សេចក្តីថ្លែងការណ៍មួយរបស់ក្រសួងការបរទេសតួកកីបាននិយាយកាលពីថ្ងៃសៅរ៍ថា កងយន្តហោះប្រតិកម្មប្រយុទ្ធនៃប្រទេសតួកគីបានធ្វើការវាយប្រហារតាមអាកាសលើកទីមួយរបស់ខ្លួនជាផ្នែកមួយនៃក្រុមចម្រុះដឹកនាំដោយស.រ.អា.ប្រឆាំងនឹងក្រុមរដ្ឋឥស្លាមក្នុងប្រទេសស៊ីរី។
កងយន្តហោះទាំងនេះបានចាប់ផ្តើមវាយប្រហារលើទីដៅរបស់ក្រុមរដ្ឋឥស្លាម កាលពីយប់ថ្ងៃសុក្រឆ្លងកាត់ព្រំដែនក្នុងប្រទេសស៊ីរីដែលអាចជាការគំរាមកំហែងដល់ប្រទេសតួកគី។
នៅក្រោយមានការពន្យាពេលជាច្រើនខែមក ប្រទេសតួកគីបានយល់ព្រមកាលពីខែមុនដោយប្រកាន់យកមុខនាទីសកម្មជាងមុននៅក្នុងការប្រយុទ្ធប្រឆាំងនឹងក្រុមជ្រុលនិយមរដ្ឋឥស្លាម។ កងយន្តហោះប្រតិកម្មតួកគីបានប្រើប្រាស់គ្រាប់បែកទម្លាក់ត្រូវចំៗទីដៅដើម្បីវាយប្រហារលើទីតាំងក្រុមរដ្ឋឥស្លាម នៅក្នុងប្រទេសស៊ីរីដោយមិនចាំបាច់ឆ្លងកាត់ចូលក្នុងដែនអាកាសស៊ីរីទេ ហើយនៅពេលបន្ទាប់មកប្រទេសតួកគីក៏បានបើកឱ្យកងយន្តហោះប្រតិកម្មស.រ.អា.ប្រើប្រាស់មូលដ្ឋានកងទ័ពអាកាសសំខាន់មួយនៅជិតព្រំដែននៃប្រទេសស៊ីរី។
ក្រសួងការបរទេសតួកគីបាននិយាយថា «កងយន្តហោះប្រយុទ្ធរបស់យើងជាមួយកងយន្តហោះចម្បាំងរបស់ក្រុមចម្រុះបានចាប់ផ្តើមកាលពីល្ងាចម្សិលមិញក្នុងការធ្វើកិច្ចប្រតិបត្តិការតាមអាកាសប្រឆាំងនឹងក្រុម Daesh ដែលជាការគំរាមកំហែងមួយដល់សន្តិសុខប្រទេសយើង។ ការប្រយុទ្ធប្រឆាំងនឹងអង្គការភេរវជននេះជាអាទិភាពមួយសម្រាប់ប្រទេសតួកគី»៕
