ភ្ជាប់​ទៅ​គេហទំព័រ​ទាក់ទង

សំណើ​ពន្យារពេល​សំណុំរឿង​លោក​ខៀវ សំផន​ត្រូវ​បដិសេធ

  • សុខ ខេមរា

អតីតមេដឹកនាំខ្មែរក្រហម ខៀវ សំផន (ខាងឆ្វេង) និង នួន ជា ខាងស្តាំ។
អង្គ​ជំនុំ​ជម្រះ​សាលា​ដំបូង​នៃ​សាលាក្តី​ខ្មែរក្រហម​កាលពី​ថ្ងៃ​សុក្រ​ម្សិលម៉ិញ​នេះ​ បាន​បដិសេធ​សំណើរបស់​លោក​ខៀវ សំផន ​សុំពន្យារ​ពេល​ជម្រះ​ក្តី​សំណុំ​រឿង​០០២​វគ្គ​២​រហូត​ទាល់តែ​តុលាការ​ចេញ​សាលក្រម​ស្ថាពរ​ចំពោះ​សំណុំ​រឿង​០០២​វគ្គ​ទី១​ជាមុន​សិន។​ ជនជាប់​ចោទ​ខៀវ សំផន​ ជា​អតីត​ប្រមុខ​រដ្ឋ​របប​កម្ពុជា​ប្រជា​ធិបតេយ្យ​ ដែល​ត្រូវ​ប្រឈម​មុខ​នឹង​ការ​ជំនុំ​ជម្រះ​ទោស​ចំពោះ​សំណុំ​រឿងថ្មី​បន្ត​នេះ​ជាមួយ​នឹង​ជន​ជាប់​ចោទ​ម្នាក់​ទៀត​គឺលោកនួន ជា ​បងធំ​ទីពីរ​នៃ​របប​តែមួយ​នេះ​ បញ្ជាក់​ថា ​សិទ្ធិ​របស់​ខ្លួន​នឹង​ត្រូវ​ប៉ះពាល់​ ប្រសិន​បើគេ​ដំណើរ​ការ​កាត់ទោស​មុន​សាលក្រម​ស្ថាពរ​សំណុំ​រឿង​០០២​វគ្គទី១​ត្រូវ​ប្រកាស។​

តែ​មន្ត្រី​នាំពាក្យ​សាលាក្តី​ខ្មែរក្រហម​ដែល​ចូលរួម​ដោយ​អ.ស.ប.​គឺ​លោក​ នេត្រ ភក្រ្តាបាន​ដកស្រង់​ការ​សម្រេចរបស់​អង្គ​ជំនុំ​ជម្រះ​សាលា​ដំបូង​មក​បញ្ជាក់​ថា៖

«ទាក់ទង​ជាមួយ​សំណើនេះ​គឺត្រូវ​បាន​អង្គ​ជំនុំ​ជម្រះ​សាលា​ដំបូង​ចេញ​សេចក្តី​សម្រេច​បដិសេធ​ចំពោះ​សំណើ​នេះ​ហើយ ​ដោយ​មិន​ធ្វើអ្វី​ដែល​ជា​ការ​ស្នើសុំ​របស់​លោក​ខៀវ សំផន​ទេ។​ ហើយ​អង្គ​ជំនុំ​ជម្រះ​សាលា​ដំបូង​យល់​ថា ​ការ​ ចាប់​ផ្តើម​ដំណើរការ​នីតិវិធី​លើ​សំណុំ​រឿង​០០២​ វគ្គ​២​ និង​ធានា​ផង​ដែរ​នូវ​ផល​ ប្រយោជន៍​ជាមូលដ្ឋាន​នៃ​ដើម​បណ្តឹង​រដ្ឋប្បវេណី​ និង​ជន​រងគ្រោះ​ក្នុង​ការ​ទទួល​ បាន​យុត្តិធម៌​ប្រកប​ដោយ​អត្តន័យ​និងទាន់​ពេល​វេលា»។​

លោក​បាន​បញ្ជាក់​បន្ថែម​ថា ​សហ​ព្រះរាជ​អាជ្ញា​និង​ជន​រងគ្រោះ​ក៏​បាន​ជំទាស់​នឹង សំណើជន​ជាប់​ចោទ​ខៀវ សំផន​ដែរ​ ដោយ​យោង​លើ​ហេតុផល​ថា​ ជន​ជាប់​ចោទ​និង​ជន​រងគ្រោះ​មាន​វ័យ​ចំណាស់​ដូចគ្នា​ហើយ។​

