ប្រធានាធិបតីស.រ.អា. Donald Trump បានបន្ទោសជាថ្មីទៀតដល់លោកអតីតប្រធានាធិបតី Barack Obama ថាចាត់ការមិនបានត្រឹមត្រូវអំពីការជ្រៀតជ្រែករបស់រុស្ស៊ីក្នុងការបោះឆ្នោតប្រធានាធិបតីស.រ.អា.កាលពីឆ្នាំ២០១៦។
លោក Trump បាននិយាយនៅក្នុង Twitter កាលពីថ្ងៃចន្ទថា «Obama បានកាន់តំណែងប្រធានាធិបតីរហូតដល់ការបោះឆ្នោតឆ្នាំ២០១៦ និងហួសពីការបោះឆ្នោតឆ្នាំ២០១៦ទៅទៀត។ ដូច្នេះ ហេតុដូចម្តេចបានជាលោកមិនបានធ្វើអ្វីសោះអំពីការជ្រៀតជ្រែករបស់រុស្ស៊ី?» ការវាយប្រហារលើអ្នកកាន់តំណែងមុនគាត់នេះជា tweet ថ្មីៗបំផុតរបស់ប្រធានាធិបតី Trump ក្នុងបណ្តា tweets មួយចំនួនរបស់គាត់។
នេះជាការត្អូញត្អែរជាធម្មតាមួយរបស់ប្រធានាធិបតី Trump ដែលមិនបានផ្តល់សារៈសំខាន់ខ្លាំងលើការជ្រៀតជ្រែករបស់រុស្ស៊ីហើយគាត់បានបន្ទោសអ្នកកាន់តំណែងមុនគាត់ថាគ្មានជោគជ័យក្នុងការបញ្ឈប់ការជ្រៀតជ្រែកនេះ។
កាលពីខែធ្នូឆ្នាំ២០១៦ លោកប្រធានាធិបតី Obama បានដាក់ទណ្ឌកម្មប្រឆាំងនឹងពួកបុគ្គល និងអង្គភាគរុស្ស៊ី៩អំពីការជ្រៀតជ្រែកក្នុងការបោះឆ្នោតអាមេរិកាំងនិងអំពីការយាយីពួកអ្នកការទូតស.រ.អា.ក្នុងក្រុងមូស្គូដោយមានរួមបញ្ចូលសេវាស៊ើបការសម្ងាត់ GRU និង FSB របស់ប្រទេសរុស្ស៊ីផងដែរ។ លោកប្រធានាធិបតី Obama ក៏បានបញ្ជាដល់ពួកមន្ត្រីរដ្ឋាភិបាលរុស្ស៊ី៣៥នាក់ក្នុងរដ្ឋធានី Washington និងក្រុង San Francisco ឱ្យចាកចេញពីប្រទេសអាមេរិកដោយសារ «បានធ្វើសកម្មភាពក្នុងអាកប្បកិរិយាមួយមិនត្រឹមត្រូវតាមឋានៈជាអ្នកការទូតនិងសកម្មភាពខាងកិច្ចការកុងស៊ុលរបស់ពួកគេ»។ លោក Obama ក៏បានបញ្ជាឱ្យបិទអាគារពីរមានកំផែងព័ទ្ធជុំវិញនៅជិតមាត់ទឹកដែលរដ្ឋបាលស.រ.អា.បានថ្លែងថាបានត្រូវប្រើប្រាស់សម្រាប់ធ្វើសកម្មភាពស៊ើបការណ៍សម្ងាត់របស់រុស្ស៊ី។
កាលពីថ្ងៃចន្ទ អាជ្ញាធរវិមានក្រឹមឡាំងបានបដិសេធថារុស្ស៊ីមិនមានទាក់ទិននឹងការជ្រៀតជ្រែកនេះទេ។ អ្នកនាំពាក្យរុស្ស៊ីឈ្មោះ Dmitry Peskov បាននិយាយប្រាប់ពួកអ្នកកាសែតថាការចោទប្រកាន់ទាំងនេះគ្មានមូលដ្ឋានទេ។
អត្ថាធិប្បាយទាំងនេះមានឡើងតែប៉ុន្មានថ្ងៃក្រោយពីលោក Robert Mueller ស្មាក្តីពិសេសស.រ.អា.បានចោទប្រកាន់ពលរដ្ឋរុស្ស៊ី១៣នាក់ និងអង្គភាពរុស្ស៊ីបីថាបានធ្វើយុទ្ធនាការ «សង្គ្រាមព័ត៌មាន» ខុសច្បាប់ដើម្បីបង្អាក់ការបោះឆ្នោតប្រធានាធិបតីអាមេរិកាំងសម្រាប់ផ្តល់អត្ថប្រយោជន៍ដល់ Trump៕
