នៅថ្ងៃពុធនេះ ប្រធានាធិបតីសហរដ្ឋអាមេរិកលោក Donald Trump និងលោក Joe Biden គូប្រជែងរបស់លោកខាងគណបក្សប្រជាធិបតេយ្យ កំពុងទន្ទឹងរង់ចាំលទ្ធផលនៃការបោះឆ្នោតដ៏តឹងតែងសម្រាប់តំណែងប្រធានាធិបតី ដោយលទ្ធផលបោះឆ្នោតជាតិភាគច្រើនផ្អែកលើការប្រកួតប្រជែងនៅក្នុងបណ្តារដ្ឋដែលមានការប្រទាញប្រទង់ខ្លាំង។
លោក Biden បានប្រាប់ក្រុមអ្នកគាំទ្រដែលស្រែកអបអរនៅជិតផ្ទះរបស់លោកក្នុងទីក្រុង Wilmington រដ្ឋ Delaware ថា៖ «អ្នកទាំងអស់គ្នា! សូមរក្សាការជឿជាក់។ យើងនឹងឈ្នះការបោះឆ្នោតនេះ»។
ក៏ប៉ុន្តែ នៅពេលដែលការរាប់សន្លឹកឆ្នោតនៅកំពុងបន្តនៅក្នុងរដ្ឋសំខាន់ៗមួយចំនួន ដែលលោកកំពុងស្ថិតនៅពីក្រោយលោកប្រធានាធិបតី Trump លោក Biden បានរំឭកថា «យើងត្រូវរក្សាការអត់ធ្មត់»។
ចំណែកលោក Trump វិញ បានសរសេរសារតាម Twitter ពីសេតវិមានថា៖ «សន្លឹកឆ្នោតរបស់យើងកំពុងកើនយ៉ាងខ្លាំង ក៏ប៉ុន្តែ ពួកគេកំពុងព្យាយាមលួចបន្លំការបោះឆ្នោតនេះ»។ ក្រុមហ៊ុន Twitter បានដាក់សញ្ញាព្រមាននៅពីមុខសារនេះថា ជាសារដែល «អាចប្រកែកតវ៉ាបាន និងដែលអាចនាំឲ្យមានការយល់ច្រឡំ»។
ការរាប់សន្លឹកឆ្នោតនៅកំពុងបន្តនៅតាមរដ្ឋសំខាន់ៗមួយចំនួនរហូតមកដល់ព្រឹកថ្ងៃពុធនេះ ម៉ោងក្នុងសហរដ្ឋអាមេរិក។
គណបក្សប្រជាធិបតេយ្យ កំពុងស្ថិតនៅលើមាគ៌ាមួយទៅតាមការរំពឹងទុកដើម្បីរក្សាការត្រួតត្រាសំឡេងភាគច្រើននៅក្នុងរដ្ឋសភា។ ក៏ប៉ុន្តែ ការបន្តរបស់គណបក្សសាធារណរដ្ឋដើម្បីត្រួតត្រាព្រឹទ្ធសភានៅមិនទាន់ប្រាកដនៅឡើយ ដោយលទ្ធផលនៃការបោះឆ្នោតជ្រើសរើសអាសនៈព្រឹទ្ធសភាមួយចំនួននៅទូទាំងប្រទេស នៅមិនទាន់សម្រេចនៅឡើយ។
សមាជិកព្រឹទ្ធសភាខាងគណបក្សសាធារណរដ្ឋនៃរដ្ឋ Kentucky លោក Mitch McConnell ដែលជាមេដឹកនាំគណបក្សសាធារណរដ្ឋនៅព្រឹទ្ធសភា បានឈ្នះការបោះឆ្នោតព្រឹទ្ធសភាសម្រាប់អាណត្តិទី ៧ របស់លោក។
បើយោងតាមការស្ទង់មតិភ្លាមៗក្រោយការបោះឆ្នោតរបស់ក្រុមហ៊ុនស្រាវជ្រាវ Edison Research លោកប្រធានាធិបតី Trump ទទួលបានការគាំទ្របន្ថែមពីគ្រប់ជាតិសាសន៍ និងយេនឌ័រ លើកលែងតែបុរសជាតិសាសន៍ស្បែកសប៉ុណ្ណោះ បើប្រៀបធៀបទៅនឹងការបោះឆ្នោតឆ្នាំ ២០១៦ នៅពេលដែលលោកបានយកឈ្នះលើអ្នកស្រី Hillary Clinton បេក្ខជនប្រធានាធិបតីខាងគណបក្សប្រជាធិបតេយ្យ។
ការិយាល័យស៊ើបអង្កេតសហព័ន្ធ FBI បានបញ្ជាក់ថា ខ្លួនកំពុងស៊ើបអង្កេតលើការរាយការណ៍ដែលថា មានការហៅទូរស័ព្ទក្លែងក្លាយដែលបង្អាក់ទឹកចិត្តពលរដ្ឋមិនឲ្យចេញទៅបោះឆ្នោតនៅតាមរដ្ឋមួយចំនួន។ ក៏ប៉ុន្តែមិនមានសញ្ញាប៉ះពាល់ទ្រង់ទ្រាយធំនៅកន្លែងបោះឆ្នោតដូចដែលអ្នកខ្លះបានភ័យខ្លាចនោះទេ។
រដ្ឋមន្ត្រីស្តីទីនៃក្រសួងសន្តិសុខមាតុភូមិលោក Chad Wolf បានប្រាប់អ្នកយកព័ត៌មានកាលពីថ្ងៃអង្គារម្សិលមិញថា «មិនមានសញ្ញាណាមួយ» ដែលថា «តួអង្គបរទេស» បានធ្វើការជ្រៀតជ្រែកក្នុងការបោះឆ្នោតនេះបានសម្រេចជោគជ័យនោះទេ។
កាលពីយប់ថ្ងៃអង្គារ លោក Trump និងលោក Biden បានឈ្នះបណ្តារដ្ឋដែលលោកទាំងពីរត្រូវបានគេរំពឹងទុកជាមុនថានឹងឈ្នះ នៅក្នុងការប្រឹងប្រែងដើម្បីធ្វើយ៉ាងណាឈ្នះឲ្យបានប្រតិភូចំនួន ២៧០ ដែលជាចំនួនភាគច្រើននៃប្រតិភូសរុបចំនួន ៥៣៨ នាក់នៅក្នុងអង្គបោះឆ្នោត ដើម្បីឲ្យបានកាន់តំណែងជាប្រធានាធិបតី។
ក៏ប៉ុន្តែ លទ្ធផលបោះឆ្នោតនៅក្នុងរដ្ឋដែលមានការប្រជែងខ្លាំងដូចជារដ្ឋ North Carolina រដ្ឋ Georgia រដ្ឋ Pennsylvania រដ្ឋ Michigan និងរដ្ឋ Wisconsin នៅមិនទាន់រាប់ចប់នៅឡើយ នៅពេលដែលមន្ត្រីរៀបចំការបោះឆ្នោត នៅកំពុងបន្តរាប់សន្លឹកឆ្នោតរាប់លានសន្លឹក ដែលសន្លឹកឆ្នោតខ្លះបានបោះកាលពីថ្ងៃអង្គារ ហើយសន្លឹកឆ្នោតជាច្រើនទៀត បានបោះមុនថ្ងៃបោះឆ្នោត៕
