ប្រធានទីភ្នាក់ងារស៊ើបការណ៍សម្ងាត់សំខាន់ៗទាំង ៦ បានប្រាប់គណៈកម្មាធិការស៊ើបការណ៍សម្ងាត់របស់ព្រឹទ្ធសភាកាលពីថ្ងៃទី ១៣ ខែកុម្ភៈកន្លងទៅនេះថា រដ្ឋាភិបាលក្រុងមូស្គូយល់ឃើញថា ការបោះឆ្នោតពាក់កណ្ដាលអាណត្តិនៅសហរដ្ឋអាមេរិកជាឱកាសមួយសម្រាប់ខ្លួនធ្វើការជ្រៀតជ្រែកបាន។
លោក Dan Coats ប្រធានទីភ្នាក់ងារស៊ើបការណ៍ជាតិ បាននិយាយថា៖ «យ៉ាងហោចណាស់ យើងរំពឹងថា ប្រទេសរុស្ស៊ីនឹងបន្តប្រើប្រាស់ការឃោសនា ប្រព័ន្ធផ្សព្វផ្សាយសង្គម បុគ្គលបន្លំភ្នែក អ្នកនាំពាក្យដ៏គួរឲ្យអាណិត និងមធ្យោបាយជះឥទ្ធិពលដទៃទៀត ដើម្បីព្យាយាមធ្វើឲ្យមានការបែកបាក់សង្គម និងនយោបាយកាន់តែធ្ងន់ធ្ងរនៅក្នុងសហរដ្ឋអាមេរិក»។
ការបោះឆ្នោតពាក់កណ្ដាលអាណត្តិគ្រោងនឹងធ្វើធ្វើឡើងនៅថ្ងៃទី ៦ ខែវិច្ឆិកាខាងមុខនេះ។ ការបោះ ឆ្នោតបឋមដំបូងបង្អស់នឹងធ្វើឡើងនៅថ្ងៃទី ៦ ខែមីនាខាងមុខនេះ។
មន្ត្រីរដ្ឋាភិបាលអាមេរិកមានការព្រួយបារម្ភអស់រយៈពេលជាយូរមកហើយថា ប្រទេសរុស្ស៊ីអាចជ្រៀតជ្រែកចូលក្នុងការបោះឆ្នោតខាងមុខនេះ ដែលជាការធ្វើយុទ្ធនាការជ្រៀតជ្រែកម្ដងទៀតដូចដែលរុស្ស៊ីធ្លាប់បានធ្វើនៅក្នុងអំឡុងពេលបោះឆ្នោតប្រធានាធិបតីអាមេរិកឆ្នាំ ២០១៦ និងការបោះឆ្នោតផ្សេងៗទៀតនៅទ្វីបអឺរ៉ុបកាលពីឆ្នាំ ២០១៧ ដូច្នេះដែរ។
កាលពីខែមករាកន្លងទៅនេះ ប្រធានទីភ្នាក់ងារ CIA លោក Mike Pompeo បានបញ្ជាក់ថា លោកមានការរំពឹងទុកយ៉ាងខ្លាំងថា ប្រទេសរុស្ស៊ីនឹងជ្រៀតជ្រែកចូលក្នុងការបោះឆ្នោតពាក់កណ្ដាលអាណត្តិរបស់សហរដ្ឋអាមេរិក។ ហើយកាលពីថ្ងៃទី ១៣ កុម្ភៈកន្លងទៅថ្មីៗនេះ លោកក៏លើកឡើងម្ដងទៀតអំពីបញ្ហានេះដែរ។
លោកបាននិយាយយ៉ាងដូច្នេះថា៖ «យើងបានឃើញពីសកម្មភាព និងគោលបំណងរបស់រុស្ស៊ីនៅក្នុងការជះឥទ្ធិពលលើការបោះឆ្នោតដែលនឹងចូលមកដល់នៅក្នុងសហរដ្ឋអាមេរិក»។
មន្ត្រីរដ្ឋាភិបាលអាមេរិកដទៃទៀតក៏យល់ស្របដូចគ្នានេះដែរ។
លោក Mike Rogers ប្រធានទីភ្នាក់ងារសន្តិសុខជាតិដែលជិតអស់អាណត្តិ បាននិយាយថា៖ «ករណីជ្រៀតជ្រែករបស់រុស្ស៊ីនេះនឹងមិនផ្លាស់ប្ដូរ ឬក៏បញ្ឈប់នោះទេ»។