សាលាក្តី​កាត់ទោស​ខ្មែរក្រហម​កំពុង​រង់ចាំ​សាលក្រម​នៃ​សំណុំ​រឿង​០០២​វគ្គទី១​ ស្តីពី​ការ​ជម្លៀស​ពលរដ្ឋ​ចេញ​ពីទីក្រុង​និង​ការ​សម្លាប់​នៅ​ទួល​ពោធិ៍ជ្រៃ​ក្នុង​ ទសវត្សរ៍​១៩៧០​ ក្រោយពី​បញ្ចប់​ការ​កាត់ទោស​នោះ។​ សាលក្រម​នេះ​ត្រូវ​គេ​ គ្រោង​នឹង​ប្រកាស​នៅក្នុង​អំឡុង​ខែ​មិថុនា​ខាង​មុខ។​ ហើយ​សំណុំ​រឿង​បន្ត​ ដែល​ ជា​សំណុំ​រឿង​សំខាន់​ទាក់ទង​នឹង​បទ​ឧក្រិដ្ឋកម្ម​ជាច្រើន​ ដែលធ្វើ​ឲ្យ​ពលរដ្ឋ​ខ្មែរ​ ជាង​១លាន​៧សែន​នាក់​ស្លាប់​ឬ​ហៅ​ថា ​សំណុំ​រឿង​០០២​វគ្គទី២​នោះ​ នៅ​មិន​ ទាន់​ត្រូវ​គេ​កំណត់​ថា​ នឹង​ចាប់ផ្តើម​ពេលណា​ទេ​ ទោះជា​មាន​ការ​បដិសេធ​ការ​សុំ ពន្យារ​ពេល​របស់​ជនជាប់​ចោទ​ខៀវ សំផន​ក្តី។​

តែ​លោកមេធាវី​ គង់ សំអុន ​ដែល​ការពារក្តី​ជនជាប់​ចោទ ​ខៀវ សំផន ​បាន​ថ្លែង​ ថា​ ការ​សម្រេច​របស់​អង្គ​ជំនុំ​ជម្រះ​សាលា​ដំបូង​នេះ​ជារឿង​មិន​អាច​ទទួល​យក​ បាន​ទេ​ ដោយសារ​ថា​ វា​នឹង​ប៉ះពាល់​ដល់​ដំណើរ​ការ​កាត់ក្តី​ និង​សិទ្ធិ​ការពារ​កូន​ក្តី​របស់​លោក។​

«បញ្ហា​សំខាន់​គឺ​អង្គហេតុ។​ កាលណា​អង្គហេតុ​មួយ​មិន​ទាន់​បាន​សម្រេច​ចូល​ ស្ថាពរ​ផង​ យើង​យក​អង្គហេតុ​ហ្នឹង​ទៅធ្វើ​ទរក្ស្ហីករណ៍​សម្រាប់​រឿង​ក្តី​បន្ទាប់​ទៀត​ ម៉េច​បាន? រឿងក្តី​០០២​ វគ្គ​ទី២​ ជា​បញ្ហា​ដែល​ត្រូវ​ធ្វើការ​ដេញ​គ្នា​ទាំងអស់​ ហើយ​ រឿង​ធ្វើ​ការ​ចោទ​ប្រកាន់​កន្លង​មក​នោះ​ វាមាន​ការ​ជាប់​ពាក់ព័ន្ធ​គ្នា​ ព្រោះ​វា​ពាក់​ព័ន្ធ​ទៅនឹង​របប​កម្ពុជា​ប្រជាធិប​តេយ្យ​ទាំងមូល។​ វាមិនមែន​ប្រព្រឹត្ត​ទៅ​លើ​អំពើ​ជាក់លាក់​ណាមួយ​របស់​លោក​ខៀវ សំផន​ទេ ​ព្រោះ​លោក​អាច​ជ្រាប​ស្រាប់ ហើយ​លោក​ ខៀវ សំផនអត់មាន​ប្រព្រឹត្ត​អំពើ​ល្មើស​ណាមួយ​ដែល​ទាក់​ទង​ទៅ​នឹង​ការ​ចោទ​ប្រកាន់​កន្លង​មក​ទេ»។​

តែ​សហ​ព្រះរាជ​អាជ្ញា​និង​អ្នក​ឃ្លាំមើល​ខ្លះព្រួយ​បារម្ភ​ខ្លាចជន​ជាប់ចោទ​និង​ជន​ រង​គ្រោះ​ដែល​មានវ័យ​ចំណាស់ៗ​នោះ​ មិនអាច​រស់រាន​មាន​ជីវិត​ដល់​ថ្ងៃ​កាត់​ទោស ​ហើយធ្វើ​ឲ្យបាត់​បង់​ឱកាស​រក​យុត្តិធម៌។​ ម្យ៉ាង​ទៀត​ការ​កាត់​ទោស​ឆាប់​ត្រូវ​គេ​អះអាង​ថា ​អាច​សន្សំ​ថវិកា​ និង​ពេល​វេលា​បាន​ច្រើន​ ហើយ​នឹង​រក​យុត្តិធម៌​បាន​ឆាប់​ផង​ដែរ៕
XS
SM
MD
LG