ប្រធានាធិបតីអាមេរិកលោក Donald Trump បានចោទប្រកាន់លោក Justin Trudeau នាយករដ្ឋមន្ត្រីនៃប្រទេសកាណាដាថា «លាក់ពុត» បន្ទាប់ពីលោកTrudeau និងមេដឹកនាំឯទៀតៗនៃអង្គការអូតង់ហាក់ដូចជាបាននិយាយរអេចរអូចអំពីលោក។
វីដេអូមួយដែលបានត្រូវថតនៅពេលបដិសណ្ឋារកិច្ចកាលពីយប់ថ្ងៃអង្គារនៅក្នុងវិមាន Buckingham ក្នុងក្រុងឡុងដ៍បានបង្ហាញឱ្យឃើញលោក Trudeau ប្រមូលផ្តុំគ្នាជាមួយនាយករដ្ឋមន្ត្រីអង់គ្លេស Boris Johson ព្រះអង្គម្ចាស់ក្សត្រីយ៍ Anne នៃប្រទេសអង់គ្លេស លោកនាយករដ្ឋមន្ត្រីហុល្លង់ Mark Rute និងលោកប្រធានាធិបតីបារាំង Emmanuel Macron។
គេបានឮលោក Trudeau ធ្វើអត្ថាធិប្បាយអំពីការនិយាយយ៉ាងវែងដោយលោក Trump ជាមួយអ្នកកាសែតដែលនៅក្នុងនោះលោក Trump បានថ្លែងថា លោក Trudeau ខ្វល់ខ្វាយក្នុងចិត្តអំពីការនិយាយរបស់លោកដែលថាប្រទេសកាណាដាមិនបានបំពេញតាមការប្តេជ្ញាខាងហិរញ្ញវត្ថុរបស់ខ្លួនដល់អង្គការអូតង់ទេ។
ក្នុងរយៈពេលខ្លីក្រោយអត្ថាធិប្បាយរបស់លោក Trump អំពីលោក Trudeau លោកប្រធានាធិបតីបាន Tweet ថា អង្គការអូតង់បានធ្វើឱ្យមាន «ការជឿនលឿនដ៏អស្ចារ្យ» ចាប់តាំងពីលោកបានជាប់ឆ្នោតជាប្រធានាធិបតីអាមេរិកជិតបីឆ្នាំកន្លងទៅនេះ។
លោក Trump បាននិយាយថា «ប្រទេសឯទៀតៗក្រៅពីសហរដ្ឋអាមេរិកបានយល់ព្រមបង់ប្រាក់បន្ថែមចំនួន១៣០ពាន់លានដុល្លារក្នុងមួយឆ្នាំហើយមិនហួសពី ឆ្នាំ២០២៤ទេ ចំនួនទឹកប្រាក់នេះនឹងកើនឡើងដល់៤០០ពាន់លានដុល្លារ។អង្គការអូតង់នឹងខ្លាំងក្លាជាងមុន»៕