លោក Robert Cardillo ប្រធានទីភ្នាក់ងារជាតិស៊ើបការណ៍ភូមិសាស្ត្រអវកាស បានបញ្ជាក់ថា លោកឯកភាពជាមួយនឹងការវាយតម្លៃអំពីស្ថានការណ៍ដែលអាចកើតឡើងនៅឆ្នាំ ២០១៨ នេះ។
មន្ត្រីរដ្ឋាភិបាលអាមេរិកនានាបាននិយាយថា ពួកគេយល់ស្របជាមួយនឹងការវាយតម្លៃកាលពីខែមករា ឆ្នាំ ២០១៧ របស់សហគមន៍ស៊ើបការណ៍សម្ងាត់សហរដ្ឋអាមេរិកដែលថា ប្រទេសរុស្ស៊ីបានព្យាយាមជះឥទ្ធិពលលើការបោះឆ្នោតប្រធានាធិបតីអាមេរិកឆ្នាំ ២០១៦។ ការវាយតម្លៃនោះបានបញ្ជាក់ថា ប្រធានាធិបតីរុស្ស៊ីលោក Vladimir Putin ជាអ្នក «បញ្ជាឲ្យធ្វើយុទ្ធនាការជះឥទ្ធិពល» ដោយផ្ទាល់ ក្នុងគោលបំណងដើម្បីជំរុញឲ្យសម្រេចបានតាមក្ដីរំពឹងទុករបស់លោកប្រធានាធិបតី Donad Trump ចំពោះការបោះឆ្នោត។
ស្របពេលដែលលោក Trump បានច្រានចោលនូវការលើកឡើងណាមួយដែលថា រុស្ស៊ីមានបំណងជួយដល់យុទ្ធនាការឃោសនាបោះឆ្នោតរបស់លោក មន្ត្រីរដ្ឋាភិបាលអាមេរិកនានាបានបញ្ជាក់ថា ពួកគេយល់ស្របតាមការវាយតម្លៃនេះ។
លោក Mike Rogers បាននិយាយថា៖ «ខ្ញុំបានចូលរួមនៅក្នុងការវាយតម្លៃនេះ។ ខ្ញុំបានយល់ស្របតាមការវាយតម្លៃនេះ ហើយក៏នៅតែយល់ស្របតាមការវាយតម្លៃនេះដដែលនាពេលឥឡូវនេះ»។
លោក Dan Coats នៃទីភ្នាក់ងារស៊ើបការណ៍ជាតិរបស់សហរដ្ឋអាមេរិក បានបន្ថែមថា សហគមន៍ស៊ើបការណ៍សម្ងាត់របស់សហរដ្ឋអាមេរិក មិនបានឃើញការផ្លាស់ប្ដូរណាមួយដ៏គួរឲ្យកត់សម្គាល់ទាក់ទិននឹងជំហរគំរាមកំហែងរបស់រុស្ស៊ីតាំងពីឆ្នាំមុននោះទេ។
លោក Dan Coats បាននិយាយថា ការព្រួយបារម្ភអំពីការជ្រៀតជ្រែករបស់រុស្ស៊ីនៅក្នុងការបោះឆ្នោតគឺកើតមានឡើងនៅគ្រប់បណ្ដាប្រទេសទាំង ២៩ ដែលជាសមាជិករបស់អង្គការអូតង់។
លោកបានបញ្ជាក់ទៀតថា នៅក្នុងកិច្ចប្រជុំនាពេលថ្មីៗនេះរបស់អង្គការអូតង់ មន្ត្រីនានាត្រូវបានស្នើឲ្យលើកដៃ ឬក៏ឆ្លើយតបដោយផ្ទាល់មាត់ ប្រសិនបើពួកគេគ្មានការព្រួយបារម្ភអំពីការជ្រៀតជ្រែករបស់រុស្ស៊ីនៅក្នុងការបោះឆ្នោតរបស់ប្រទេសពួកគេ។ លោកបានបន្ថែមទៀតថា «មនុស្សរាល់គ្នានៅស្ងៀមស្ងាត់។ រឿងជ្រៀតជ្រែករបស់រុស្ស៊ីនេះគឺរីករាលដាលគ្រប់កន្លែង។ រុស្ស៊ីមានយុទ្ធសាស្ត្រដែលដំណើរការយ៉ាងល្អផុតពីអ្វីដែលកំពុងតែកើតឡើងនៅក្នុងសហរដ្ឋអាមេរិកនេះទៅទៀត»។
