លោកប្រធានាធិបតីសហរដ្ឋអាមេរិក ដូណាល់ ត្រាំ បានស្តីបន្ទោសពួកគណបក្សប្រជាធិបតេយ្យដែលជាគណបក្សប្រឆាំងកាលពីថ្ងៃចន្ទចំពោះការចរចាជាប់គាំងលើគោលនយោបាយអន្តោប្រវេសន៍នៅពេលដែលសេតវិមាននិងពួកសមាជិកសភាបានខិតខំដើម្បីបញ្ចៀសការបិទរដ្ឋាភិបាលមួយផ្នែកម្តងទៀត។
ប្រធានាធិបតីត្រាំ បាននិយាយនៅក្នុងសារតាមប្រព័ន្ធ Twitter របស់លោកថា «ពួកគណបក្សប្រជាធិបតេយ្យ មិនឲ្យយើងឃុំឃាំង ឬបញ្ជូន ឧក្រិដ្ឋជនទៅប្រទេសរបស់ពួកគេវិញទេ។ នេះជាការទាមទារថ្មីមួយ។ ចំជាឆ្កួតមែន»។
ខណៈដែលជម្លោះមុនដំបូងផ្តោតលើការទាមទារប្រាក់ចំនួន៥ពាន់៧រយលានដុល្លាររបស់លោកត្រាំដើម្បីស្ថាបនាជញ្ជាំងមួយផ្នែកនៅតាមបណ្តោយព្រំដែនសហរដ្ឋអាមេរិក និងប្រទេសម៉ិកស៊ិក ការចរចាបានស្តីពីការខំប្រឹងប្រែងរបស់ពួកគណបក្សប្រជាធិបតេយ្យដើម្បីកម្រិតចំនួនជនអន្តោប្រវេសន៍ដែលគ្មានក្រដាសស្នាមដែលត្រូវបានចាប់ខ្លួននៅក្នុងសហរដ្ឋអាមេរិក មិនមែននៅតាមព្រំដែន និងចំនួនដែលអាជ្ញាធរអន្តោប្រវេសន៍សហរដ្ឋអាមេរិកអាចឃុំខ្លួនបាន។
ពួកគណបក្សប្រជាធិបតេយ្យ កំពុងព្យាយាមទប់ស្កាត់កលល្បិចឃុំខ្លួនដ៏គគ្លើនរបស់រដ្ឋបាលប្រធានាធិបតីត្រាំ។ ពួកគណបក្សប្រជាធិបតេយ្យចង់កម្រិតចំនួនអ្នកត្រូវបានចាប់ខ្លួនចំនួន១ម៉ឺន៦ពាន់នាក់ ដែលជាចំនួនប្រហាក់ប្រហែលទៅនឹងចំនួនអ្នកត្រូវបានឃុំខ្លួនកាលពីឆ្នាំមុនៗដោយអតីតរដ្ឋបាលប្រធានាធិបតីបារ៉ាក់ អូបាម៉ា ដែលកាន់តំណែងមុនប្រធានាធិបតីត្រាំ ទោះជាយ៉ាងណាក៏ដោយ ចំនួននេះបានកើននៅក្រោមរដ្ឋបាលរបស់ប្រធានាធិបតីត្រាំ។
ពួកគណបក្សសាធារណរដ្ឋ សង្ឃឹមថា នឹងមិនរាប់បញ្ចូលប្រភេទជនអន្តោប្រវេសន៍ដែលគ្មានក្រដាសស្នាមមួយចំនួនពីការកម្រិតនេះ រួមមានជនអន្តោប្រវេសន៍គ្មានក្រដាសស្នាមដែលបានរងការចោទប្រកាន់ ឬមានទោសព្រហ្មទណ្ឌធ្ងន់ និងអ្នកដែលមានបទល្មើសមជ្ឈឹមដូចជាការប្រើថ្នាំញៀនជាដើម៕
