នៅសល់តែប៉ុន្មានថ្ងៃមុនការបោះឆ្នោតជ្រើសរើសប្រធានាធិបតីអាមេរិកនៅថ្ងៃអង្គារ ទី៣ ខែវិច្ឆិកា ខាងមុខនេះ បេក្ខជនប្រធានាធិបតីទាំងពីរ កំពុងផ្តោតលើការប្រឹងប្រែងធ្វើយុទ្ធនាការរកសំឡេងឆ្នោតនៅក្នុងរដ្ឋចំនួន៤ ដែលប្រទាញប្រទង់ខ្លាំងស្ថិតនៅភាគកណ្តាលប្រទេស។
កាលពីថ្ងៃសុក្រ លោក Donald Trump បានធ្វើយុទ្ធនាការរបស់លោកនៅក្នុងរដ្ឋ Michigan, Minnesota និងរដ្ឋ Wisconsin ក្នុងពេលដែលលោកអតីតអនុប្រធានាធិបតី Joe Biden ធ្វើយុទ្ធនាការរបស់លោកនៅក្នុងរដ្ឋ Minnesota, Wisconsin និងរដ្ឋ Iowa។
រដ្ឋ Michigan មានអង្គបោះឆ្នោតសរុបចំនួន ១៦ ហើយរដ្ឋ Minnesota និង Wisconsin មានអង្គបោះឆ្នោត ១០ ដូចគ្នា ចំណែក Iowa មាន ៦។
ថ្លែងប្រាប់ក្រុមអ្នកគាំទ្រលោកនៅឯពិធីជួបជុំ Rally តាមរយៈការបើករថយន្តចូលរួម ក្នុងកន្លែងសួនកម្សាន្ត Iowa State Fairgrounds នៃទីក្រុង Des Moines នៃរដ្ឋ Iowa កាលពីថ្ងៃសុក្រនោះ លោក Biden បានថ្លែងថា លោក Trump បាន «បោះបង់ចោល» ការប្រយុទ្ធប្រឆាំងនឹងវីរុសកូរ៉ណា។ រដ្ឋ Iowa ជារដ្ឋដែលមានការឆ្លងវីរុសកូរ៉ូណាប្រចាំថ្ងៃ និងចំនួនអ្នកជំងឺចូលសម្រាកព្យាបាលនៅមន្ទីរពេទ្យ កើនខ្ពស់មិនធ្លាប់មាន នៅសប្តាហ៍នេះ។
លោក Biden ថា៖ «យើងមិនធ្វើដូចលោកត្រាំទេ យើងនឹងមិនចុះចាញ់នឹងវីរុសឡើយ»។
រីឯលោក Trump វិញ បានថ្លែងប្រាប់អ្នកគាំទ្រនៅក្នុងការជួបប្រជុំមួយនៅរដ្ឋ Michigan ថា លោក Biden បានទស្សន៍ទាយថា យើង នឹងមានខែត្រជាក់ដ៏ខ្មៅងងឹតមួយ ដោយសារតែវិបត្តិជំងឺរាតត្បាតកូវីដ១៩។
លោក Trump ថ្លែងថា៖ «នៅពេលនេះប្រទេសយើង មិនត្រូវការរដូវទឹកកកដ៏ខ្មៅងងឹតបែបនេះ និងអ្នកដឹកនាំម្នាក់ ដែលលើកយករឿងនេះមកនិយាយទេ»។
លោក ត្រាំ បានថ្លែងថា វ៉ាក់សាំងដែលមានសុវត្ថិភាព នឹងអាចត្រូវចេញឲ្យពលរដ្ឋអាមេរិកាំងប្រើប្រាស់នៅប៉ុន្មានសប្តាហ៍ខាងមុខ ហើយថា នឹងចែកចាយមិនគិតថ្លែទេ «ព្រោះ[វិបត្តិ]នេះ មិនមែនជាកំហុសពលរដ្ឋ ឬជាកំហុសនរណាម្នាក់ទេ តែជាកំហុសរបស់ប្រទេសចិន»។
ការស្ទង់មតិថ្នាក់ជាតិកន្លងមក បង្ហាញថា លោក Biden នាំមុខលោកTrump ប្រមាណ ៧ ឬ ៨ ភាគរយ ទោះបីជាមានគម្លាតការគាំទ្រនេះប្រកិតប្រគៀកគ្នាជាងនេះ នៅតាមបណ្តារដ្ឋដែលអាចមានការប្រែប្រួសសំខាន់ៗ ដែលទំនងជាអ្នកកំណត់លទ្ធផលនៃការបោះឆ្នោតនេះក៏ដោយ៕