លោក Dan Coats បាននិយាយថា ប្រទេសរុស្ស៊ី ចិន អ៊ីរ៉ង់ និងកូរ៉េខាងជើង «អាចបង្កការគំរាមកំហែងធ្ងន់ធ្ងរតាមប្រព័ន្ធអ៊ីនធឺណិត» ចំពោះសហរដ្ឋអាមេរិក។
លោក Dan Coats បានថ្លែងយ៉ាងដូច្នេះថា៖ «និយាយដោយស្មោះត្រង់ទៅ សហរដ្ឋអាមេរិកកំពុងរងការគំរាមកំហែងរបស់ស្ថាប័នដែលប្រើប្រព័ន្ធអ៊ីនធឺណិតដើម្បីជ្រៀតចូលយ៉ាងជាក់ស្ដែងនៅក្នុងរាល់ព្រឹត្តិការណ៍សំខាន់ៗដែលកើតឡើងនៅក្នុងសហរដ្ឋអាមេរិក។ សហរដ្ឋអាមេរិកកំពុងរងការគំរាមកំហែងពីអ្នកវាយប្រហារតាមអ៊ីនធឺណិតជារៀងរាល់ថ្ងៃ។ ការវាយប្រហារនេះគឺប៉ះពាល់តាំងពីក្រុមហ៊ុនពាណិជ្ជកម្ម រដ្ឋាភិបាលសហព័ន្ធ រហូតដល់រដ្ឋាភិបាលថ្នាក់រដ្ឋ និងថ្នាក់ស្រុកទៀតផង»។
មន្ត្រីរដ្ឋាភិបាលអាមេរិកបានទទួលស្គាល់ថា សហរដ្ឋអាមេរិកមិនទាន់បានបង្កើតយុទ្ធសាស្ត្រជាតិដើម្បីទប់ទល់នឹងការវាយប្រហារតាមអ៊ីនធឺណិតនេះនៅឡើយទេ។
លោក Mike Pompeo នៃទីភ្នាក់ងារ CIA បាននិយាយថា ទីភ្នាក់ងារស៊ើបការណ៍សម្ងាត់របស់សហរដ្ឋអាមេរិកមានសមត្ថភាពបង្កើននូវលទ្ធផលអាក្រក់សម្រាប់អ្នកដែលហ៊ានជ្រៀតជ្រែកចូលក្នុងការបោះឆ្នោតរបស់សហរដ្ឋអាមេរិក» ប៉ុន្តែលោកបានបន្ថែមថា «យើងពិតជាត្រូវការយុទ្ធសាស្ត្ររបស់រដ្ឋាភិបាលអាមេរិក និងការដឹកនាំច្បាស់លាស់ដើម្បីសម្រេចឲ្យបាននូវយុទ្ធសាស្ត្រនេះ»។
ដោយសារតែរដូវបោះឆ្នោតបឋមនៃការបោះឆ្នោតពាក់កណ្ដាលអាណត្តិរបស់សហរដ្ឋអាមេរិកគ្រោងនឹងចាប់ផ្ដើមនៅខែក្រោយនេះ សមាជិកសភានានាបានបង្ហាញនូវការមិនសប្បាយចិត្ត ដោយសារតែសភាមិនទាន់អនុម័តច្បាប់ដើម្បីការពារសុចរិតភាពនៃប្រព័ន្ធបោះឆ្នោតរបស់សហរដ្ឋអាមេរិកនៅឡើយទេ។
លោក Roy Blunt សមាជិកព្រឹទ្ធសភាខាងគណបក្សសាធារណរដ្ឋប្រចាំរដ្ឋ Missouri និងជាសមាជិកមួយរូបនៃគណៈកម្មាធិការស៊ើបការណ៍សម្ងាត់របស់ព្រឹទ្ធសភា បានបញ្ជាក់ថា៖ «ការបោះឆ្នោតបឋមនៃការបោះឆ្នោតពាក់កណ្ដាលអាណត្តិរបស់សហរដ្ឋអាមេរិកនឹងធ្វើឡើងនៅខែក្រោយនេះ។ សម្រាប់ខ្ញុំ យើងត្រូវតែធ្វើការបោះឆ្នោតនោះឲ្យបានឆាប់»។
