នៅថ្ងៃអាទិត្យនេះមនុស្សរាប់ពាន់នាក់បានធ្វើបាតុកម្មនៅខាងក្រៅអាគាររដ្ឋសភាទីក្រុងហុងកុង។ ប៉ុន្តែបាតុកម្មលើកនេះគឺជាបាតុកម្មគាំទ្រចំណាត់ការរបស់ប៉ូលិសក្រុងហុងកុង បន្ទាប់ពីមានការរិះគន់ជាច្រើនពាក់ព័ន្ធទៅនឹងការបាញ់ឧស្ម័នបង្ហូរទឹកភ្នែក និងគ្រាប់កាំភ្លើងជ័រដោយក្រុមប៉ូលិសទៅលើហ្វូងបាតុករ។
បាតុករភាគច្រើនស្លៀកពាក់ខោអាវពណ៌សរឬខ្មៅលាយឡំគ្នា ដើម្បីបង្ហាញអំពីជំងឺមនោគមវិទ្យាដែលឥឡូវនេះបានរាលដាលពាសពេញទីក្រុងហុងកុងទាំងមូល ខណៈទីក្រុងនេះកំពុងជួបវិបត្តិនយោបាយដ៏អាក្រក់បំផុត។
កាលពីដើមខែមិថុនានេះបាតុកម្មធំៗជាប្រវត្តិសាស្រ្តពីរបានផ្ទុះឡើងនៅក្នុងទីក្រុងហុងកុង ដោយសារតែក្រុមបាតុករប្រឆាំងនឹងសំណើច្បាប់ធ្វើបត្យាប័នបញ្ជូនមនុស្សទៅចិនដីគោក ដែលក្រោយមកត្រូវបានប្រកាសឲ្យផ្អាកដំណើរការ។
បាតុកម្មនេះបានបង្កឲ្យមានការរង្គោះរង្គើរខ្លាំងមិនដែលធ្លាប់មានពីមុន។ កាលពីថ្ងៃទី១២ ខែមិថុនា ក្រុមប៉ូលិសបានបាញ់ឧស័្មនបង្ហូរទឹកភ្នែក និងគ្រាប់កាំភ្លើងជ័រដើម្បីបំបែកហ្វូងបាតុករជាយុវជនក្មេងៗដែលធ្វើបាតុកម្មប្រឆាំងនឹងសំណើច្បាប់ធ្វើបត្យាប័ននេះនៅជុំវិញអាគាររដ្ឋសភា។
ប៉ូលិសបានលើកហេតុផលថាបាតុកម្មនេះជាកុបកម្មមួយ ហើយការបាញ់ឧស័្មនបង្ហូរទឹកភ្នែក និងគ្រាប់កាំភ្លើងជ័រទៅលើហ្វូងបាតុករនេះ គឺជាយុទ្ធសាស្រ្តការពាររបស់ពួកគេតែប៉ុណ្ណោះ។ ក៏ប៉ុន្តែក្រុមបាតុករបានចោទប្រកាន់មន្រ្តីប៉ូលិសទាំងនោះថាបានប្រើកម្លាំងហួសប្រមាណទៅលើបាតុករនិងស្នើឲ្យមានការស៊ើបអង្កេតឯករាជ្យមួយ។
ក្រុមបាតុករដែលខឹងសម្បានឹងប៉ូលិសបានបិទផ្លូវចេញចូលទីស្នាក់ការប៉ូលិសក្រុងពីរដងកាលពីពីរសប្តាហ៍មុន។
ការជួបជុំនៅថ្ងៃអាទិត្យនេះត្រូវបានគេសម្គាល់ឃើញថាភាគច្រើនជាមនុស្សមានវ័យចំណាស់។ បាតុករខ្លះបានគ្រវីទង់ជាតិចិន ដែលជាការបង្ហាញឲ្យឃើញថា ទោះជាយ៉ាងណាក៏ដោយក៏នៅមានមនុស្សជាច្រើនគាំទ្រចំណាត់ការរបស់ប៉ូលិស និងនយោបាយគាំទ្ររដ្ឋាភិបាលក្រុងប៉េកាំងដែរ៕
