើកិច្ចព្រមព្រៀងម្តងមួយម្ដងមួយ ដែលផ្តល់ផលល្អជាងនេះដល់កម្មករជាពលរដ្ឋអាមេរិកាំង។ សម្រាប់ប្រទេសនៅក្នុងតំបន់អាស៊ី អ្នកវិភាគនិយាយថា ការបោះបង់ចោលកិច្ចព្រមព្រៀងនេះបើកឱកាសពាណិជ្ជកម្មថ្មីដល់ប្រទេសចិន ដែលមិនមែនជាសមាជិកនៃកិច្ចព្រមព្រៀង TPP នេះ។
ក្រុមអ្នកចរចាបានធ្វើការអស់រយៈពេល៧ឆ្នាំទៅលើកិច្ចព្រមព្រៀង TPP ដែលអ្នកគាំទ្រនិយាយថា នឹងធ្វើឲ្យមានពាណិជ្ជកម្មច្រើនជាងមុនសម្រាប់ប្រទេសទាំង១២ បង្កើនប្រាក់ចំណូលកម្មករ ការពារពិសេសដល់កម្មសិទ្ធិបញ្ញា ការពារសិទ្ធិកម្មករ និងការពារបរិស្ថានសាជីវកម្ម។ ក្រុមអ្នករិះគន់បានចោទប្រកាន់កិច្ចព្រមព្រៀង ដែលត្រូវបានចរចាគ្នាដោយសម្ងាត់នេះ ថាផ្តល់ផលប្រយោជន៍ហួសហេតុដល់សាជីវកម្មនៅទូទាំងសាកលលោក និងមានដាក់បញ្ចូលការដាក់កម្រិតទៅលើកម្មសិទ្ធិបញ្ញាយ៉ាងធ្ងន់ធ្ងរ៕
