តាមប្រភពពីមន្ត្រីសន្តិសុខក្នុងប្រទេសតួកគីឲ្យដឹងថាយ៉ាងហោចណាស់មានមន្ត្រីប៉ូលិសចំនួនបីនាក់ត្រូវបានសម្លាប់នៅថ្ងៃអាទិត្យនេះនៅភាគខាងត្បូងនៃប្រទេសក្នុងពេលមានហេតុការណ៍ហិង្សាចុងក្រោយ ដែលបានអូសបន្លាយអស់ពេលជាច្រើនសប្តាហ៍រវាងកងកម្លាំងរដ្ឋាភិបាល និងពួកសកម្មប្រយុទ្ធឃឺដ (Kurds)។
តាមប្រភពនានានិយាយថា មានមន្ត្រីប៉ូលិសពីរនាក់ត្រូវបានសម្លាប់នៅក្នុងការវាយប្រហារដោយដាក់គ្រាប់បែកនៅក្នុងរថយន្តជិតចំណុចត្រួតពិនិត្យរបស់ប៉ូលិសមួយនៅខាងក្រៅទីក្រុងសៀណាក់ (Sirnak) ។ កងកម្លាំងសន្តិសុខបានតាមជនសង្ស័យដោយប្រើប្រាស់ឧទ្ធម្ភាគចក្រដើម្បីបាញ់ប្រហារលើក្រុមសកម្មប្រយុទ្ធនោះ ហើយសម្លាប់បានពួកគេចំនួនពីរនាក់ក្នុងពេលដែលរត់គេចខ្លួន។
មន្ត្រីប៉ូលិសម្នាក់ទៀតត្រូវបានសម្លាប់ក្នុងស្រុកស៊ីលវ៉ាន់ (Silvan) នៃខេត្តឌីយ៉ាបាគី (Diyarbakir) បន្ទាប់ពីជនសកម្មប្រយុទ្ធនៃគណបក្សពលករឃឺដ(PKK) បានធ្វើការបាញ់ប្រហារដោយគ្រាប់រ៉ុក្កែត។
ក្នុងរយៈពេលប៉ុន្មានសប្តាហ៍កន្លងទៅនេះ កងកម្លាំងសន្តិសុខឃឺដបានធ្វើប្រតិបត្តិការយោធាដ៏ធំនៅភាគខាងត្បូងទីក្រុងស៊ីក (Cirze)។ នៅពេលដែលបម្រាមគោចរ ដែលមានរយៈពេល៩ថ្ងៃត្រូវបានលុបចោលកាលពីថ្ងៃសៅរ៍ ប្រជាជនរស់នៅតំបន់នោះបានទៅលំនៅដ្ឋានរបស់គេវិញហើយឃើញអាគារបែកបាក់ ផ្ទះសម្បែង និងរថយន្តធ្លុះធ្លាយដោយគ្រាប់កាំភ្លើង ហើយមានសំបកគ្រាប់រាប់រយនៅរាយប៉ាយគ្រប់កន្លែងទាំងអស់៕
