មនុស្សរាប់ម៉ឺននាក់បានចេញតាមដងផ្លូវនានានៃទីក្រុងចម្បងៗរបស់ប្រទេសអ៊ីតាលីដើម្បីប្រារព្ធទិវាអន្តរជាតិនៃការលុបបំបាត់អំពើហិង្សាលើស្ត្រី។ នេះបើយោងតាមសេចក្ដីរាយការណ៍របស់ទីភ្នាក់ងារសារព័ត៌មាន AP។
ពួកគេដើរក្បួនតវ៉ាកាលពីថ្ងៃសៅរ៍ នៅចំពេលដែលបុរសអ៊ីតាលីម្នាក់ដែលត្រូវគេសង្ស័យថាបានសម្លាប់អតីតមិត្តស្រីរបស់ខ្លួនត្រូវបានគេបញ្ជូនខ្លួនមកកាន់ប្រទេសអ៊ីតាលីពីប្រទេសអាល្លឺម៉ង់។
ការសម្លាប់និស្សិតសាកលវិទ្យាល័យអាយុ ២២ ឆ្នាំឈ្មោះ Giulia Cecchettin ដែលត្រូវគេចោទប្រកាន់ថាបានធ្វើឡើងដោយអតីតមិត្តប្រុសរបស់ខ្លួននេះ បានបង្កឱ្យមានការខឹងសម្បានៅទូទាំងប្រទេសអ៊ីតាលី ដែលនៅទីនោះជាមធ្យមស្ត្រីម្នាក់ត្រូវបានសម្លាប់រៀងរាល់ ៣ ថ្ងៃម្ដង។
ជនឈ្មោះ Filippo Turetta អាយុ ២១ ឆ្នាំដែលគេសង្ស័យថាជាអ្នកសម្លាប់នាង Cecchettin ត្រូវបានគេបញ្ជូនមកដល់អាកាសយានដ្ឋាន Venice កាលពីព្រឹកថ្ងៃសៅរ៍។ ជននេះត្រូវបានគេបញ្ជូនភ្លាមៗទៅកាន់ពន្ធនាគារនៅក្នុងទីក្រុង Verona នៅភាគខាងជើងប្រទេសអ៊ីតាលីដើម្បីប្រឈមនឹងការសួរចម្លើយ។ នេះបើយោងតាមសេចក្ដីរាយការណ៍របស់ប្រព័ន្ធផ្សព្វផ្សាយអ៊ីតាលី។
នាង Cecchettin បានបាត់ខ្លួនបន្ទាប់ពីបានញ៉ាំប៊ឺហ្គឺជាមួយជនឈ្មោះ Turetta នៅឯផ្សារទំនើបមួយកន្លែងជិតទីក្រុង Venice គឺក្នុងពេលតែប៉ុន្មានថ្ងៃប៉ុណ្ណោះមុនពេលនាងត្រៀមទទួលបរិញ្ញាបត្រវិស្វកម្មជីវវេជ្ជសាស្ត្រ។ ករណីនេះបានធ្វើឱ្យប្រជាជននៅក្នុងប្រទេសអ៊ីតាលីផ្ដោតការយកចិត្តទុកដាក់យ៉ាងខ្លាំង។
សាកសពរបស់នាង Cecchettin ដែលរុំដោយស្បោងផ្លាស្ទិកពណ៌ខ្មៅនៅក្នុងប្រឡាយជិតបឹងមួយនៅជើងភ្នំនៃជួរភ្នំ Alps ត្រូវបានគេរកឃើញកាលពីថ្ងៃទី ១៨ ខែវិច្ឆិកា។ ជនឈ្មោះ Turetta ត្រូវបានចាប់ខ្លួននៅថ្ងៃបន្ទាប់ក្នុងប្រទេសអាល្លឺម៉ង់។
ការសម្លាប់នាង Cecchettin នេះបានបង្កឱ្យមានរលកមិនធ្លាប់មានពីមុនមកនៃទុក្ខសោកនិងកំហឹងនៅក្នុងប្រទេសអ៊ីតាលី ដែលនៅទីនោះស្ត្រីជាច្រើនថាឥរិយាបថបែបបុរសជាធំនៅតែចាក់ឬសចាក់គល់យ៉ាងខ្លាំង។
ទិន្នន័យពីក្រសួងមហាផ្ទៃអ៊ីតាលីបានបង្ហាញថា កន្លងមកស្ត្រី ១០៦ នាក់ត្រូវបានសម្លាប់នៅក្នុងប្រទេសអ៊ីតាលីនៅក្នុងឆ្នាំនេះ ដោយក្នុងនោះ ៥៥ នាក់ត្រូវបានគេចោទប្រកាន់ថាត្រូវបានសម្លាប់ដោយដៃគូឬក៏អតីតដៃគូរបស់ខ្លួន។
ទូរទស្សន៍ RAI របស់អ៊ីតាលីបានរាយការណ៍ថា ក្នុងថ្ងៃជាបន្តបន្ទាប់ក្រោយមកបន្ទាប់ពីសាកសពរបស់នាង Cecchettin ត្រូវបានរកឃើញ ការហៅទូរស័ព្ទតាមខ្សែទូរស័ព្ទបន្ទាន់ថ្នាក់ជាតិពាក់ព័ន្ធនឹងរឿងដែលស្ត្រីភ័យខ្លាចអំពីសុវត្ថិភាពរបស់ខ្លួននៅក្រោមដៃរបស់បុរសបានកើនឡើងពីប្រហែល ២០០ ទៅ ៤០០ ករណីក្នុងមួយថ្ងៃ ដែលក្នុងនោះរួមមានទាំងការហៅទូរស័ព្ទរបស់ឪពុកម្ដាយរបស់ស្ត្រីក្មេងៗផងដែរ។
នាង Aurora Arleo និស្សិតអាយុ ២៤ ឆ្នាំ ដែលមកពីក្រុង Ladispoli ជិតរដ្ឋធានីរ៉ូមនិងបានចូលរួមនៅក្នុងបាតុកម្ម បាននិយាយថា៖ «អំពើហិង្សាដែលបង្កឡើងដោយបុរសជាអ្វីដែលប៉ះពាល់អារម្មណ៍របស់ខ្ញុំនិងមនុស្សគ្រប់គ្នាដោយផ្ទាល់។ យើងបានរួបរួមគ្នាដើម្បីនាង Giulia [Cecchettin] ដោយសារតែរឿងរ៉ាវរបស់នាងប៉ះពាល់ដល់អារម្មណ៍របស់ពួកយើង ហើយខ្ញុំសង្ឃឹមថារឿងរ៉ាវនេះនឹងធ្វើឱ្យមានការផ្លាស់ប្ដូរ»៕
ប្រែសម្រួលដោយលោក ភី សុភាដា
