ក្រុមអ្នកគាំទ្ររាជានិយមថៃដែលពាក់អាវលឿងជាង១.០០០នាក់ បានធ្វើបាតុកម្មគាំទ្រព្រះមហាក្សត្រថៃព្រះបាទ Maha Vajiralongkorn នៅថ្ងៃអង្គារ នៅជិតទីតាំងដែលមានក្រុមបាតុកររាប់ពាន់នាក់ផ្សេងទៀត បានធ្វើបាតុកម្មមួយថ្ងៃមុននេះ ដើម្បីទាមទារឲ្យមានការកែទម្រង់ក្នុងស្ថាប័នព្រះមហាក្សត្រនោះ។
ក្រុមយុវជននិងនិស្សិតថៃជាច្រើននាក់ បានដឹកនាំបាតុកម្មក្នុងប្រទេសថៃ ដែលបានចាប់ផ្តើមតាំងពីខែកក្កដាមក ដោយទាមទារឲ្យនាយករដ្ឋមន្ត្រីថៃលោក Prayuth Chan-ocha ដែលជាអតីតមេទ័ពមួយរូប ចុះចេញពីតំណែង និងឲ្យមានការតាក់តែងរដ្ឋធម្មនុញ្ញថ្មីមួយផង។ ពួកគេក៏ទាមទារឲ្យមានការបន្ថយអំណាចរបស់ស្ថាប័នព្រះមហាក្សត្រថៃ។
បាតុករអាវលឿងម្នាក់ឈ្មោះ Thatchapan Boriphet អាយុ៥៧ឆ្នាំ និយាយនៅកន្លែងបាតុកម្មក្នុងសួន Lumphini កណ្តាលក្រុងបាងកកថា៖ «យើងចង់បង្ហាញពីការគាំទ្រ និងការលើកទឹកចិត្តរបស់យើងចំពោះព្រះមហាក្សត្រថៃ។ ខ្ញុំអព្យាក្រឹតខាងផ្នែកនយោបាយ ប៉ុន្តែខ្ញុំមិនអាចឈរឱបដៃមើល នៅពេលដែលស្ថាប័នព្រះមហាក្សត្រត្រូវបានគេរំលោភបំពាននោះទេ»។
រហូតមកដល់ពេលនេះ ក្រុមបាតុករគាំទ្រព្រះមហាក្សត្រថៃ មានចំនួនតូចខ្លាំងជាងក្រុមនិស្សិតដែលចូលរួមតវ៉ាប្រឆាំងរដ្ឋាភិបាលថៃ ដែលមានមនុស្សចូលរួមរាប់ម៉ឺននាក់នោះ។
ក្រុមអ្នកតវ៉ាប្រឆាំងរាជវាំងថៃ បានចោទប្រកាន់ព្រះមហាក្សត្ររបស់ប្រទេសនេះ ថាបានចូលពាក់ព័ន្ធនឹងរឿងនយោបាយ ហើយពួកគេបានដើរទៅស្ថានទូតអាល្លឺម៉ង់ក្នុងប្រទេសថៃកាលពីថ្ងៃចន្ទ ដើម្បីសុំឲ្យមានការស៊ើបអង្កេតមួយថា តើព្រះមហាក្សត្រថៃរូបនេះ បានប្រើអំណាចរបស់ព្រះអង្គពីប្រទេសអាល្លឺម៉ង់មកកាន់ប្រទេសថៃ ក្នុងអំឡុងពេលនៃការស្នាក់អាស្រ័យនៅដ៏យូររបស់ព្រះអង្គក្នុងប្រទេសអាល្លឺម៉ង់នោះដែរឬយ៉ាងណា។ រដ្ឋាភិបាលទីក្រុងប៊ែរឡាំងធ្លាប់បាននិយាយថា ការណ៍ដែលព្រះមហាក្សត្រថៃប្រើប្រាស់អំណាចចេញពីប្រទេសអាល្លឺម៉ង់នោះ ជាប្រការមួយដែលមិនទទួលយកបាននោះទេ។
បច្ចុប្បន្ន ព្រះមហាក្សត្រថៃកំពុងគង់ក្នុងប្រទេសថៃ៕
