លោកប្រធានាធិបតីស.រ.អាដូណាល់ ត្រាំបានឈានដល់ការប្រមាថតិះដៀលជា លក្ខណៈឯកជនតាមប្រព័ន្ធសង្គម Twitter ប្រឆាំងនឹងលោក ជេម ខូមី (James Comey) ដោយបានហៅលោកថាជាមនុស្សមិនស្មោះត្រង់ ជាជនទម្លាយការសម្ងាត់ និងជាជនភូតភរ ហើយនិងជានាយក FBI ដ៏អាក្រក់ជាងគេក្នុងប្រវត្តិសាស្ត្រ។
ដំណាលគ្នាដែរ លោក ខូមី បាននិយាយរិះគន់តបវិញដោយពាក្យចោទប្រកាន់នៅពេលថ្លែងប្រាប់បណ្តាញព័ត៌មាន ABC NEWS ថា៖
«ខ្ញុំមិនដឹងថាតើប្រធានាធិបតីស.រ.អាបច្ចុប្បន្នបាននៅជាមួយ ស្រីបេស្យាជាច្រើន ហើយនោមដាក់គ្នាទៅវិញទៅមក ក្នុងទីក្រុងមូស្គូ កាលពីឆ្នាំ២០១៣»។
នៅក្នុងសៀវភៅថ្មីរបស់លោក ដាក់ចំណងជើងថា «ភាពស្មោះត្រង់ខ្ពស់ជាង ឬ A Higher Loyalty» នោះ លោកខូមី បានពិពណ៌នាលោកប្រធានាធិបតីថា ជាមនុស្ស មិនអាចគ្រប់គ្រងខ្លួនឯងបានដោយសារតែការចោទប្រកាន់បែបបង្កជម្លោះនិងគ្មាន ភស្តុតាង របស់អ្នកស្រាវជ្រាវអង់គ្លេសម្នាក់ ដែលលោកស្រី គ្លីនតុនបានជួលក្នុង យុទ្ធនាការឃោសនាបោះឆ្នោតកាលពីឆ្នាំ២០១៦។ ហើយលោកខូមីនិយាយម្តងហើយម្តងទៀតថា លោក ត្រាំ បានដាក់សម្ពាធរូបលោកឲ្យចាត់វិធានការ ដែលផ្តល់ផលប្រយោជន៍ដល់លោកប្រធានាធិបតី។
លោកស្រី SARAH HUCKABEE SANDERS អ្នកនាំពាក្យសេតវិមានបានថ្លែងប្រាប់ បណ្តាញទូរទស្សន៍ ABC ប៉ុន្មានថ្ងៃមុននេះថា៖
«លោក James Comey គ្មានកេរ្តិ៍ឈ្មោះទេ ហើយលោកមិនគួរដឹកនាំស្ថាប័ន FBI តទៅទៀតដែរ។ នៅទីបំផុត ប្រធានាធិបតីនេះ នឹងត្រូវគេវាយតម្លៃលើបញ្ហាចំនួន២ គឺរឿងសេដ្ឋកិច្ចនិងសន្តិសុខជាតិ»។
លោក ត្រាំ បានកោតសរសើរលោក ខូមី កាលពីចុងឆ្នាំ២០១៦។
«លោកនាយក ខូមី ក្លាហានណាស់ ដើម្បីធ្វើឲ្យមានដំណើរការរឿង ដែលលោក បានធ្វើ»។
តិចជាង២សប្តាហ៍មុនពេលបោះឆ្នោត លោក ខូមីបានប្រកាសថា FBI ត្រូវបើកការ ស៊ើបអង្កេតឡើងវិញក្នុងសំណុំរឿងពាក់ព័ន្ធនឹងសកម្មភាពទិន្នន័យអ៊ីម៉ែលប៉ុន្មាន ឆ្នាំមុន របស់លោកស្រី ហ៊ីលឡឺរី គ្លីនតុន ដែលពេលនោះជាបេក្ខជនប្រធានាធិបតី ខាងគណបក្សប្រជាធិបតេយ្យ តែលោកខូមីបានសារភាពថាលោកបានធ្វើប្រតិបត្តិការស៊ើបអង្កេតតាមការសន្និដ្ឋានគ្មានការពិត។
លោក ខូមី បានថ្លែងប្រាប់ព័ត៌មាន ABC NEWS ទៀតថា៖
«ហេតុផលរបស់ខ្ញុំគឺថា លោកស្រីគ្លីនតុននឹងក្លាយជាប្រធានាធិបតីជាប់ឆ្នោត។ ហើយបើខ្ញុំលាក់រឿងនេះ មិនប្រាប់ពលរដ្ឋអាមេរិកាំងអំពីការស៊ើបអង្កេតរឿងអ៊ីម៉ែល នេះ លោកស្រី គ្លីនតុននឹងគ្មានភាពស្របច្បាប់ទេនៅពេលលោកស្រីជាប់ឆ្នោត»។
ជម្លោះរវាងលោកត្រាំ និង លោក ខូមី ជាថ្មី ហើយកាន់តែតានតឹងឡើងនេះ កើតឡើងដំណាលគ្នាដែលក្រុមសមាជិកព្រឹទ្ធសភាទាំងពីរគណបក្ស គាំទ្រសេចក្តីស្នើច្បាប់ ដើម្បីការពារនាយកក្រុមប្រឹក្សាច្បាប់ពិសេស ទទួលបន្ទុកការស៊ើបអង្កេតអំពីរុស្ស៉ី គឺលោក Robert Mueller មិនឲ្យលោក ត្រាំបណ្តេញចេញបាន។ លោកប្រធានាធិបតី បានវាយប្រហាររិះគន់ធ្ងន់ៗលើរបាយការណ៍បណ្តាញព័ត៌មានថ្មីៗ ហើយថា លោក នៅតែមានបំណងបណ្តេញលោក Robert Mueller ចេញ ដូចជាលោកបណ្តេញ បណ្តាញព័ត៌មានក្លែងក្លាយជាច្រើនអញ្ចឹង៕
