មន្រ្តីកំពូលសេតវិមានបានជំរុញដល់គម្រោងសាងសង់រោងចក្រថាមពលនុយក្លេអ៊ែរ ដែលមានទឹកប្រាក់រាប់ពាន់លានដុល្លារនៅក្នុងប្រទេសអារ៉ាប៊ីសាអូឌីត និងការចែករំលែកបច្ចេកវិទ្យាជាមួយនឹងរាជាណាចក្រមួយនេះ បើទោះបីជាមានការព្រមានពីក្រុមមន្រ្តីសន្តិសុខសហរដ្ឋអាមេរិកក៏ដោយ។ នេះបើយោងតាមរបាយការណ៍ថ្មីមួយរបស់សភាអាមេរិក។
របាយការណ៍នេះត្រូវបានផ្សព្វផ្សាយកាលពីថ្ងៃអង្គារដោយគណៈកម្មាធិការត្រួតពិនិត្យរបស់សភាដែលដឹកនាំដោយគណបក្សប្រជាធិបតេយ្យបានឲ្យដឹងថា អតីតទីប្រឹក្សាសន្តិសុខជាតិលោក Michael Flynn និងមន្រី្តពីរនាក់ផ្សេងទៀតបានព្រងើយកន្តើយចំពោះការព្រមានម្តងហើយម្តងទៀតថា ការព្យាយាមរបស់ពួកគេអាចបំពានច្បាប់អាមេរិក។
ក្រុមសមាជិកសភាខាងគណបក្សប្រជាធិបតេយ្យ និងគណបក្សសាធារណដ្ឋបានបង្ហាញក្តីបារម្ភថា ប្រទេសអារ៉ាប៊ីសាអូឌីតអាចផលិតអាវុធនុយក្លេអ៊ែរ ប្រសិនបើសហរដ្ឋអាមេរិកចែករំលែកបច្ចេកវិទ្យា ដោយគ្មានការត្រួតពិនិត្យឲ្យបានត្រឹមត្រូវនោះ។
កាលពីថ្ងៃអង្គារ គណៈកម្មាធិការបានចាប់ផ្តើមស៊ើបអង្កេតទៅលើការអះអាងអានាមឹកជាច្រើនថាពួកគេមើលឃើញពីសកម្មភាពមិនប្រក្រតីនៅក្នុងសេតវិមានពាក់ព័ន្ធនឹងសំណើសាងសង់រោងចក្រថាមពលនុយក្លេអ៊ែរនៅក្នុងប្រទេសអារ៉ាប៊ីសាអូឌីត។
នៅមុនលោក Flynn ត្រូវបានបណ្តេញចេញពីតំណែងកាលពីដើមឆ្នាំ២០១៧ មន្រ្តីក្រុមប្រឹក្សាសន្តិសុខជាតិលោក Derek Harvey ដែលលោក Flynn បានតែងតាំងឲ្យធ្វើការបន្តនៅលើសំណើរនេះ ដែលស្ថិតក្រោមការពិចារណាដោយរដ្ឋបាលលោក Trump។
សេតវិមានមិនទាន់ឆ្លើយតបចំពោះរបាយការណ៍នេះនៅឡើយទេ៕
