ប្រធានាធិបតីអាមេរិក លោក ដូណាល់ ត្រាំ បាននិយាយបន្តុះបង្អាប់ទៅលើការបោះឆ្នោតជ្រើសរើសសមាជិកព្រឹទ្ធសភាពិសេសមួយសម្រាប់រដ្ឋ Alabama ដោយលោកបាននិយាយវាយប្រហារលោក Doug Jones សមាជិកគណបក្សប្រជាធិបតេយ្យ ថាជាតំណាងរាស្ត្រម្នាក់ដែលនឹងក្លាយជាអាយ៉ងរបស់ថ្នាក់ដឹកនាំគណបក្ស ប្រសិនបើលោកត្រូវបានបោះឆ្នោតជ្រើសរើសជាសមាជិកព្រឹទ្ធសភានៅខែក្រោយនោះ។
នៅក្នុងប្រអប់បញ្ចេញមតិលើបណ្តាញសង្គម Twitter លោក ត្រាំ មិនបានលើកឡើងពី លោក Roy Moore បេក្ខជនដែលត្រូវបានដោយតែងតាំងដោយគណបក្សសាធារណរដ្ឋ និងត្រូវបានចោទប្រកាន់ថា បានបំពានផ្លូវភេទក្មេងស្រីជំទង់២នាក់កាលពី៤ទសវត្សរ៍មុន នៅពេលដែលលោកនៅជារដ្ឋអាជ្ញាម្នាក់ក្នុងវ័យ៣០ឆ្នាំ និងបានទាក់ទងក្មេងស្រីជំទង់ផ្សេងទៀត នោះទេ។
ប៉ុន្តែលោក ត្រាំ បាននិយាយថា លោក Jones ដែលជាអតីតរដ្ឋអាជ្ញាសហព័ន្ធនឹងត្រូវសងគុណមេដឹកនាំកំពូលខាងគណបក្សប្រជាធិបតេយ្យ២នាក់នៅក្នុងសភា គឺលោកសមាជិកព្រឹទ្ធសភា Charles Schumer និងលោកស្រីសមាជិកសភា Nancy Pelosi។
ការបោះឆ្នោតដែលនឹងប្រព្រឹត្តទៅនៅថ្ងៃទី១២ ខែធ្នូ ខាងមុខនេះ គឺសម្រាប់អាសនៈដែលនៅសល់ពេល៣ឆ្នាំ ដែលជាអតីតអាសនៈក្នុងព្រឹទ្ធសភារបស់លោក Jeff Sessions ដែលបានលាលែងពីតំណែងកាលពីដើមឆ្នាំ២០១៧ ដើម្បីចូលរួមជាមួយគណៈរដ្ឋមន្ត្រីរបស់លោក ត្រាំ ដោយកាន់តំណែងជារដ្ឋមន្ត្រីក្រសួងយុត្តិធម៌ ដែលជាតំណែងកំពូលខាងអនុវត្តច្បាប់នៅក្នុងសហរដ្ឋអាមេរិក៕
