ប្រធានាធិបតីសហរដ្ឋអាមេរិកលោក Donald Trump កាលពីថ្ងៃចន្ទម្សិលមិញ បានប្រឈមនឹងការចោទសួររបស់អ្នកកាសែតអំពីកិច្ចព្រមព្រៀងគ្រប់គ្រងបញ្ហាអន្តោប្រវេសន៍កាលពីពេលថ្មីៗនេះរបស់លោកជាមួយនឹងប្រទេសម៉ិកស៊ិក ប៉ុន្តែលោកបានផ្ដល់ព័ត៌មានតិចតួចប៉ុណ្ណោះអំពីអ្វី ដែលលោកបាននិយាយថាជាផ្នែកសម្ងាត់នៃកិច្ចព្រមព្រៀងនេះ។
លោក Trump បានបញ្ជាក់នៅទីធ្លាខាងត្បូងនៃសេតវិមានដូច្នេះថា៖ «វាគ្រាន់តែជាផ្នែកមួយទៀតនៃអ្វីដែលយើងសម្រេចបាន»។
នៅពេលដែល VOA សួរថា ប្រសិនបើមានកិច្ចព្រមព្រៀងដូច្នេះមែន តើហេតុអ្វីបានជាប្រទេសម៉ិកស៊ិកបដិសេធ? លោក Trump បានឆ្លើយថា៖ «ខ្ញុំគិតថា ពួកគេនឹងមិនជំទាស់ទៅនឹងកិច្ចព្រមព្រៀងនេះយូរនោះទេ។ កិច្ចព្រមព្រៀងនេះបានធ្វើរួចទៅហើយ»។
គេឃើញភាគីប្រទេសទាំងពីរមានការយល់ច្រឡំ និងមានភាពស្រឡាំងកាំង បន្ទាប់ពីលោក Trump បានអះអាងកាលពីព្រឹកថ្ងៃចន្ទម្សិលមិញថា សហរដ្ឋអាមេរិកបានចុះហត្ថលេខាលើអ្វីដែលលោកហៅថាជា «ផ្នែកដ៏សំខាន់បំផុតមួយទៀតនៃកិច្ចព្រមព្រៀងអំពីអន្តោប្រវេសន៍ និងសន្តិសុខជាមួយនឹងប្រទេសម៉ិកស៊ិក»។
ប៉ុន្តែ កាលពីថ្ងៃចន្ទម្សិលមិញ មន្ត្រីម៉ិកស៊ិកបានបដិសេធថា គ្មានការចុះហត្ថលេខាជាមួយសហរដ្ឋអាមេរិកលើផ្នែកសំខាន់ណាមួយទៀតអំពីការគ្រប់គ្រងជនចំណាកស្រុក បន្ថែមទៅនឹងកិច្ចព្រមព្រៀងដែលសម្រេចបានកាលពីពេលថ្មីៗនេះទេ។
កាលពីថ្ងៃសុក្រ លោក Trump សម្រេចបានកិច្ចព្រមព្រៀងជាមួយនឹងប្រទេសម៉ិកស៊ិកដើម្បីរារាំងជនចំណាកស្រុកពីទ្វីបអាមេរិកកណ្ដាល មិនឲ្យធ្វើដំណើរកាត់តាមប្រទេសម៉ិកស៊ិកឆ្លងចូលសហរដ្ឋអាមេរិក។ កិច្ចព្រមព្រៀងនេះនៅរង់ចាំការអនុម័តពីសភាម៉ិកស៊ិកមុននឹងអាចចូលជាធរមានបាន៕
