រដ្ឋមន្ត្រីការបរទេសសហរដ្ឋអាមេរិកលោក Rex Tillerson បាននិយាយថា «វាច្បាស់ណាស់ថា យើងត្រូវការវិធានការមួយផ្សេងទៀត» បន្ទាប់ពីកិច្ចការការទូតនានាដើម្បីរារាំងកូរ៉េខាងជើងមិនឲ្យសម្រេចគោលបំណងអាវុធនុយក្លេអ៊ែររបស់ខ្លួន បានទទួលបរាជ័យក្នុងរយៈពេល ២០ឆ្នាំ កន្លងមកនេះ។
ដោយថ្លែងនៅក្នុងទីក្រុងតូក្យូ ប្រទេសជប៉ុន នៅថ្ងៃព្រហស្បតិ៍នេះ នៅក្នុងការចាប់ផ្ដើមដំណើរទស្សនកិច្ចលើកដំបូងរបស់លោកទៅកាន់ទ្វីបអាស៊ីក្នុងនាមជារដ្ឋមន្ត្រីការបរទេសសហរដ្ឋអាមេរិក លោក Tillerson បាននិយាយថា មូលហេតុមួយដែលលោកធ្វើដំណើរមកកាន់ទ្វីបអាស៊ី គឺដើម្បីផ្លាស់ប្ដូរយោបល់ជាមួយនឹងប្រទេសជប៉ុន កូរ៉េខាងត្បូង និងចិន អំពីគម្រោងការមួយផ្សេងទៀតចំពោះប្រទេសកូរ៉េខាងជើង។
លោក Tillerson បានថ្លែងនៅឯសន្និសីទរួមគ្នាមួយជាមួយនឹងរដ្ឋមន្ត្រីការបរទេសជប៉ុនលោក Fumio Kishida ថា៖ «រដ្ឋាភិបាល និងប្រជាពលរដ្ឋកូរ៉េខាងជើងមិនចាំបាច់ត្រូវខ្លាចសហរដ្ឋអាមេរិក ឬក៏ប្រទេសជិតខាងរបស់ខ្លួននៅក្នុងតំបន់ ដែលមានគោលបំណងចង់រស់នៅក្នុងសន្តិភាពជាមួយនឹងកូរ៉េខាងជើងនោះទេ។ ដោយសារគំនិតនេះហើយ សហរដ្ឋអាមេរិកអំពាវនាវឲ្យកូរ៉េខាងជើងលះបង់នូវកម្មវិធីអាវុធនុយក្លេអ៊ែរ និងគ្រាប់ផ្លោងមីស៊ីលរបស់ខ្លួន និងដកខ្លួនឲ្យឆ្ងាយពីសកម្មភាពបង្កហេតុណាមួយបន្តទៀត»។
លោក Tillerson ក៏បានសន្យាថា ការប្ដេជ្ញាចិត្តរបស់សហរដ្ឋអាមេរិកនៅក្នុងការការពារប្រទេសជប៉ុន និងសម្ព័ន្ធមិត្តផ្សេងទៀតរបស់ខ្លួន គឺមិនប្រែប្រួលទេ។
នៅថ្ងៃសុក្រស្អែក លោក Tillerson នឹងធ្វើដំណើរទៅកាន់ប្រទេសកូរ៉េខាងត្បូង ហើយបន្ទាប់មកនឹងធ្វើដំណើរទៅកាន់ប្រទេសចិន ដើម្បីជួបជាមួយនឹងលោកប្រធានាធិបតីចិន Xi Jinping៕