ក្រុមមេដឹកនាំនៃគណៈកម្មាធិការស៊ើបការណ៍សម្ងាត់នៃព្រឹទ្ធសភា បានឲ្យដឹងថា ពួកគេនឹងស្នើឲ្យមានច្បាប់មួយសម្រាប់សន្តិសុខការបោះឆ្នោតនៅពេលដែលពួកគេផ្សព្វផ្សាយអំពីការរកឃើញដំណាក់កាលដំបូងរបស់ពួកគេទាក់ទិននឹងការជ្រៀតជ្រែករបស់រុស្ស៊ីចូលក្នុងការបោះឆ្នោតរបស់សហរដ្ឋអាមេរិកកាលពីឆ្នាំ ២០១៦ នៅក្នុងរយៈពេលប៉ុន្មានសប្ដាហ៍ខាងមុខនេះ។
លោក Richard Burr ប្រធានគណៈកម្មាធិការស៊ើបការណ៍សម្ងាត់នៃព្រឹទ្ធសភា បាននិយាយថា៖ «វាជាក្ដីសង្ឃឹម និងការជឿជាក់របស់យើងដែលថា មុនការបោះឆ្នោតបឋមនេះចាប់ផ្ដើមឡើង យើងមានបំណងពិនិត្យលើការរកឃើញរបស់យើងដែលនឹងត្រូវផ្សព្វផ្សាយជាសាធារណៈ។ វាគឺជាគោលបំណងរបស់គណៈកម្មាធិការស៊ើបការណ៍សម្ងាត់នៃព្រឹទ្ធសភាក្នុងការផ្ដល់អនុសាសន៍ណាដែលនឹងជំរុញឲ្យមាននូវសន្តិសុខនៃដំណើរការបោះឆ្នោតរបស់សហរដ្ឋអាមេរិក»។
លោកសមាជិកព្រឹទ្ធសភា Mark Warner ខាងគណបក្សប្រជាធិបតេយ្យ ដែលជាអនុប្រធានគណៈកម្មាធិការស៊ើបការណ៍សម្ងាត់របស់ព្រឹទ្ធសភា បាននិយាយថា ស្របពេលដែលនៅតែមានចម្ងល់ជាច្រើនអំពីការជ្រៀតជ្រែករបស់រុស្ស៊ីនៅក្នុងការបោះឆ្នោតរបស់អាមេរិកឆ្នាំ ២០១៦ គេឃើញមាន «ការឯកភាពគ្នាក៏ទូលំទូលាយមួយរវាងគណបក្សទាំងពីរ» នៃគណៈកម្មាធិការស៊ើបការណ៍សម្ងាត់របស់ព្រឹទ្ធសភាដែលថា រដ្ឋាភិបាលក្រុងមូស្គូប្រឡូកនៅក្នុងការវាយប្រហារដែលមានការសម្របសម្រួលមួយដើម្បីបំផ្លាញលទ្ធិប្រជាធិបតេយ្យរបស់សហរដ្ឋអាមេរិក។
លោក Mark Warner បានបញ្ជាក់យ៉ាងដូច្នេះថា៖ «កុំយល់ច្រឡំឲ្យសោះ ការគំរាមកំហែងនេះមិនបានចាប់ផ្ដើមនៅឆ្នាំ ២០១៦ នោះទេ ហើយវាក៏មិនបានបញ្ចប់ជាមួយនឹងការបោះឆ្នោតនោះដែរ។ អ្វីដែលយើងកំពុងតែឃើញនេះគឺការវាយប្រហារជាបន្តរបស់រុស្ស៊ីដើម្បីបំផ្លាញស្ថាប័នប្រជាធិបតេយ្យរបស់សហរដ្ឋអាមេរិក ហើយរុស្ស៊ីនឹងនៅតែបន្តវាយប្រហារដូចនេះមកលើសហរដ្ឋអាមេរិកដដែល»៕
ប្រែសម្រួលដោយ ភី សុភាដា
